【真人真事有圖】18歲學生妹，比人搞大咗個肚真係要大住個肚上堂？

:0:0

以為佢愛我，原來佢只愛玩學生妹
喺呢度成日見到有人話擔心嫁唔出，又有人話自己婚後生活如何，我又想喺度分享嚇自己嘅故事

我好早就結婚了，中七畢業證書都未攞就已經嫁人了，原因好簡單，未婚先孕
前夫大我好多，十一年有多，話說我係中五等放榜時做暑期工識佢的，當時嘅我覺得佢好靚仔，好man同好叻，叻嘅並唔係讀書方面，而係生活上嘅嘢，說白一點就係覺得佢見識多我好多，我唔知嘅嘢佢知，我知嘅嘢除咗英文外佢都知
佢係暑期工公司嘅司機，而我只係一個小女工，好快就已經一齊咗，直到中六開學，同學仔問我做乜同個咁老嘅人拍拖，我都會答因為呢個人比到安全感我，因為佢見識多過我

但原來呢啲安全感都只係我嘅天真所幻想出嚟的
到我一日一日咁大，見識嘅嘢越嚟越多，開始慢慢發現呢個男人並唔係我想像中咁好…原來我發現當初我認為佢所識嘅好多嘢都只係人大了後便會學懂的common sense，或者係因為自細家教嚴，除咗學校同屋企外我冇機會出去見識呢個世界，所以一啲其實好平常的事我都會好似發現新大陸咁…
同埋我發現咗佢身上越來越多奇怪嘢，佢好鍾意我著住校服同佢去街，如果有啲場合真係唔可以著校服，佢就好鍾意我著一啲較成熟的貼身衫，仲未開竅嘅我會理解為佢覺得我咁著好靚，當然開竅後我會理解為男人對學生妹嘅情意結啦

另一樣奇怪嘅係佢成日都會失蹤，完全搵唔到人嗰種，只有佢搵到我而我永遠都搵佢唔到，未開竅時我理解為佢工作忙，開竅後我理解為偷跳
再奇怪嘅係佢三更窮五更富，身為一個成年人，有正當職業，但偏偏佢有錢喺身嘅時間比我呢個只係靠幫人補習賺取學費同零用嘅學生妹更短，未開竅時我理解為生活迫人同埋同我拍拖應該用咗佢好多錢，開竅後我就知道原來男人每多一種「興趣」就會用多啲錢的了
＜因為新手唔識點分開嚟post,唯有不停咁update第一個post＞
終於喺出現同失蹤間交替，時間亦去到中七a level mock paper前夕，我發現唔可以再同呢個男人拖拉落去，正確嚟講係佢又玩失蹤，我搵佢唔到，咁諗諗嚇就覺得應該唔可以再比佢搵到我了，我要上大學，我要去見多啲嘢，我唔想呢一世就同個咁嘅人拖拉落去，好喇，就咁樣我同佢斷咗個幾月聯絡，我亦喺失戀中考完mock

就喺我考完最後一科，一放學出門口佢竟然揸住架車等我，話接我去慶祝嚇，當時天真嘅我緊係喊住咁上車啦，感動到呢…一路喊一路覺得自己太衰了，佢明明就係唔想影響我考試情緒而唔出現，佢明明就好緊張我，佢明明就…
劇情嚟到呢度，就係咁，我同佢就第一次喺室外地方咩了，正確嚟講係第一次冇做安全措施下咩了，有得第一次就會有之後嘅好多次，而當時嘅我只係一直心存僥倖，邊有咁易中吖

好快又到正式考a level前夕，理所當然佢又失蹤了，可能有咗上次經驗，今次冇咁多胡思亂想，但心情唔多唔少都會有影響，考得唔好亦係意料中事
但今次唔同嘅係，當我考完最後一科後，佢冇再出現了，直到a level後嘅兩個月
佢突然出現，就好似冇事發生過咁，如常約我lunch，食lunch時佢問我做乜唔食嘢，我話胃唔舒服，佢仲答我又唔早啲講，我同你去睇醫生
飯後佢揸住架5.5，因為佢話要看住架車，所以我自己去睇醫生，睇完打比佢嚟接我
到我了，醫生按完我個肚後問我經期有冇嚟，我答唔記得，跟住醫生叫我去留小便，之後直到打比佢再上返架5.5中間嘅時間我都只係識腦海一片空白咁喊…直到佢大喝一聲「喊咩啫?有咗咪結婚囉」

嗰刻嘅我，唔好問我點解，我聽完後就覺得自己冇跟錯人，係呢個男人了！
婚禮係擺酒，但中間好多嘢我都印象模糊，淨係記得全部嘢都係我媽咪陪我整的，但好奇怪爸爸媽咪點解愁眉苦臉?係咪因為我未婚先孕令佢哋蒙羞?我唔理了！總之我快啲嫁啲三姑六婆就冇嘢好講了！
聽日就係擺酒嘅日子，點解媽咪幫我上頭時會喊?點解爸爸會眼濕濕?過埋聽日就冇事了，我唔會再令你哋蒙羞…等等，咩事?做乜媽咪爸爸會跪喺我前面?咩儀式嚟的?乜唔係我跪佢哋多謝佢哋嘅養育之恩咩？
媽咪：「阿妹，你唔好嫁好嗎？媽咪爸爸求嚇你，呢個男人信唔過，唔值得的，有bb好閒，當我哋自私，你落咗個bb，其他人點講冇所謂，我淨係想個女開開心心，你仲有好多嘢未見過未試過，呢個男人唔值得的」

爸爸：「我哋當你係寶，呢個男人當你係草，阿妹，你聽爸爸話，唔好嫁，就算你要生個bb出嚟就當我多個孻仔，總之唔好嫁」
我：「爸爸媽咪，我知我大咗個肚已經令你哋好醜，就算點我都一定要嫁，嫁咗你哋就唔會被人講閒話，我已經錯咗個開頭，之後係點我都唔會怨」
就係咁，我嫁咗了，嫁入門第一晚已經喊住訓，喊係因為我聽唔明老爺奶奶講嘅客家話…

中間嘅嘢都唔駛點講，tbb八點半師奶劇情節，老公失蹤又出現，大住個肚一日補四個習，爸爸媽咪幫我打點一切，家用唔會有之餘仲要問我攞返轉頭，由發狂到麻目，開始發現呢個男人真正嘅一面…極度爛賭，極度爛滾，極度不負責任等等
再次拖拉，爆發點就係有一次佢失蹤，我抱起個仔不停搖，直到我爸爸大大力打咗我一巴，我咁大個女第二次比爸爸打，嗰嚇醒咗，為咩要攪到咁?因為自己硬頸，不聽老人言所以攪到咁，害咗個仔了…原來我承受唔到…之後有好多次我都想用不同嘅方法了結自己同個仔，因為我同個仔係家中嘅恥辱
由我想了結，再諗方法逃避，呢個過程用咗好多年，唔知由幾時開始，我變咗另一個佢…
失蹤，出現，再失蹤，由討厭夜生活變成一個爛蒲精，由一個乖乖女變咗做一個為咗唔駛返屋企訓而晚晚去ons嘅人，太多太多，我淨係知自己除咗酒精外冇嘢幫到我，更甚嘅係…我學埋吸毒…

爸爸媽咪同所有屋企人，由心痛變做麻目，就如當初爸爸所講，佢哋多咗個孻仔，但冇咗個女
可笑嗎？我討厭我呢個不負責任嘅前夫，我討厭呢個爛玩爛蒲爛賭嘅前夫，我討厭呢個成日失蹤嘅前夫…但…我竟然變咗做另一個佢…
沉淪咗好耐好耐，沉淪到已經覺得有一日如果我係吸毒後high死會係最好嘅結果，直到四年前我遇上嘅明燈
我同明燈相遇只係喺一個蒲後醫肚時嘅一刻，就係咁，人生有返少少色彩，點解突然間爸爸媽咪老咗咁多?點解突然間個仔大咗咁多?點解個個見我返屋企食飯時個樣好似見鬼咁?
奇怪，明燈明明就係我最討厭嘅類型：細我五年或以上，太高太瘦，成個mk仔咁款，把口浪過油等等，總之就係我最憎嗰type啦…但點解同佢一齊時感覺好似踏實好多?

由最初所有人都以為我只係同個後生仔玩玩嚇採陽補陰，到慢慢我已經脫離咗班毒友…由最初晚晚唔蒲唔安樂，到慢慢覺得留喺屋企先係最安樂…由最初完全唔想見到個仔，到慢慢所有拍拖節目都係三人行…由最初最討厭做師奶，到慢慢覺得有得做師奶都係一種福份
所有嘢嚟得好唔合理但又似乎好乎合劇情發展，原來好多嘢就係咁，當你以為眼前嘅已經係絕路，原來真係天無絕人之路
是你的總會來，原來當初我所遇到嘅前夫同所有嘅經歷同沉淪，就係為咗明燈而鋪路，因為經歷過所以先知一切得來不易，因為經歷過先知原來一頭家係要雙方面經營的
同明燈一齊了差不多四年，大家都仍在學習中磨合中，但可幸嘅係，仔仔已經接受返我呢個媽咪，更可幸嘅係仔仔愛明燈多過我，佢哋兩個相處極好，而我家中所有人都好愛明燈，因為佢哋覺得明燈救返佢哋個女返嚟
到最後，我想多謝一直以來辛辛苦苦照顧我嘅爸爸媽咪，多謝你哋一直嘅不離不棄，因為你哋一直冇放棄我，所以先有今日可以擁有幸福嘅我

[圖擷取自網路，如有疑問請私訊]