農曆新年一定睇　經典賀歲片睇到識背

:0:0

農曆新年又到，連放幾日假，當然唔少得睇返套賀歲片！不過係睇嗰啲每年電視都重播，但大家每年都會照樣乖乖坐低睇，睇到劇情都識背嗰啲賀歲片！以下呢幾套經典，你冇理由未睇過啩！
《富貴逼人》Cap嚟見我
呢套80年代的經典，由兩位已故的巨星、董驃及肥姐沈殿霞主演。佢哋在片中飾演一對終日夢想發橫財的夫妻驃叔及驃嫂，其中驃嫂係一位典型的香港師奶，閒時與鄰居打麻雀，又經常買六合彩，希望可以一朝發達後向親戚街坊炫耀。屋邨生活、打牌、買六合彩，最貼近市民生活的題材盡在此片，用現在的說法就係夠「貼地」！電影爆笑之餘亦不乏人生道理，結果票房大收旺場，後來添食推出《富貴再逼人》(1988年)、《富貴再三逼人》(1989年)、《富貴黃金屋》(1992年)。

《家有囍事》賀歲片點會冇周星馳！星爺的好作品實在太多，不過《家有囍事》絕對係經典！呢部92年作品集星爺、張國榮、黃百鳴、張曼玉及吳君如等多位巨星，甚至關海山同李香琴都好搶戲，個個角色都獨當一面，令人印象深刻！情節夠晒無厘頭，經典場面多不勝數，廿幾年後的今日睇，一樣係咁正！

《逃學威龍3之龍過雞年》不經不覺已經係25年前的作品，如果以《逃學威龍》系列來說，呢一集算係相對被忽略的一部。但部份場面，仍然惹笑。此片大肆戲謔當年人氣荷里活片《本能》，不乏惹笑場面，而且星爺與梅艷芳成功擦出火花，不論係喜劇場面或感情戲都演得出色。

《行運一條龍》雖然大家都公認《行運一條龍》係星爺作品，不過其實佢在戲內只有約十分鐘的演出，但其中星爺與吳孟達的經典對白「年初四咁嘅樣」，就足以令大家每年都拎出嚟loop一次！「年初四，假又放完、錢又使晒、工又要返，點會好樣呢⋯⋯」

《嚦咕嚦咕新年財》可算係千禧年後的最佳賀歲片，杜棋峰及韋家輝執導，集劉德華、劉青雲、古天樂、梁詠琪等多位紅星，絕對係誠意之作！劇情溫馨惹笑，不乏精彩的麻雀鬥法（如梁詠琪與黃文慧的新袍奶奶鬥法），而且打牌金句夠晒精闢，好一句「牌品好，人品自然好；牌品唔好，即係人品唔好」、「愈爛嘅牌，愈要俾心機打」簡直係至理名言！