【廉航攻略】如何最有效最快捷搶購平機票

:0:1

對於精打細算嘅我黎講，搶平機票我都有些少經驗，口講無憑，↓有圖有真相↓

▼3月17-22日2人來回東京羽田機場＋1件來回20KG行李＝＄1666（平均1人＄833）
不過講真呢張機票雖然平，但時間唔算好

▼4月15-19日2人來回關西機場＋1件來回20KG行李＝＄1654（平均1人＄827）
呢個除左平之外，時間亦都好靚！早機去晚機返

▼5月10-14日2人來回東京羽田機場＋1件來回20KG行李＝＄1648（平均1人＄824）
零晨機去零晨機返，對我而言係非常靚嘅時間，但我知道對部分人士係地獄時間

你問我點解全部都係HK Express嘅機票？因為HK Express嘅機票係最抵同埋去日本嘅班次及航點係最多，就係咁簡單，所以我都只係會話你知我搶HK Express機票嘅心得！我唔排除其他日本廉航例如香草，樂桃個啲都會推出一樣咁抵嘅機票優惠，但真係少，而佢地好多時推出嘅優惠連稅連行李之後每人來回價都要過千，所以我都係集中留意香港快運！
咁究竟我搶平機有咩心得？如果你喺2015年問我，我就會答你一個長編大論嘅答案，包括準備好多個瀏覽器，死唔斷氣係咁SEARCH，先買單程票等等等等

但自從2016年起，我就改變左我嘅答案，要最有效最快捷搶到平機票方法只有一個，就係買香港快運年頭推出嘅「U－FLY PASS」！！

▼U－FLY PASS就係一個優先購票權，可以提早最多６小時購票，無須再等待優惠開始後與公眾同時搶票，更容易購得理想旅遊日子嘅特價機票！
佢寫原價係HKD 888，但官網而家仲可以以優惠價HKD 588購買（BTW我係最早買個批只需HKD 388

)

▼其實U－FLY PASS一出個時我同好多人嘅感受一樣，就係覺得有啲掠水成分，但後來發覺真係好值得買！
買左之後，搶平機票變得不一樣，由以前成日入唔到個網變成好順暢，由以前㩒極都冇平機票變成勁多平機票，感覺非常良好！

所以，唔講太多，如果你覺得自己一年內起碼會去2次旅行，又想搶到平機票，咁你就一定要買U－FLY PASS！＄588嘅投資真係唔算貴。
而家Ufly-Pass 優先購票證有效期至2016年12月31日（所以早買早享受）；但唔代表出發日期至2016年12月31日，係購買日期至2016年12月31日，即係你可以2016年12月31日前買2017年9月嘅機票都得！

咁有冇人係唔適合買U－FLY PASS？有，就係個啲只會旺季先會出遊嘅人，因為HK Express嘅平機票係極少喺假期前夕有。

仲有一點要留意，平機票通常零晨12點開賣，U－FLY PASS就可以早6小時即係6點鐘開始有得賣，但因為買U－FLY PASS嘅人越黎越多，唔好坐定粒六以為只要12點前任何時候入去都大把平機票，我建議你都要準時6點入去搶，因為我真係試過9點先入去已經冇晒靚位了T＾T

－－－－－－－－－－－－－－－

另外，HK Express岩岩又出左一樣新野叫「reward-U獎賞計劃」，係一個獎賞兌換制度。即係以後買機票可以儲積分！