拳怕少壯－BMW M3 2.3(E30) & 116i(F20)

:0:0

間中可以見到facebook group或汽車討論區，有鍾意新車同舊車嘅fans，為咗自己嘅玩車「理論」或睇法，同其他巴打鬥咀，有時甚至講到爆粗收場。講真吖，喺fb、WhatsApp group嗌交最無謂，啱就嗲多句，有feel大家出嚟夜車糖水局，嗰晚撞啱夠「乾淨」嘅，走轉新界先返屋企囉。sponsored 若果發現有啲友仔自戀狂、句句有骨、不懷好意玩針對，又或者處處R著數，唔熟唔食，咁嘅格局同人腳，還是盡早疏遠或「退場」。睇得正面啲，今日唔啱傾、冇偈傾，唔等於以後冇機會再做朋友嘅！男人堆，小器多事八卦嘅程度，往往比女人堆勁二三千倍。講返文首所講嘅新車fans同舊車fans，有時喺「悍衛」自己玩車理念上太過用力，太過投入，不自覺將自己放喺某一陣營。其實，好多玩舊車嘅巴打，都有買新車；覺得新車萬歲嘅，亦可能有一部半部（同朋友夾份）嘅Young Classic。如果因一時之氣，搞到以後睇事物都係非黑即白，敵我分明，咁就真．戇居喇。

sponsored 最近有寶馬車主PM我哋，話佢屋企擁有一部左軚E30 M3 2.3北美版（以下簡稱M3），亦有一部今代1系嘅116i自動波版作平時代步。佢話擁有咗呢兩部車一段時間之後，發覺116i喺高速公路嘅加速表現（介乎80km/h至110km/h），感覺上好似同M3好接近，有時揸落更好似快過部M3。車主問我哋有冇興趣feel嚇兼一齊吹嚇車經。好喎！其實，近一年，德國及英國幾本著名老爺車雜誌，都製作咗唔少Young Timer/Young Classic與現有發售車系比拼嘅專題，搵啲來自同廠，不同年代、相近車系、相近檔次/價格、相近重量或相近馬力嘅型號對比，分析嚇揸新舊車嘅得著，同埋睇睇車廠喺近二三十年製車技術嘅轉變，有冇邊啲特色仍然被保留。sponsored

老實講，MenClub想搞呢類故仔好耐，有巴打主動邀請，仲要係咁受歡迎嘅E30 M3，梗係lur飯應啦！因左軚車關係，呢部E30 M3 2.3每次出街都要向運輸署申請「老爺車行駛許可證」，而呢類許可證，一年只可以使用12次，每次有份駕駛嘅司機都要購買第三者保險（包括筆者）。申領許可證嘅車輛不須掛車牌，唯車主須在出車期間帶備許可證及相關第三者保險嘅副本，以供警員查閱。

sponsored 講返正題，MenClub最初聽到車主上述嘅發現都覺得怪怪哋，亦有質疑過呢位巴打係唔係有「幻覺」咋！畢竟當年嘅M3 2.3北美版，最大馬力有成195匹，峰值扭力亦有23.5kgm，再睇116i，最大馬力只得136匹，峰值扭力雖然比M3多啲啲啲，但不過係24.5kgm。講嚇普羅車迷都會第一時間望嚇嘅0至100km/h時間，M3隻需6.9秒（該時間以北美常見嘅0至60哩，即約0至96km/h計算），116呢？9.1秒，差好遠喎。

車重方面，M3淨重為1296kg（德制），116i自動波版淨重為1310kg（德制）......咦！望望嚇兩部車嘅specs開始有啲相近喇。 sponsored MenClub向德國慕尼黑BMW Historical Archive部門，查詢M3喺80km/h至120km/h嘅加速時間（寶馬多年來都有公布型號喺80km/h至120km/h嘅加速時間，讓外間更了解型號喺高速公路嘅日常中段加速表現，目前德國非Autobahn公路車速上限為130km/h）廠方嘅回覆係7.5秒（4波行車），再睇116i喺80km/h至120km/h嘅加速時間（4波行車），時間為8.6秒，兩者相差約1秒，假設呢部1988年版嘅M3，經過28年後，馬力輸出稍有下降，兩者喺80km/h至120km/h嘅加速時間差距可能會因此收窄，甚至極為接近。所以，車主所指「116i快過M3」，絕非完全無立論基礎。

sponsored

基於合法車速上限原因，我同車主都冇打算喺香港實測80km至120km/h一次，又或「斬件上」，只測試80km/h至110km/h，純粹以體感去feel一feel兩部車。 MenClub喺2014年都介紹過E30 M3，佢所配嘅S14系列引擎，絕對係殿堂級自然吸氣引擎。相比同期嘅平治190E 2.5-16機器，S14喺3000rpm以下嘅低扭真係弱咗啲，完全係「唔踩（踩油個踩）唔得」但咁又有乜所謂，因為一上車，一畀油，呢副引擎嘅靚聲已經好有「摟砌」味道（摟你砌），自3500rpm起「上身」，脫胎換骨，動力質感好實淨，有多少同期嘅M系直六引擎（例如M635CSi或前期型E34 M5）嘅味道，好過癮，但S14嘅表現爽朗活躍得多，唔似得M系直六機器，從3000rpm跑上4000rpm爆發起點，好似要用盡九牛二虎之力。sponsored 我覺得，S14無論喺當時，抑或廿幾年後嘅今日再揸，佢喺寶馬自然吸氣引擎陣營上，都係好肯「跑上跑落」嘅機器。

6000rpm之後，係呢副S14嘅show time，用今日角度，你話佢仲係好大力咩？當然唔係，但由5500rpm起一路踩到7000rpm紅區，動力輸送仍然係好紮實，絕對冇「散散哋」嘅感覺，刻意喺呢段畀油、收油、再急畀油，你會覺得由你大腿input到引擎發力嘅時滯都極之短，大有如腳掌連成一體嘅境界，超正。請恕小弟直言，在我試過嘅E36 M3（包括3.0及3.2）都畀唔返呢種咁特有嘅質感到反應。sponsored S14嘅引擎聲亦係百聽不厭，可能我哋嗰代人中曬澳門東望洋大賽「毒」、廿幾年後嘅今日，有時半夜上YouTube mute住翻睇八十年代尾至九十年代初嘅東望洋大賽，一見到寶馬M3，S14嘅引擎聲自然同步到個腦......舊起點大直路，望住希格（Altfrid Heger）部希爾頓拉花紅色（請代入你最like嘅拉花）M3，由畫面嘅最右邊殺埋嚟再激劈入東方彎.......weeeeeee.......（鏡頭由右急指去左）.......宏宏宏宏宏宏宏，呢嚇「宏」，即使隔咗成個珠江口，亦即使由mono聲道嘅電視傳到耳仔，依然係震撼人心，如現場觀戰。下個鏡頭，準備入葡京灣，「啃、啃、啃」，再加埋M3 turn-in勁sharp嘅入彎動態，你好難怪六、七、八十後嘅男人，會為E30 M3咁癲。

再睇116i，我從來冇因為佢嘅級別，同佢數字上只有136匹就睇少佢，因為，當你試過最新一代嘅118i或寶馬嘅2公升EfficientDynamics Turbo引擎，你知道唔可以再用老一套睇今日最新嘅科技。上文提過116i嘅峰值扭力比M3多1kgm，有24.5kgm，再睇116i自動波版規格表，峰值扭力輸出範圍由1500rpm至3000rpm（棍波由1350rpm-4300rpm），即係話千零兩千轉已經畀曬最大力你。無可否認，喺0至100km/h加速，116i只能睇到M3燈尾，但喺慢彎多嘅山路，116i加埋8前速自動波，再轉去Sport Mode，你真係唔可以當佢「流」。

就算讓你叔父輩M3行先，我116i轉個頭可以篤住你車尾。唉！即使昔日最鋒利嘅刀從沒生銹，但遇上呢啲1.6直四加隻魔鬼Turbo同有8隻波嘅怪物，都咪話唔驚。論聲，唔好意思，聽到嘅都係納悶嘅blublu....blu Turbo引擎聲，不過，踩到5000rpm，仍然隱約畀到啲寶馬高質素直四味道你，動力嚟得好結實，震盪好低，高轉絕對冇「散散低」，寶馬從來唔會大大聲話自己喺邊度邊度搞咗好多balancing嘅工序，但喺入門車系嘅入門級別都能感受到佢哋高水平嘅引擎機械工藝，即使唔係「寶馬粉」，都會對佢哋肅然起敬。

28年前，E30 M3係寶馬嘅天之驕子，到今日再揸呢款車，佢嘅底盤同車架仍然好紮實，喺當年嚟講，車重1296kg嘅M3，絕對唔算係好輕巧，畢竟寶馬喺呢款高性能街車做咗好多底盤樑桿嘅補強設計。喺山路揸，部車嘅剛性，當然及唔上116i，呢樣冇得拗。但要留意，M3隻係比116i輕咗14kg，但揸落絕對有身輕如燕同高度靈巧嘅magic感覺，其實你扭多幾隻窄彎同大彎，已經可以清楚feel到M3成部車好平衡，turn-in好sharp，你會覺得自己好似識飛咁！而且，M3嘅轉向、軚感都極之豐富，回饋力度亦不重不輕，啱啱好。唉！點解而家啲寶馬造唔返呢隻feel呢？

116i車長4324mm，只係比M3短咗22mm，但現今嘅製車科技大幅進步，116i可以有多達2690mm嘅軸距，反觀M3，只有2563mm，當然啦，兩部車嘅設計出發點同功能面所佔嘅比重都唔同，好難咁點對點比較。116i嘅軚感，實在難以同那些年嘅E30 M3相題並論，始終進入咗電軚（電力輔助轉向系統）年代，手掌已無可能feel到最真實直接嘅路訊，但係，轉向嘅準繩度一定比以前更高，事實上，1系係我覺得巿場上少有轉向咁精準嘅大眾化掀背車，你唔需要刻意部署，順住個心所想扭軚，行走嘅線位已經相當靚。116i嘅懸掛緩震表現同車廂抑噪表現都極佳，應該咁講，好多德國掀背車嘅入門級別，例如A3或Golf，佢哋都會採用行程相對地長，彈簧相對地軟嘅懸掛設定，我記得約9年前在《人車誌》（Car & Driver）工作時，揸過一部極原裝嘅E30 M3，懸掛都有呢種咁supple嘅感覺，同E46年代嘅M3，完全係兩碼子嘅事。

E30 M3喺未來嘅10年，相信仍然會係經典，但隨住汽車科技愈來愈發達（例如碳纖維大量生產成本下降及廣泛應用），同車迷世代交替，元祖M3仲會唔會咁多人當佢神咁拜？116i雖然曾經係本港有售嘅寶馬汽車之中最平嘅一款，但咁又有咩所謂，你仍然可以輕易喺呢部車，發現到寶馬喺製作FR車嘅高水平工藝，動力數字唔搶眼，但揸落好鬼開心，絕對「超乎你所想」。常說下一代1系會轉向前驅底盤，換言之，FR不再，買唔起動輒三、四十萬嘅E30 M3，自問「冷氣凍醒目自動波」才是你杯茶，好應該嘭嘭聲買部118i（116i流通量相對少好多），買嚟儲又好，用又好，玩又好，仲係後生嘅，梗係揀6速棍波啦。