演唱會之父張耀榮心臟病猝逝

:0:0

【太陽報專訊】「香港演唱會之父」張耀榮昨日淩晨猝逝，享年82歲，其子張永康及女兒張麗芳表示父親走得安詳，又稱相信父親遺願是繼續經營耀榮娛樂公司：「帶多啲娛樂畀香港人。」至於張國榮前經理人陳淑芬則表示，前日才跟張耀榮一起吃飯及合照，想不到分開不足6小時即「天人相隔」，她又稱對方是「黃大仙」，有求必應，為香港孕育出不少天王巨星。

張耀榮於昨日淩晨3時許在九龍塘寓所被家人發現於床上昏迷，經救護車送往廣華醫院搶救後不治，享年82歲。其家屬趕往醫院，聞死訊後表現傷心，有親友更一度激動得跪拜痛哭。其長子張永康和在耀榮娛樂有限公司任職董事總經理的女兒張麗芳，昨午神情哀傷於九龍塘大宅門口會見記者。

傷心震驚
張永康講述父親離世經過，並表示他一向有心臟病。張麗芳接着表示於昨日淩晨一時許：「係佢瞓咗落去之後，突然彈起身話抖唔到氣，平時佢都有暈嘅情況，咁大家幫佢捽吓藥油，佢話好似舒服咗喇，又瞓番，之後媽咪見佢好似冇乜嘢都瞓啦，中間一路用手摸摸佢額頭，睇吓有冇事，大概3點幾Feel到佢標緊冷汗，好似唔係好大反應，即刻Call曬啲阿哥上咗嚟睇一睇佢，即刻Call咗白車。個人冇咩反應，但都OK有呼吸，白車送咗佢去廣華醫院做急救，廿分鐘度就已經同我哋講話過咗身，其實都好突然，唔係好知發生咗咩事。」

張麗芳又表示會繼續運作公司：「耀榮娛樂係由佢一手一腳帶演唱會呢個趨勢出嚟，佢都希望張家嘅人可以一路做落去，所以我呢幾年都返去公司幫手，所以我諗佢遺願係希望我哋可以Keep住做耀榮娛樂，帶多啲娛樂畀香港人，係我Daddy最想見到嘅嘢。張生好鍾意熱鬧，做嘢做足110分。佢都（行）得幾安詳，幾舒服，所以都算係好事。」另外，兩人表示父親身後事會採取佛教儀式。而母親則在家中休息，需要時間接受這噩耗。

跟張耀榮相識多年、張國榮生前經理人陳淑芬坦言感到非常傷心：「一時間無法接受，感到很震驚及難以置信，因昨天（前日）中午我們與演出業協會開會並一起吃午餐，餐後更愉快合照留念。晚上應拉姑（狄波拉）N年前之約，一起共進晚餐，席間張生談笑風生，大談往事，心情胃口都很好，想不到分開不到六小時已天人相隔！」

她又指跟張耀榮於80年代初相識，並大讚對方如「黃大仙」般有求必應：「無論是巨星或是明日之星，有求必應，早期演出市場未成熟，就係呢位黃大仙，不論輸贏，乜嘢演出都肯出錢出力去做，這些年，孕育了不少天王巨星，培育咗香港演唱會市場，影響整個華人社會嘅娛樂事業。」

永遠懷念
另外，英皇集團老闆楊受成透露得悉消息後，曾與張太聯絡：「張太話張生尋晚（前晚）先同狄波拉食飯，之後返屋企仲話要睇埋錄咗嘅TVB劇，一點鐘瞓覺覺得唔舒服，走嘅時候前後隻係兩個鐘。」兩人最後一次見面是在容祖兒演唱會尾場，當時還一起聊天，不覺得他有異樣。
而不少圈中殿堂級歌手都曾跟張耀榮合作，許冠傑下月舉行的演唱會張耀榮亦有份主辦。身在上海的他大感惋惜：「我同耀榮叔識咗好耐，我第一次紅館演唱會係佢主辦，佢對香港演唱會呢個行業有好大貢獻。聽到佢離世消息，感到好傷感。希望佢家人節哀順變，我喺上海呢度遙遠祝福佢同佢家人。」

而徐小鳳坦言對消息感到很突然，因上次開個唱時對方還好精神，玩得好開心。至於林憶蓮則表示當年她第一個演唱會就由張生主辦：「張生個人好風趣、健談，佢對樂壇貢獻好大，對佢離世好惋惜，我會永遠懷念佢。」

至於張學友昨日出席活動時慨嘆：「真係好可惜，佢係演唱會嘅『象徵』，見證住香港演唱會嘅發展，而且貢獻好大，依家好似少咗股力量。」談到對張耀榮的印象，他說：「佢講嘢好乾淨，好爽快。我第一個演唱會，同埋呂方一齊嘅演唱會都係佢搞，最後一次見，應該係喺阿梅（梅艷芳）個紀念活動上。」

而十分尊敬張耀榮的黎明表示，相信每位和張生在紅館合作過開演唱會的歌手，都會對這位長輩很懷念，大家不會忘記張生給香港演唱會帶來的貢獻。另外，汪明荃昨日亦在微博留言悼念張耀榮，感謝他對樂壇的貢獻。

[圖擷取自網路，如有疑問請私訊]