【多片】細數00年代歐美樂壇天后　集體回憶即刻返哂嚟！

:0:0

千禧年代出道嘅歐美女歌手多到數都數唔哂，不過當中可以令大家留下深刻印象嘅又有幾多個呢？以下呢啲歌手相信大家就算未聽過佢哋個名，都一定會聽過佢哋嘅歌，甚至間中會特登拎返佢地啲經典歌出嚟聽添！
Cap嚟見我
盤點00年代歐美樂壇天后一聽到呢啲歌集體回憶即刻返哂嚟

00年代出道嘅歐美女歌手當然唔止得Avril Lavigne一個啦！即刻同大家一齊黎盤點00年代紅極一時嘅歐美樂壇女歌手！
1. Michelle Branch

提到00年後出道歐美女歌手，不得不提一定係Avril Lavigne……仲有被視為Avril Lavigne死對頭嘅Michelle Branch，當時兩位創作女歌手人氣一時無兩，Michelle Branch仲被Madonna力讚，歌路又同Avril Lavigne一樣樣，當年都好受歡迎㗎。

Michelle Branch除咗呢啲舊歌之外，近年亦有回歸樂壇出新歌。

2. P!NK

其中一個由千禧年紅到今時今日都仲紅緊歐美女歌手一定有P!NK份。P!NK唔單止唱得，近年嘅演出仲次次都帶到驚喜比大家，吊威吔飛來飛去之餘，仲喺MV或者現場演出加入現代舞元素，難怪到依家都keep住咁紅啦！

3. Kelly Clarkson

Kelly Clarkson曾經參加美國選秀節目《American Idol》，並以首屆冠軍姿態出道，歌藝絕對係不容置疑。雖然依家嘅Kelly Clarkson身材脹爆，不過一樣有勁多粉絲，不如一齊黎聽吓佢嘅代表作吖！

Kelly Clarkson近年都有唔少好歌㗎！

4. Ashlee Simpson

千禧年代由Avril Lavigne帶起一股pop rock潮流後，當時唔少歌手都緊隨佢步伐，走比較搖滾嘅路線，好似Ashlee Simpson就係其中一位啦！可惜咪嘴事件搞到佢形象同事業一落千丈，連帶歌功都被質疑。無論你鍾唔鍾意佢把聲，佢嘅歌當時都幾膾炙人口㗎！

5. Hilary Duff

Hilary Duff以清純形象出道，當年都迷倒唔少粉絲㗎。出咗幾首純情嘅少女歌之後，亦好似Avril Lavigne、Ashlee Simpson咁樣推出搖滾歌。當時經常被批評身材過瘦嘅Hilary Duff，近年亦都避唔過身材發福嘅命運，不過就有粉絲認為佢依家嘅身型，比起出道時嘅佢健康得多。

入行時走純情路線嘅Hilary Duff，近年無懼身材有啲啲發福，走性感路線。

6. Amy Winehouse

騷靈歌手Amy Winehouse年僅27歲，只推出過兩張專輯已經升格國際巨星之列。可惜天妒英才，正值事業衝刺期嘅佢2011年被發現暴斃於倫敦寓所。雖然Amy Winehouse負面新聞多到不得了，又傳吸毒又被控傷人，不過佢嘅好歌同靚聲就肯定係無得彈。

7. Alicia Keys

R&B天后Alicia Keys從一出道已經擠身實力天后之列，擅長創作之外仲有一把得天獨厚嘅好聲音。近年不時都素顏現身大小活動嘅Alicia Keys雖然標榜賣歌唔賣樣，不過睇真啲佢外貌都絕對唔係樣衰嗰啲嚟㗎！

8. Avril Lavigne

Avril Lavigne簡直係00年代代表歌手之一，punk punk地嘅造型加上rock rock地嘅歌奠定咗佢pop rock princess嘅地位。2014年患上怪病嘅佢經過長達三年嘅療程終於死過翻生，重新回歸樂壇帶嚟佢嘅新歌，令眾粉絲個個都好興奮呀！

近年Avril Lavigne亦有同日本樂隊ONE OK ROCK合作。

不如順便重溫吓Avril Lavigne嘅經典歌啦。

Cap by：東方新地

[圖擷取自網路，如有疑問請私訊]