葡萄兄弟嘉穎做老襯　唐文龍趕撻Ruby劉依靜

:0:0

48歲寡佬唐文龍，上月參加好兄弟鄭嘉穎峇里的婚宴，酸溜溜表示自己仲未有著落：「眾兄弟都祝福我係下一個！我都想！」言猶在耳，原來唐文龍已趕撻開PR公司，曾介入周永恆趙頌茹婚姻的小三Ruby (劉依靜)，更愛得癡纏，即使超強颱風「山竹」殺到亦連日頻密約會。對於撻著唐文龍，Ruby坦言：「性格夾唔夾，要了解吓先！」兼大讚唐文龍係好男人，但一提賤男舊愛周永恆即刻落晒閘：「佢不值一提，當發場噩夢！」明顯要同賤周劃清界線！
唐文龍獲兄弟鼓勵Cap嚟見我
拍完《溏心3》人氣急升，唐文龍被封男神筍盤，先後被拍到約會十億有錢女黃文意，又指撻著打女楊柳青，但原來通通係冇米粥，上月參加鄭嘉穎婚宴，更開到口想在兄弟中下一個結婚。據知情者透露：「文龍好羨慕嘉穎同Grace拍拖三年就修成正果，佢話自己仲冇著落，班兄弟咪鼓勵佢，話只要緣份到，可能下一個就係佢。佢不知幾受落，睇得出佢好恨快啲成家！」原來，唐文龍已成功撻著女公關新歡，曾介入周永恆趙頌茹婚姻的小三Ruby (劉依靜)。
本來大纜扯唔埋，不過一次友人飯局就將正氣型佬唐文龍同Ruby劉依靜拉埋。據知情者透露：「Ruby覺得文龍好博學，同佢一齊有好多話題，文龍好鍾意研究電影，咁啱Ruby又鍾意睇戲，加上嚟緊Ruby公司會投資搞環保塑膠生意，文龍係支持環保人士，所以成日搵文龍攞意見，佢哋真係好投契！」

唐文龍曾公開擇偶條件，對象要白淨有肉地，咁大眼睛皮膚白滑有身材的Ruby又真係啱晒唐文龍杯茶。當日撐完枱腳離開餐廳，唐文龍更曾輕扶Ruby纖腰，相當細心。心花怒放日前本刊獨家斷正二人到尖沙咀拍拖撐枱腳直落睇戲，當日傍晚時分，唐文龍在尖沙咀亞士厘道一間茶餐廳外同友人傾偈，未幾就一個人入餐廳搵了一個隱蔽位置坐低，大約15分鐘後，女主角終於現身，當日Ruby明顯悉心打扮會情郎，甫坐低已經對住男神冧到爆，唐文龍打開餐牌介紹Ruby有乜好選擇，但似乎食物吸引唔到佢，對眼全程望到男神實一實，食物未到，唐文龍心花怒放講唔停，還攞出一本命理書同女方講相學運程，女方就嗒晒糖托住腮聽到入晒神。撐枱腳個半小時，由唐文龍埋單一齊離開，兩人急急腳截的士轉場去黃埔，原來係拍拖睇近期熱爆電影《逆流大叔》。

為免被發現，唐文龍同Ruby前後腳抵達餐廳，曾經錯愛渣男周永恆，Ruby對住正氣的唐文龍已經冧到出晒面，全程對眼好似發光咁望住男方，真係唔使飲糖水都甜到漏！

唐文龍講多過食，Ruby就似足小粉絲托住腮聽到入晒神。

就算食緊飯，Ruby對眼仲係目不轉睛望實唐文龍，睇嚟唐生對Ruby嚟講，真係好有吸引力。

撐枱腳個半鐘，唐文龍埋單同女友Ruby一同離開餐廳。

兩人截的士去黃埔睇電影《逆流大叔》，拍拖節目同一般情侶無異。朝結婚方向熱戀情侶見少一日都心掛掛，翌日唐文龍又再約會Ruby，當日下午一時多，唐文龍揸住佢架落地不久的過百萬波子Jeep，由奧海城寓所出發，先去郵局寄包裹，之後再揸車會合Ruby，Ruby還將兩人撐枱腳的合照，放上IG開心share，只見托住腮的Ruby貼實雙眼含春的唐文龍，就算簡單食茶餐廳，已經有情飲水飽閃到暈！
對於撻著唐文龍，Ruby坦言同對方係好朋友，還大讚對方是好男人：「佢份人好陽光好健康，對人好體貼，亦好gentleman，性格係咪真係夾，就要了解吓先知！」她坦言自己已經三十歲年紀唔細，再拍拖會好謹慎，希望朝住結婚方向搵對象。