收千萬嫁妝朱千雪慳搞峇里婚禮

:0:1

朱千雪係港姐清泉，在31歲生日當天驚爆婚訊，宣布同青梅竹馬顧問醫生男友吳昆倫（Justin）拉埋天窗，將於8月成為醫生夫人的她，同男友由出世一刻已經緣訂今生，兩人除咗門當戶對，更難得係兩人連性格喜好都一致，同樣作風低調樸實，就連辦婚禮亦不愛浮誇，已經得夫家準備結婚厚禮的千雪BB，又獲富貴父親送上千萬嫁妝，雖然「大把」在手，不過千雪BB仍貫徹慳家低調作風，已決定不會在港大搞豪華婚宴，8月在峇里舉行的婚禮，亦只邀請至親好友出席見證分享喜悅；日前，千雪BB同媽咪趕辦嫁妝，母女出巡去買化妝品，務求以最靚一面出席婚禮，身穿熱褲的她神采飛揚，雖然未婚夫未有同行，但準新娘幸福擋也擋不住！
撰文：WT 圖片：IG　、新傳媒圖片
Cap嚟見我
朱千雪慳搞峇里婚禮6月28日31歲生日當天，朱千雪透過社交網報喜，宣布同拍拖五年醫生男友吳昆倫（Justin）結婚，將進入人生新階段的她，開心分享同未來老公仔的愛情故事，兩人愛情源於三十一年前，在同一間醫院相隔三天出世，名副其實緣訂今生。千雪BB的未婚夫Justin，出身於富裕家庭，父親乃香港老牌茶莊「祺棧茶行」的老闆，於中環和灣仔都有門市，多年前更曾任香格里拉集團執行董事，家底豐厚，跟父親經營五金生意的朱千雪，可謂門當戶對。據知情者透露：「Tracy（朱千雪）同Justin（吳昆倫）喺同一間醫院出世，兩家人係世交，成日都會有聚會， Tracy性格純樸善良，好得人鍾意，Justin父母可以話睇住佢大，對呢個新抱仔真係錫到燶，知道阿仔求婚成功不知幾開心，娶新抱仲出手闊綽，講明畀Justin同新抱仔任揀半億物業，話揀喺新加坡定香港都由佢哋揸主意， Tracy出年便會完成城市大學嘅律師博士學位，同TVB合約亦會屆滿，好大可能會隨老公移居新加坡，不過暫時佢哋仲未定長遠計劃！」

朱千雪在31歲生日當天公布婚訊，更在社交網連發多張同拍拖五年男友 Justin到愛爾蘭影的婚照，崇尚簡約的她，未有穿華麗婚紗，只以簡單款式的藍色長裙及喱士裙拍照，貫徹清泉港姐氣質，同老公仔盡顯甜蜜。

8月在峇里舉行婚禮的朱千雪，只邀至親好友出席見證。
揸旗搞婚禮
除了家庭背景襯到絕，兩人愛情修成正果，最重要是兩人無論學歷人品喜好都似到十足， Justin同千雪BB一樣孝順好學，雖然出身富裕卻不靠父蔭，在澳洲讀完醫科，現時在新加坡中央醫院擔任顧問醫生，才華橫溢，難怪成功贏得美人歸。據知情者透露：「千雪BB性格好真，同Justin性格夾到痺，Justin為人低調又好學，待人又夠細心，作為醫生呢方面好緊要，千雪BB就係欣賞男友乜都為人設想，拍拖之後，Justin仲會以女友睇法行先，真係好錫Tracy，求婚成功之後， Justin講明畀Tracy話晒事，想點搞婚禮都得，Tracy覺得結婚係兩個人嘅事，唔需要大事鋪張，加上兩家人都好低調，最後佢哋揀咗喺峇里搞婚禮，只會請至親好友出席見證， Tracy話唔想煩到人，亦唔想老人家頻頻撲撲，所以都唔會返加拿大再大搞，今次會包起當地一間酒店行禮，貪嗰度私隱度高！」

準夫婿Justin在新加坡中央醫院擔任顧問醫生，大婚在即依然非常忙碌，朱千雪則留港與家人籌備婚禮，日前母女出巡辦嫁妝及派帖，孝順女同媽咪邊行邊傾，準新娘更容光煥發，行去邊都特別搶鏡。

婚前1,228萬入市有富爸爸送贈千萬嫁妝，上月朱千雪便用個人名義，以千二萬購入跑馬地老牌私樓山光苑一個600呎單位。

未婚夫搞驚喜雖然一切從簡，但結婚畢竟是人生大事， Justin亦希望為老婆製造最難忘回憶，即使近月人在新加坡工作，仍為婚禮精心安排。據Justin好友透露：「雖然Justin喺新加坡工作好忙，但佢唔會要老婆乜都做晒，反而絞盡腦汁幫手籌備婚禮，仲諗咗唔少驚喜到時氹老婆，不過佢同屋企人已經夾好，一切都要保密，總之就要令Tracy成為最幸福嘅新娘子！」兩家人近日已開始派帖，朱千雪的圈中好友亦陸續收到囍帖，Tracy更細心為參加婚禮的親友安排食宿，其餘裝飾禮服一切從簡，務求應使則使。據Tracy好友透露：「Tracy冇為婚禮揀名牌婚紗，只係揀咗簡約款式，好似之前去愛爾蘭影婚照，都冇著華麗婚紗，連化妝、整頭同攝影師都冇隨行，只係搵好姊妹岑杏賢操刀拍攝，完全唔奢華計較派頭，呢啲慳妹好難得。」而一班索姊妹岑杏賢、湯洛雯、蔣家旻、張嘉兒等亦會飛峇里陪嫁，Tracy更會為姊妹團做紅娘，據知情者透露：「自己搵到幸福， Tracy都好想自己嘅好姊妹快啲有著落，好似岑杏賢、湯洛雯，自從甩拖之後，依家都未有新戀情，Tracy好戥姊妹心急，希望喺今次婚禮嘅浪漫氣氛之下，佢哋可以識到好男仔，所以同老公Justin已經商量好，會介紹老公班醫生筍盤畀好姊妹識，全力幫姊妹製造機會！」
作風低調的朱千雪，極少將家人面貌曝光，曾經話過有兩個靚妹妹的她，當日疑似兩個細妹都有同行。

手持六千萬物業為賀愛女踏入人生新階段，朱爸爸已準備千萬嫁妝送嫁，鑽石金器唔少得外，更會送物業給愛女；向來主張揸磚頭的朱爸爸，其實早在Tracy 19歲時，已經送贈小西灣藍灣半島及愉景灣兩個物業給女兒揸手，之後Tracy再購入多個工廈單位，今年七月宣布婚訊後亦有最新入市，以千二萬購入跑馬地老牌私樓一個600呎單位。據知情人士說：「由細到大，Tracy父母都好節儉，教導三個女應使則使，又教佢哋理財儲蓄，又鼓勵啲女儲磚頭保值，喺Tracy 19歲成年之後，已經買咗兩個物業畀佢揸手，雖然細細個已經咁富貴，不過得父母教女有方，Tracy一直都好慳家，生活好貼地，入行之後，都冇變大花筒追求名牌，Tracy一路都有個習慣，就係每個月一定會將收入一半儲起，剩低嘅一半亦會盡量只用二分一，咁多年嚟都冇變過，就算近年搵多好多，佢都只會愈儲愈多，儲到足夠嘅錢就會買磚頭，高峯時就試過擁有七個物業，賺過二千幾萬，依家手上仲有四個物業，加埋新買嘅山光苑，就有三個住宅單位同一個工廈單位，市值約6千萬！絕對係小富婆！」

有美貌有學識又有智慧的千雪BB，入行以來都保持親切待人態度，見到記者即友善打招呼。

結婚在即，當然要為扮靚做足準備，朱千雪當日就不停睇香水和化妝品。

母女辦嫁妝婚禮進入倒數階段，忙派帖之餘朱千雪日前就同媽咪趕辦嫁妝，母女行街購物非常開心，同行還有疑似是千雪曾提及的兩個靚妺妹，四人邊行邊講笑，期間朱千雪就不停揀香水和化妝品，相信是為婚禮做準備。而另一日，千雪則一個人出動，向來慳家的她，去咗平民時裝店睇衫，見到啱嘅即拼埋身，不過，慳妹並非浪得虛名，拼完一輪都忍手冇買，只行去Counter取回之前訂好的衣服，攞住一個小盒的她行去買咖啡飲，貼地女神真係時刻都咁吸引！

跟未婚夫Justin青梅竹馬，兩人三十一年前在同一醫院相隔三日出世，當年兩小無猜時已經襯到絕，緣訂今生令人羨慕。

忙於籌備婚禮的朱千雪，早前一個人去咗連鎖時裝店睇衫，雖然家底豐厚，但當日千雪 BB揀衫時卻諗過度過，而且好忍得手。

神釆飛揚準新娘朱千雪發揮慳妹本色，拼完一輪都忍手冇買，之後只去Counter取回之前訂咗的衣服。

攞住戰利品的朱千雪，去咗買外賣咖啡，即將做人妻的她，更是神釆飛揚！

慳妹再冇下場節目，自己揸車返回小西灣寓所，連座駕都係揸咗幾年的舊款Benz。
節目爆人生信念朱千雪在《如果這樣生活》節目中，表示都市人愛追求物質，但她就嚮往簡樸生活，覺得只要堅持信念，生活已可以好滿足。

好學不倦的朱千雪，15年放下如日中天的事業去讀法律，更以九個月速成原本兩年的中文大學企業傳播社會學系碩士學位，翌年再緊接在香港城市大學修讀為期三年的法律博士學位，還有一年才正式完成博士學位課程。

12年參加香港小姐選舉的朱千雪，一直是佳麗頂頭大熱，不過，該屆首度推行民選港姐，可惜投票一刻冧 Server，令大熱千雪 BB敗給張名雅及黃心穎，只能屈居季軍，但深得民心的她，就比兩人更受歡迎。

有演技又有觀眾緣，朱千雪16年憑《EU超時任務》，在《萬千星輝頒獎典禮》同王浩信奪《最受歡迎劇集拍檔》。