肥媽出招狙擊鼎爺　網民：唔想睇你求祈撈埋當煮餸

:0:1

肥媽Maria Cordero由有線教煮餸開始，吸納了一批師奶fans捧場，去到無綫再拍《食平D》系列，拍住契仔六號(陸浩明)本來風平浪靜。點知16年無綫推出由李家鼎主理的《阿爺廚房》，鼎爺憑住出色的刀功與烹飪技巧極速被捧為新廚神，名利雙收。風頭與fans都被搶，向來獨大的肥媽當然心感不爽，去年《阿爺廚房》決定今年再添食，肥媽主動要求再拍《食平D》第七輯，誓與鼎爺睇齊，更暗地裡狂冧贊助商，肥水不流別人田。為免有比較，肥媽更拒絕與鼎爺同場合作，實行有你冇我！
肥媽唔執輸添食Cap嚟見我
肥媽加盟無綫前，在有線電視主持了多年美食節目《肥媽私房菜》，至12年帶住六號(陸浩明)為無綫主持《食平D》系列，分別是《食平D》、《食平DD》、《食平3D》、《暖DD食平D》、《今個夏天食平D》和《阿媽教落食平D》，第七輯《食好D食平D》正在拍攝中，據知肥媽自動波添食，全因唔抵得李家鼎的《阿爺廚房2018》載譽歸來。

見鼎爺廚房再出擊，肥媽即搶先添食，上月第七輯《食好D食平D》已開拍，先聲奪人。

肥媽曾表示不擔心會與鼎爺比較，力sell自己的賣點是方便、便宜的師奶菜，不過自鼎爺的出現，她即被指煮嘢好求其。

做完節目鼎爺即爆紅，無綫亦食過翻尋味，原決定今年5月再拍攝新一輯《阿爺廚房》，但最近收到通知延遲至年尾才開拍。碼實贊助商知情者透露：「呢幾年肥媽幫無綫拍咗咁多輯節目收視同口碑都好好，令佢成功建立師奶廚神形象，點知鼎爺一出，好多師奶fans都轉軚，網民亦一面倒撐鼎爺係真功夫。正所謂多隻香爐多隻鬼，肥媽不知幾唔happy，之前有監製提議搵佢同鼎爺嚟個crossover，肥媽一口就拒絕咗，佢話大家風格唔一樣，總之就各有各做。之後見鼎爺拍新一輯，肥媽亦唔執輸，即時同高層講佢都開拍新一輯，唔想連唯一嘅山頭都畀人搶埋，仲親自同啲廣告商傾贊助，講明只可以贊助佢一個節目同埋喺佢個時段賣廣告。」

肥媽與無綫已合作六年，《食平D》系列長做長有，上一輯開始教人用電飯煲煮簡單菜式，而契仔六號就繼續被她點到暈。

多年來肥媽得到唔少廣告客戶支持，節目亦有唔少植入式廣告，有指她落力碼實客戶只贊助她的節目，以免廣告被搶。

鼎爺拍譚玉瑛姐姐大受歡迎，與肥媽、六號呢個契母子組合都有各自的捧場客。

不過網民就一面倒撐鼎爺有姿勢有實際！

同行如敵國肥媽眼紅鼎爺都好正常，鼎爺在圈中捱足幾十年，突然揸刀被封廚神，開私房菜日日爆場要預約幾個月，廣告代言及商演都應接不暇，身家暴漲又買樓贈女友。早前談到鼎爺主持的《阿爺廚房》大受歡迎，肥媽會否怕被比較？肥媽說：「兩樣嘢嚟，冇得比。鼎爺講古法同刀工，你喺屋企食飯，阿媽會唔會喺條魚上面放多舊魚吖？」似有弦外之音。肥媽與鼎爺走嘅路線唔同，烹飪技巧亦各有千秋，不過始終一山不能藏二虎，仲要有一隻係老虎乸㖭！