中學教師設「部隊」玩批鬥　學生遭公審侮辱如置身「集中營」 | 真心膠 | 膠Hub

:0:1

今時今日嘅香港教育界真係千瘡百孔，又千奇百趣！今日有報導指裘錦秋中學（元朗）一位教師竟然「總司令」上身，私自設「品德培育精鋼部隊」，將「唔聽話」嘅學生「入伍」批鬥，以改善欠交功課、儀容唔整潔等行為，「被選中」嘅學生慘遭公審、侮辱，儼如置身「集中營」一樣！
撰文：B｜圖片：劇照、學校官網
閱讀全文
中學教師「總司令」上身　設「部隊」批鬥學生該校一名家長向報章爆料，指「總司令」當正學生係犯人咁公審，又經常唔合理咁懲罰、侮辱學生，令到受害學生擔驚受怕，回家後仍悶悶不樂！該名家長又喺學生嘅書包發現一封寫有「品德培育精鋼部隊的部隊執行令」嘅信，由「部隊總司令」發出，信中要求學生出席「紀律聆訊會議」，又形容呢個活動係「高度機密」，嚴禁向他人透露，否則又要受罰！呢位學生因欠交功課而被徵召進入「部隊」，期間被要求拍片認錯，並且喺其他同學面前播放，如同公審，令人感到受辱同埋難堪，事後仲要俾同學嘲笑！搞到受害學生唔想返學，甚至想輕生！

（電影《逃學威龍》劇照）

（電影《逃學威龍》劇照）校方暫停「總司令」輔導工作該校溫姓副校長接受傳媒查詢時，指設立「部隊」一事未經學校批准，校方亦認為「部隊」嘅做法唔恰當，又擔心事件會影響學生情緒，已經停止「部隊」運作，該教師嘅輔導工作亦已被暫停。校方表示亦希望受影響嘅學生主動同學校聯絡，學校會安排社工同埋輔導主任幫助，保證唔會對學生秋後算帳。溫校長又指，涉事教師本意係想學生改正陋習，拍片嘅目的係希望學生親自講出改善方法，以及向家長表示感恩，並非刻意要侮辱學生，不過用錯方法﹐最終演變成今日嘅局面。