對面屋黎左個一樓一，我日日都去攪下佢

:0:0

你哋可以叫住我陳家強先。半年之前，我仲係二十九歲，有一個好好好好嘅女朋友，一切都安安穩穩。亦都就係半年之前，我對面屋嚟咗個一樓一。

事情是咁的：我住唐樓，嗰到連LIFT都無，係要行樓梯上去、牆身剝落、樓梯霉霉爛爛嘅嗰種唐樓。但最緊要都係五臟俱全，租金唔貴。一梯兩伙。對面屋丟空係七個月前左右嘅事。對面屋原本住咗個Hi Hi港女，係齋睇佢樣都知佢個閪好向左走向右走Seven臭嗰種。雖則我講就咁講佢，但我個人好少理佢，平時都無咩機會見到大家，畢竟佢個閪臭唔臭都好我都無份Hi，唔理得咁多。吖，點知畀佢吊到隻金龜，可能條矇向左走向右走急住帶條女返屋企Hi，所以九秒九就幫咗佢搞曬啲手續搬走。而包租婆都好快咁就搵到個新租客返嚟。包租婆係個爆炸髦毛阿嬸，一講嘢就好嘈好大聲，仲夾雜少少鄉音。佢前面有隻牙崩咗，鑲咗隻金牙。爆炸髦毛金牙阿嬸，我平時認人好差，我會咁樣認佢。

我同包租婆其實無咩兩句，佢做啲咩啊、之後有啲咩人會搬入嚟我都無咩點問，總之我準時交租，你唔好搞到我。我只有一個人住。由中七開始我就一個人住，一直去到依家。唔好意思，依家我入返正題，我講返半年之前先。嗰日下晝無啦啦有人拍我門。我去打開木門，第一眼就見到個爆炸髦毛。我：「點啊包租婆？」

佢笑嘅時候露咗排金牙出嚟。我哋中間隔住一道鐵閘。包租婆：「陳生啊，即係咁啊……」佢對上一次恭恭敬敬咁同我講嘢，係佢個仔有功課唔識要搵我教佢嘅時候。

我：「做咩事？」包租婆：「主要都係通知返你，遲啲會有個新租客搬入嚟啊……」

我：「嚇？」我之所以「嚇？」並唔係因為唔知道一間吉屋一定會有新租客搬入嚟，只係上一手個亞太區有一天成為亞太區港女搬入嚟嗰時，包租婆講都無同我講過。

我：「哦。」

包租婆呆一呆。

我：「好啊，唔該。」我一隻手禁住門柄，已經準備閂門咁濟。包租婆喺鐵閘啲空隙到伸隻手入嚟，一手頂返住道門。

包租婆：「如果你到時可能會有少少唔方便，可以同我講，希望你唔好介意。」

我心諗，可以有幾唔方便啊？唔通係租霸？定抑或係啲Hi Hi鄰居？我好奇心慢慢咁湧緊出嚟。

我：「咩人嚟嫁？唔會搞到我家嘛嚇話？」包租婆招牌金牙笑容：「唔會嘅唔會嘅。」我見到佢疾咗疾。

包租婆：「可能係行出行入有啲唔方便啫。」我又心諗，唔通佢要門口擺嘢？諗諗嚇我都皺曬眉，覺得要即刻言正辭嚴返啲。

我：「走廊唔可以擺嘢嫁喎，咁走火警好危險家嘛。」

包租婆：「唔係唔係！唔會阻到走火警嫁！」咁仲有咩好阻啊？

包租婆：「係會比較多人啲啲。」哦，多朋友啫。我都聽過依家好多人鍾意夾份租間屋嚟瞓嚇啊、做嚇私人空間咁。香港土地供應問題吖嘛。

我：「哦，咁啫，咁無所謂啦。」

包租婆：「真係無所謂！？」

我點點頭：「無啊，有咩所謂。」

包租婆：「哈哈哈哈！依家後生仔明白事理真係好。」雖然我唔知佢有咩咁值得笑，不過我都勉強陪嚇佢笑。

我：「哦，係啊係啊，哈哈哈哈。」

包租婆笑笑口：「好啦好啦，咁陳生啊，我走先喇，唔阻你喇，哈哈哈哈，我都要返去準備煮飯喇。」

我：「哦唔緊要唔緊要，要包租婆你特登上嚟，邊到阻呢。」

包租婆：「吖，依家啲後生仔咁識講嘢。」之後佢就繼續「哈哈哈哈」住咁走，笑聲越嚟越細，佢應該已經落咗樓，搭的士返咗屋企。

包租婆咁有錢，邊會住喺依啲爛鬼唐樓到吖。佢嘅依段說話，真係要依家諗返起先至會覺得有意義。嗰陣，我完全無當係咩一回事，更加唔會覺得包租婆上一上嚟講兩句就會變成我人生嘅分界咁誇張。可能正如STEVE JOBS話齋，你永遠無辦法知道人生當下嘅一點一滴有咩意義，但時間漸遠，時間自己就會慢慢將依啲點滴串連起嚟。之後我喺屋企一直做嘢做到夜晚。做到肚餓，我就會落街買一盒燒味飯。如果琴日食咗叉燒，我今日就會食油雞；如果食咗油雞呢，我今日就會食切雞；如果食咗切雞，我就會食鴨。永遠唔會同二十四個小時之前重複。因為根據24小時消化嘅定律，只要一日之內唔食重複嘅嘢，我身體裏面就會同時存在兩種或以上嘅食物，形成雙併效果，唔洗加錢。

我今日食叉燒。食完我就繼續做。將飯盒掉到廚房嘅垃圾桶裏面。垃圾桶裏面嘅飯盒積積嚇就越積越高。屋企無開燈，我慣咗做嘢嘅時候只係開一盞檯燈仔，屋企好暗。我抆起垃圾袋，綁好結，拎出嚟。著好拖鞋，十一月天氣有少少風，我著多件風褸嘢就打開門，行落樓下嘅大垃圾桶到掉垃圾。依幢唐樓正正夾喺另一幢唐樓同另一幢唐樓中間。一排幾幢都番新緊，外面都搭曬棚，除咗門口密碼位同大閘裏面有光管照明之外，門口到整條街幾乎都漆黑一片。我穿過竹棚嘅陰影。

sponsored

啱啱落完雨，啲雨水仲跟住竹棚一滴一滴咁滴緊落嚟，仲未滴乾。沿途我見到一個女人。佢拖住行李，帶住個細路女，慢慢行入幢唐樓裏面。佢長頭髮，著白色背心恤衫、緊身長牛仔褲、高踭鞋。個樣肯定唔係嗰啲廿幾歲靚妹。佢係一個女人。可能三十頭、三十中？佢皮膚好好……又可能有化妝？嗰陣夜晚太黑，我唔肯定。肯定嘅係佢的確吸引住我，佢好似感覺到我望實咗佢，佢回頭望咗我一眼，又轉開，繼續行上唐樓。佢無再理我。我睇女人嘅口味，由中學畢業之後就一直轉。當初鍾意埋啲中學女神，全部都細細粒粒得得意意；慢慢人大咗，就開始睇波、睇腳；去到依家，我最鍾意嘅係胡定欣，佢散發嘅係女人味。我第一次覺得被人真真正正咁「吸引」住，就係因為見到胡定欣，嗰陣好似做緊唔知邊套電視劇嘅宣傳，我喺某個商場見到佢真人，亦都係嗰一刻，我知道到自己身體裏面嘅某個部份己經靜靜地起緊革命。去到二十九歲，先察覺自己快將三十。

對母女經過我，繼續行。細路女一路拖住媽咪，一路對眼都水汪汪咁望住我。佢紥住條馬尾，對住我微笑，瞇起眼。佢同我揮手。我擰轉頭，離開咗對母女。然後我電話就響起，係我女朋友打嚟。大家可以叫住佢詠文先，全名張詠文。

我：「喂？」

詠文：「喂。」我一邊膊頭夾住電話，一隻手打開個大垃圾筒。我掉完垃圾，閂好大垃圾筒蓋，呯一聲——除此之外咩聲都無。我哋靜咗好耐。

我：「做咩啊？」

詠文：「你聽日得唔得閒？」

我：「嗯？」

詠文：「有樣嘢我想搵你傾嚇。」我大約知道咩事。嗰排因為佢阿媽，搞到我哋都唔太開心。

我：「關於伯母？」詠文：「嗯。」我都唔知可以點做，唯有苦笑下算數。

我：「哈……咁睇嚟佢都真係幾唔鍾意我。」

詠文：「對唔住，嗰日搞到咁。」

我：「都唔關你事嫁啦，算啦。」我掉完垃圾之後無即刻返轉頭，反而兜咗遠路，一個人揸住部電話係條街到周圍走。走咗去馬路邊，走咗去便利店，行入商場，出返嚟，漫無目的。我經過好多人。

我：「唏，可能佢話得我啱呢。」我又無車又無錢，屋企連人都無，自己搵錢已經唔係多過人，住都係住爛鬼唐樓，仲要係租返嚟嘅。

老實講，我環境差過MK仔，仲要唔靚仔，佢阿媽會唔鍾意我都好正常。便利店裏面有賣可樂、賣糖、賣酒、賣套、賣煙。以前食開黑萬，七年前戒咗，因為詠文唔鍾意人食煙。但嗰陣嘅所謂「戒咗」，只係戒咗喺佢面前食咁解。聽日會見到詠文。我買咗糖，買咗套，無買煙。

詠文：「喂！」我哋又靜咗落嚟。我真係戒菸，係一次同同事「圍住個爐取緊暖」嗰時，咁啱畀佢撞到我哋。我同詠文對望咗眼，心諗點解依個女仔咁向左走向右走似我條女，之後佢一睥住我，我即刻心知不妙，Hi Auntie，Hi Hi，隻手彈都彈唔向左走向右走切。佢擰轉頭走，我追上去。跟住佢就開始鬧我啦，鬧鬧嚇就出必殺技——「我唔係嬲你食煙啊！我係嬲你握我啊！」Hi，點同你玩啊，之後斷斷續續鬧交鬧咗成個月。結果，係我投咗降，死死地氣走去戒菸，點知畀佢HiHi嚇、打打鬧鬧嚇，又真係畀我戒咗。

詠文：「你唔好理佢啦！」
我：「佢係你阿媽嚟嫁喎，邊有得唔理啊。」
詠文：「但……」之後我哋又無講嘢。我兜遠路，我諗係因為我想同佢傾多陣計。
我：「原來，唔經唔覺就七年。」詠文：「嚇？」突然間就講起以前，佢好似有啲嚇親。我成日都鍾意突然間就彈兩個故仔畀佢聽，講故仔係我興趣。而佢都慢慢由以前嘅勁嚇親變到依家得返少少嚇親，算有進步，大家一齊畀啲掌聲詠文。電話嘅另一邊，佢笑咗笑。

詠文：「哈……嗯，係啊，七年喇。」

我：「仲記唔記得嗰陣你做INTERN。」除咗一開始追佢同埋追到佢之後嗰排，我哋就好少會真係好認真咁去講一個電話，因為大家都覺得有咩嘢咪出嚟講。隔住個電話總係隔住層嘢。但兩個人傾計，有時候中間真係需要隔一層嘢，至少我講依個電話嘅時候係咁樣覺得。

我：「嗰陣你真係好戇居。」佢做INTERN嗰時咁啱嚟咗我哋公司，阿頭叫我負責求其塞啲手扳眼見工夫佢做嚇，咁我就每日將啲要打落電腦嘅手寫字叫佢幫我打一次。
詠文：「咁你依家係咪唔鍾意吖？」每次答依種題型，我都會打醒十二分精神。

我：「鍾意啊，好鍾意啊！哎啊豬豬啊我真係好鍾意好鍾意你啊。」

詠文：「豬咩豬！好核突啊！」我哋一齊笑。我咁啱行到去馬路邊，有車經過，好多人等過馬路。

詠文：「做咩啫你！又突然講故仔啦！」

我：「無啊……只係覺得，你真係改變咗我好多。」就係因為咁，所以先最愛依個人，先最心痛。

依一句當時我無講出口。佢打字真係好快。我本身打速成，但唔會記字，即係每打完一個字都要逐個逐個慢慢搵。可能嗰陣佢INTERN太得閒，佢就教我打倉頡，用白紙用筆畫咗個字型表出嚟，叫我快啲記熟佢。跟住佢就教我拆字。巴打，我打字之所以咁向左走向右走快，其實都係因為詠文。好喇，慢慢傾嚇傾嚇，就講起佢嘅大學生活，大學生活我唔明，因為我無讀過。

詠文：「嚇？依家你先知啊？你記唔記得啊！你嗰陣喺街食煙……」而每當佢一開口鬧我，我就會自動開掛機模式。佢係一個好好傾嘅女仔。嗰陣同佢一齊做嘢，我哋之間話就話一個長工、一個INTERN，不過講起嘢上嚟大家都幾無禮貌，可能真係因為同年。然後嗰陣我哋講起興趣，我答睇書。佢呆咗呆，叫我唔好勁嗡唔好吹咁大，仲問我「係真唔係啊你？」

「又唔係見工，興趣唔洗答睇書嫁喎。」佢話因為連佢都唔會睇書，佢問我點解出嚟做嘢仲會睇。我心諗，點解出嚟做嘢唔可以睇書。佢問我睇咩書，講出嚟我都有啲唔好意思，我答佢郁達夫。

「哦！我知啊！」之後佢問係咪外國作家。我好尷尬咁笑咗笑，唔知點答好。佢話佢鍾意煲劇，睇電影，書好少睇。佢唔食煙，唔飲酒。除咗A-LEVEL我哋考同一年之外，我哋兩個人之間連少少共通點都無。我喺嗰陣就鍾意咗佢。

詠文：「喂……喂！你有無聽嫁！」
我：「有啊！我食煙吖嘛！……咪係囉咪係囉，食煙正衰仔啊！垃圾啊！」
詠文：「明明就無聽。」傾傾嚇行行嚇我就行咗去街尾，講講嚇，我哋始終都係要由以前傾返去依家。我哋依家要面對嘅事。睇嚟無論以前過得幾開心，都唔代表我哋未來一定會好。依一關，明顯畀起其他嗰啲食唔食煙、飲唔飲酒都難過得多。

詠文：「旅行結婚。」旅行結婚？

詠文：「結完先同佢講。」我當堂嚇一跳，即刻唔敢笑。因為佢的確會咁做，完全係佢風格。

我：「唔得！咁走咗去邊得嫁……到時仲大鑊啊，我同你阿媽到時真係彎都無得轉。」

詠文：「咁唔係點喎！」我一定要扮到好有辦法咁樣。而實際上，我已經無咩辦法。

詠文：「聽日出到嚟再講啦。到時睇嚇同佢哋去邊到食啊……你洗唔洗買啲咩禮物啊……」

我：「哈，哄阿媽依一飯嚟講呢，我就差啲喇。」中七之後我就一個人住，所有人都走曬，無爸爸、無媽媽。

詠文：「你估我又好識哄佢咩……麻鬼煩。」佢呻多兩句，我哋講嚇早抖，之後就收咗線。我慢慢咁行返屋企，再辛辛苦苦咁行四層樓梯，終於嚟到屋企道大門前面。對面屋鐵閘打開咗。有個女人打開門，係我啱啱見到嗰個拖住個女嘅女人。我哋對望咗眼。女人：「你好。」我：「HI。」女人：「我係新搬嚟嫁，阿楠啊，點稱呼啊？」我哋兩間屋中間吊住一個燈泡，風一吹過就搖搖晃晃。-----------------------------------待續......

文章引用自: 陳家強

[圖擷取自網路，如有疑問請私訊]