前兩星期行山失蹤鵬哥自白：「好邪！」

:0:0

搞返曬啲証件同咭後終於有時間整理一嚇18―21/6發生的事:-************************ 事緣於18/6當天，原打算由北潭湧上大枕蓋經大蚊山，再經蚺蛇坳上尖循赤徑出北潭凹｡當日早上帶了約2.5升水及３條亞信屋買嘅energy bar，在西貢吃過早餐後就搭8:30開出的94號巴士前往北潭涌。於上窰站下車便沿萬宜路到迴旋處後便開始上山。隨行隨拍不經不覺已經過了大枕蓋，當日天氣雖有雲但陽光亦很猛烈及很熱，所以在10:18於fb出了一個post說想落雨。誰不知發了留言不久就響了－個驚天雷，於是我又在fb留言說"好邪"後便加緊腳步落山。到大蚊山入山囗處見雷雨雲已過，於是決定繼續行程上山｡可能大蚊山不是熱門山徑，所以路徑不太明顯，全被灌木叢遮擋要半爆林咁上山，但到半路我就突然失去知覺了｡直到醒時發現自己竟躺在灌木叢中睡着了，這時懵嚇懵嚇咁無意識到甚麼又繼續瞓｡過不久手機響起原來是女皇打來問我死咗去邊，於是答話仍在西貢山上馬上下山回家。(此時看手機時間約8點左右，而事後睇返當天除我聽到的那個雷外，之後約10:30右還有一次，但第二次雷響我卻沒有聽到。故估計失去知覺或者昏迷的時間大概係10:30至20:00，而且好大機會係雷電導致｡)由於當日只預計行至下午３點左右，所以並無帶照明工具，故只有藉着月光摸黑前進，且間中用手機gps檢查行進路線。由於方便取出及收納，我一向是用手臂包放手機及錢包，點知咁就出事。行行嚇突然發覺，手臂上個包包連手機及銀包都不知何時丟失了(之前帽子已經被樹枝勾跌找不到而丟了｡)｡應該是爆林時被樹枝勾下，咁都無計唯有繼續朝山頂進發。(其實正路應該留在原地等天光先再走的，但丟電話前才講過回家，這時失去聯絡就更心急要返家，或至少找個電話通知家人趕唔切返去吧！)上到山頂已經看得見咸田灣的燈光了，心想這下只要直接往下走就可返回麥徑經赤徑出北潭凹了。因為出發前擬訂路線時，記得大蚊山落麥徑係一段落差不到200米的直落山路，落山到北潭凹應該只需兩小時左右，於是路都不找，向着差不多方向就剷林落山了｡開始落山時還蠻順利的，但下了大約幾十米後又好似唔多對路，好似怎行同目標距離都無縮短到｡這時又好似有啲血糖過低跡象，於是把最後一條energy bar都吃了(之前醒後覺肚餓食咗兩條)｡但之後仍覺得迷迷糊糊，事後諗番可能是之前雷殛影響，不知怎地沒能下山，返而轉了入山谷裡……突然－下扎醒，此時已經天光且發現仍身處樹林內，於是又馬上找路走人｡走了不遠就發現了一條石澗，於是沿澗向下遊行到一處有一大平石的水潭，於是稍作安頓並為水袋加水｡之後就以該水潭為中心四處探路｡附近環境是這樣的，水潭水來源於一約２米高的小瀑布，水由－條較平緩的水澗再被大石分開兩邊流下，水潭下就一直傾斜下降十米左右有一處塌山泥痕跡｡而澗一邊為峭壁－邊均為樹林。就在沿澗上游探路期間，不知是自已昏了頭出現幻覺還是甚麼？沿澗行嚇行嚇居然會行返轉頭，有乜可能？於是再行竟然見到有認識嘅山友喺前面一個行緊，當然叫他啦！但對方沒有反應，於是追上前去！點知一轉眼睇睇路就唔見咗人｡唯有繼續行｡這時居然又見到有另－認識的山友，但又係叫她沒返應，我又追，到了一個位要垂直爬落３米到，一於照爬，就在爬了未到一半時突然失手，心諗"大鑊"已面朝天飛墮下面乾澗上｡好彩下面啲石大又圓，除了擦損雙手及有些痛外都無乜大礙，但當然人又失去蹤影了｡最後行行重行行，唔知點解又返番去個大水潭邊，於是先休息一下。休息一會後又再找出路，這次就入下遊方向右邊樹林探路吧！開始時樹好疏落好易行，行行嚇於樹叢較密那處，枝葉的空隙間隱約見到一座紅磚砌的建築物，無錯！係－座好大的兩三層高建築物，唔係村屋｡第一時間爆入去啦！點知入到去除了樹都係樹｡唯有又返轉頭｡這時發現有架super puma喺我頭頂低空般旋，因當時只過了一晚並無意識到家人已報警，故沒想過直昇機係搵我，而我當時亦沒想過出唔返去要求救，所以並無理會(真笨)｡最後過了－會(其實可能係觀察了我－會)直昇機就飛走了｡這時太陽也就快下山，我想也就大概４,5點吧！於是打消落山念頭，就坐在潭邊的大石上等天黑｡就在這時突然喺之前行過嘅樹叢內有人跑出來，一看，咦？又係識得嘅！但他沒停下在我旁邊經過就往澗下跑，於是我又再追，一路落居然一路見到有啲其他認識與唔識的人，但當我落到去時又唔見曬，於是又返上個潭度。因嗰處有石平台可以讓我安心睡覺唔怕碌落水｡臨瞓前緊係食支煙啦！但發覺包煙有啲濕濕地，所以點完後就隨手將包煙及火機放旁邊石上吹乾，跟着就瞓了。一覺瞓到天光醒來又想點支煙，但竟然包煙連火機－併消失咗！連兩枝行山杖都唔見埋，正百思不得其解週圍搵之際，更神奇的情況出現在我眼前！之前講過被石分開水流流下嘅瀑布左邊條水竟然被泥及草封了，瀑布後條澗原本向左邊的變咗直上及兩邊好似塌過山泥咁，總之同前一日完全唔同曬。此時我亦醒起有超過30個鐘無食過嘢，但又好奇怪一啲都唔覺肚餓！(唔知同條壓力褲束住個肚有無關)都唔理得咁多，繼續搵出路緊要！沿返昨日見人走出來的樹林穿入去搵，點知又去到一處像是舊墳地咁嘅地方，又沿途全是一些帶刺或倒鈎的植物，唯有再退回｡既然來路唔通那就走去路吧！這次亦不理那麽多直接落水跟澗走，行了大概半小時吧！忽然見到轉彎處有人玩水，梗係快快走過去啦！點知又係突然靜曬唔見人｡沿路幾次都係見到有人又突然消失，澗旁間中又會見到有啲荒廢嘅石屋，行埋去望真啲又變咗大石，到最後去到一處地勢似水塘邊但又似海邊嘅地方，總之個環境感覺非常之唔恊調｡於是我又放棄，再退回起點。返回途中就再無見到人同屋，你們說怪不怪｡返到水潭差不多已天黑，於是疊埋心水瞓覺｡第三天醒來發現現埸居然又唔同咗｡原先上游條澗好似塌過山泥，今天竟塌得更高更遠，澗的源頭去得更遠徧右邊入了樹林｡而且又有另一怪現像，就是周圍啲石頭入面都有聲傳出，就好像走進一條屋邨，每個單位都有些聲音傳出－樣，如傾偈聲、吵架聲、電視收音機聲等，而啲石頭就好似每個唔同嘅單位咁(唔知咁形容各位明唔明)｡雖然怪事連連但路仍要繼續搵，出發前先將水袋入滿水是常識，一打開背包竟發現連手機個尿袋都唔見埋！於是對住空氣有的沒的炒蝦拆蟹了－輪就出發。這次就沿澗上溯｡但上了沒多遠已入了林裡。由於林中隱隱望見向上係個小山頭，山頂又係樹林，上到去都未必被人發現及找到出路，於是又再折返，途中竟然又望見對面山係個好似沙嶺咁樣嘅墳場。雖知有墳埸就一定有路走，但西貢西灣－帶何來有墳場，呃我唔倒嘅！果然轉眼又變返樹林｡基於出門至今已經第４天，應該已經報了警有人搵緊我，所以決定唔入林走啲開揚嘅路線，咁就只有爬澗落山一途了｡決定後就立即出發，沿途石裡的人聲從沒間斷，快閃黨亦不停出現｡但我完全沒再理會。行行下又發現周遭環境又跟昨天不同｡昨天是愈行愈陰深，今天則是愈行愈開揚，有啲較深嘅水氹都唔諗咁多直接游過去。再行無耐就見到－個小水庫及輸水管，這時我就知到這次真的出來了，亦都是最後見到那些快閃人｡果然再往前走聽到一大班人在玩水｡這次是真人了吧！一睇就知道這裏是四疊潭了，居然係咁情況之下第－次到四疊潭｡於是問遊人借了手提給家裡報平安(藉手機的應是個泰籍青年，事後亦按來電顯示給他解釋情況及道謝了)｡之後就走向西灣方向諗住出西灣亭再行返出上窰搭巴士走，不過行到半路諗諗嚇，又改變主意返轉頭去咸田行麥徑去北潭凹走｡就在到咸田灣時已有一隊警察在恭候，由梯級上他們已打量着我，直到就落到沙灘時才走過來問我是否姓張，確認是我本人後就唔俾我走了｡******後記************因為知我三日沒吃過東西，警察們即時遞了兩隻蕉及一條餅給我吃，去到東區醫院檢查完要留院觀察，咁梗係叫屋企人外賣個豉椒牛肉炒麵去醫院食啦！點知轉過頭姑娘走嚟同我打吊針，話要做檢查仲要兩天不可進食｡天啊！已經三天無食嘢仲要我餓多兩日。炒麵嚟到時我只能用鼻嗦。。之前提過的消失的火機及煙，亦很神奇地遇到警察後，往咸田士多途中獲告知找到。重有樣神奇嘅係，在山中幾天，竟然無被任何蚊叮蟲咬｡反而住院時被蝨咬咗十幾啖｡以上所述均為本人親身經歷，可能係幻覺或其它，但絕非發夢｡因發夢受傷現實係唔會有傷口及流血的｡另在此再三感謝當時有份協力之各界人仕，政府部門等等。ps:由於小弟不才，墨水有限｡如有睇到頂唔順摔壞手機者，概不負責！via：howah20131217http://www.discuss.com.hk/viewthread.php?tid=25915642
想在手機閱讀更多娛樂新聞資訊？
下載【GigCasa 激趣網】手機應用Android版 iPhone版

[圖擷取自網路，如有疑問請私訊]