【千祈唔好嘗試放曱甴屋喺自己房…】

:0:0

相信大家都清楚，曱甴係一種幾仆街嘅生物。話說十年前嘅一個夏天，當日落好大雨，我企喺路邊等緊小巴，頭頂簷蓬因為雨水負荷過重，突然一灘水兜頭淋咗落我度。濕身唔緊要，最大問題係我身後個阿叔彈開，指住我個身大叫「嘩哥仔你個身好撚多曱甴！」

我低頭一望，真係好撚多隻曱甴爪住我件衫！嗰一刻，我全身每一吋毛孔都喺度講緊粗口，曱甴敏捷度又高，抓力又強，我完全趕佢哋佢唔走，我直頭有衝動想訓喺地下翻滾，嚟個玉石俱焚。最後，佢哋蹂躪完我一輪，先依依不捨咁離開。

呢件事之後，我就好撚驚曱甴。近排天氣熱到想裸跑，話說有一晚，我半夜起身屙夜尿，行出廳就見到有隻巨型曱甴，喺度食緊我老母擺喺檯面啲花生碎。sponsored 話說我老母佢每晚都會食住花生睇電視，用個奶粉罐裝住啲花生殼，拎住個罐就由個廳食到入房，直至個罐滿曬先拎去倒。

此外，佢仲係一個非常喜歡園藝嘅人，好鍾意將任何生果嘅核，嘗試種返棵樹出嚟，最近佢就喺廚房種緊車厘子樹。我曾經勸過佢唔好咁做，佢答我：「痴線啦邊關事，個個屋企都有曱甴嫁啦！」

由細到大，我屋企都成日見到曱甴，我發覺就算我勤做家務，每晚倒花生殼，將屋企清潔得乾乾淨淨，曱甴數目都有增無減。於是，我決定買幾間曱甴屋，擺喺屋企幾個曱甴熱門出沒點。

既然曱甴咁鍾意食我老母啲花生，我索性將啲花生碎平均散布喺曱甴屋嘅內部，希望可以加強捕捉效果。我總共買咗五盒，最後一盒唔知擺喺邊度好，就擺喺自己房。

兩日後，我後悔了…我打開間曱甴屋嚟睇，你老味吖！竟然有成十幾隻曱甴！啲腳畀曱甴膠痴實曬，佢哋掙扎到好似跳Disco咁un下un下。

嗰一刻我完全崩潰，我唔能夠接受訓咗幾十年嘅房，竟然會咁多曱甴？！我平時連零食都盡量唔喺房食，間房塵都唔多粒，我究竟做錯咗啲乜嘢啊啊啊啊！

我拎住間曱甴屋畀老母睇，希望爭取到唔好再儲花生殼同種車厘子。佢話：「你唔好擺曱甴屋咪無事囉，反正咁多你都殺唔曬嫁啦～」老母一句，我覺悟了！係我多事，係我唔啱。就算眼見住自己居住咗幾十年嘅家被昆蟲入侵，即使佢哋食我嘅飯、訓我間房、仲周圍屙屎產卵！而你嘅下一代，仲有可能同曱甴做鄰居、做同學、做朋友添！但只要唔聽、唔睇、唔理、扮無事發生，照常咁樣返工放工，你依然可以活得好幸福快樂。