男朋友太垃圾...點解男人可以做到咁?

:0:0

我開個post係想呻下...可能會好長...
我平時係好有口德既人, 但除左"垃圾"一詞我形容唔到呢個人.
如果佢花心, 心地差, 我會分左手, 但因為大家由細識到大, 而之前又覺得唔係大問題, 就咁多年來我都留係佢身邊(有人追但最後冇走, 見到果D男人一個個成家立室, 我真係好後悔, 呢個人根本冇能力照顧自己同其他人), 但而家真心覺得佢好廢, 唔細心, 自制力差, 懶, 慢, 冇目標, 冇行動力, 冇專注力, 記性差, 理解力差, 表達能力差, 冇反應, 冇喜好, 唔識尊重人, 唔識同所有人溝通. 我真係唔明一個人點解會垃圾到咁.
我差唔多30歲, 男友同我同年, 中2已一齊, 一齊左十幾年. 大家搵錢差唔多, 結左婚一齊捱都預左, 我都覺得OK. 我係大學畢業, 佢中五畢業, 我身材中等, 佢身材肥胖...以上呢d野, 唔會令我覺得一個人係垃圾, 因為讀唔成書+肥, 都有好多叻人, 最緊要係一個人知道自己想點. 我知道自己都有缺點, 係人都有缺點. 但佢問題係一d都唔知, 將所有野講成"欠運氣". 佢個人好懶, 讀書果時就日日掛住訓教, 中五repeat夜校都係讀唔上去, 出黎做野升唔到職, 學歷係其次, 其實佢做人處事有問題先係最重要既原因. 佢做野可能真係得, 但佢想法偏激, 非黑即白, 例如成日話好憎d擦鞋仔, 又話人高分低能, 又話d同事幾廢. 工作以外, 佢個人一d自制力同行動力都冇, 講多過做. 例如話想減肥但永遠唔會做d咩去減, 要我篤促佢點做點做, 話想買樓但從不搵樓睇樓...我識佢第一日已經話要減肥, 減肥計劃到今日為止未停過, 但全部實行唔到, 一磅都未減到過, 愈減愈肥, 成日提議食BUFFET, 買甜野飲. 叫佢做GYM, 佢話冇時間, 叫佢跑步, 佢話要返工好難 (佢只係做文職), 除非唔使返工就日日去. 好啦, 上幾個月佢俾人炒左, 係屋企一個月時間, 佢話一定減到, 一個月, 跑過一次咁大把. 有時我早上提左佢下午出去跑下, 佢應承左, 到最後大把藉口, 一日話"好攰", 一日話"有少少唔舒服", 一日話"阿媽出左去冇人開門俾我"都得! 總之就係廢物, 要做既野永遠做唔到, 淨係成PAT屎咁訓係度. 條腰好似冇力咁, 係床頭鋪到厚一厚墊住條腰, 跟住就郁都唔郁撻係度. 日夜都見到打喊怒, "好攰呀" "好辛苦呀" 等等...成世人冇一日精神過. 成日話想結婚想結婚, 但冇做過野, 咩都旨意我, 有次要去屯門睇樓, 佢一個電話打黎話"我表弟黎左我家麻將, 可唔可以下次先睇?" 至此, 我停止搵樓. 講搵路, 方向感極差, 係隔離佢都搵唔到, map又唔識睇, 睇住都唔識行, 次次都係我帶路.

果方面, 我講好左一定要有dom先可以咩, 出去過夜佢冇一次記得帶. 而佢係零行動力, 亦唔會話自己落去買, 叫一次去一次, 只會要求唔戴或直頭唔咩. 佢個人係冇野想做, 咩享受, 試新野, 旅行, 交流, 傾計, 甚至連搞野, 對所有野佢都係有就有, 冇都得. 我從來冇見過佢熱衷d咩, 只有睇下電視, 打下機, 踢下波, 打下麻將. 問佢有咩想做, 就話"開心" "結婚", 但唔見佢為左呢d所謂目標做過d咩. 仲有, 佢講野同佢d反應好似錄音咁, 例如次次同佢傾不滿既野, 佢就會話"sorry, 唔好嬲啦, 係我錯, 你開心返啦" 如果仲嬲就repeat以上一次, 但冇講過件事, 係完全冇反省過, 問返佢可以話"唔記得左咩事".

佢連聽人講野都有問題, 講講下電話訓左, 面對面講野對眼飄移, 鬧緊交我喊緊都可以係我面前訓左. 日日話好攰好攰, 根本冇做過d咩. 返工攰全香港人都係啦, 一上到巴士一定即刻訓, 訓到扯曬鼻寒, 一上床即訓, 冇話傾下計講下野. 出街就成日左望右望, 唔知佢望咩, 純粹係個人易分心, 少少野郁就望, 地下有個印花都望到, 我講野就聽唔到, 做d咩佢都睇唔到. 仲有, 佢應承完既野係唔會做, 如果唔講返, 就好似冇左件事咁. 佢個腦好似完全冇裝任何野咁, 提返佢就話"sorry我唔記得左" "我冇講過". 我唔知點解佢會咁.
我真係冇見過其他人係咁, 其實我開始覺得佢好似有病咁.
係我心中, 愈來愈睇佢唔起, 覺得佢係一件垃圾.
我同佢一齊, 已經係完全冇開心, 日夜都係提佢, 問佢野, 想訓練佢個人正常D,

我自己都冇曬心機過日子, 工作, 都開始抑鬱咁制...
只係想有個人一起奮鬥, 點知遇著個ON9到咁既人!

来源：ladies.discuss.com.hk

[圖擷取自網路，如有疑問請私訊]