男人拍得拖越多，真係越唔可靠？！

:0:0

如果你係一個女人，同時有兩個男人追求你，你會點選擇？A：「我拍過兩、三次拖。」B：「我拍過…（開始數手數）…N次啩…」感覺上，拍拖次數越少，睇落較純情既一位，即係A會比較可靠。而拍左N次拖既B，俾人感覺就係花心，玩世不恭。排除哂一切外在因素，唔睇係咪高大靚仔，唔睇工作出身財富，無視埋浪唔浪漫同有無超能力，大部分女人都會同A一齊，因為女人擇偶注重安全感。除非你係追求刺激感，「男人不壞，女人不愛」既心態搵男朋友啦。但係其實情史豐富既男人好可能比你眼中單純既男人更可靠。我就犯下過一個好無知既錯誤，以為個個男仔都會好重視初戀，特別係佢未拍過拖，只係俾人收過做兵，有過慘痛經歷，會好珍惜你依個第一個女朋友。但原來成件事錯X哂！唔駛幾個月佢就有第二個女朋友，我已經成為過去式。情史空白既男人分分鐘係最危險既男人，因為佢地無接觸過好多異性，所以對異性好容易有好奇心，促使佢地係拍緊拖或者結左婚之後輕易出軌。係既，可能佢地係會好投入，好真心咁同你拍拖，付出好真摰既感情，但係有幾多人會一拍拖就知道自己需要D咩，咩人先岩自己呢？所以佢地係面對誘惑，或者見到另一個引起佢地興趣既異性既時候，往往難以抵抗。未經受過誘惑既男人，對異性充滿好奇，好似脫韁野馬或者無雀既腳仔咁，Sorry，係無腳既雀仔，邊有咁容易俾你捉得住！理得你幾好女，用幾多個精靈球都收服唔到佢，只要一過左熱戀期，冷卻左佢個三分鐘既熱度，佢就會ｍｍｍ…天氣不似預期，但要走總要飛…左你。其實男人後生好多時都心野，鍾意玩。但當佢地玩夠喇，玩厭喇，個心就自然定落黎，會想發展穩定同遠既關係。正常黎講，當男人玩到咁上下，對玩既興趣自然會降低。要花心花過，要玩都玩過，咩都試過經歷過，對於誘惑既抵抗力自然會高番。而感情其實唔係咁好玩，一但真正投入左一段感情，就好番自拔。所以男人玩夠就會覺得攰，覺得俾女人有時既無理取鬧同撒嬌折磨夠喇，厭倦左，就會想以後好好地過日子。刺激夠，就追求平穩。佢地見識過各式各樣既女人，一旦佢地選結婚，就係佢地想定落黎既時候。結婚後，再性感、單純、吸引既女人，都好難再引起佢地興趣同慾望，佢都只會乖乖守護住身邊個個肯信任佢既老婆過日子。「你唔係佢第一個女朋友，但好可能係最後一個。」如果佢肯浪子回頭，終於定性既話，咁就要好好把握啦。女人成日問D好男人死哂去邊度。「你要靜候再靜候就算失收始終要守」等到兩種葡萄都熟透，咁咪可以擺酒咯。（ps.依個年代嘅女人對待感情有可能仲隨便過男人…所以大家自己執生啦下。）

[圖擷取自網路，如有疑問請私訊]