地球上已經再無，蔡思貝做唔到慨電視劇！

:0:0

TVB成功孕育到一個「蔡思貝模式」，無論系講踩單車果套《衝線》、進化到摩托車果套《鐵馬戰車》，定系Fashion慨嘢你識條鐵果套《潮流教主》，佢都系做緊同一個角色：
初生之犢，啱踏入社會充滿理想，但又不滿公司制度同行業文化。簡單來講，即系新人、無腦、無禮貌。繼而瀨嘢。

蔡思貝完美演繹呢種角色（或者講系同一個角色），劇入面佢每個上司都會心諗「屌！你識條鐵咩！」，例如當差慨嘢你識條鐵咩！或者，Fashion慨嘢你識條鐵咩！但到就快大結局果陣，又會認同佢，最後一齊BBQ或者出動，令人嘆為觀止：拍戲慨嘢，你哋班睇戲慨嘢識條鐵咩！

重點系，雖然蔡思貝對返工識條鐵，但系佢識食，總會吸引到果啲男神，例如黃德斌、陳豪，以及同楊怡食雲吞麵慨巨胸謙注意。蔡思貝，你真識食！

咁偉大慨「蔡思貝模式」，應用率系百分之一百。唔止警察同潮流雜誌新丁，仲可以做護士啦醫生啦律師啦，果啲《實習乜乜乜》呀、《乜乜出更》呀、《乜乜新人王》呀之類，就算唔系行業劇集，其他劇集都挑戰唔到佢。

例如《公公出宮》，蔡思貝可以飾演金家入面慨米鋪新丁，佢本來系一個宮女，但因為清朝滅亡，佢出宮落難入米鋪打工。對於米鋪制度守舊好多不滿，但系佢系新人，唔會有乜作為，於是佢無腦、無禮貌慨性格，不停闖禍。第一集佢會倒瀉袋米，第二集佢會幫米鋪訂錯米、第三集佢會得罪米鋪行家等等。

同時，又引起掌柜胡定欣注意，哎呀點解變成女女戀？呢個唔系歧視，只系TVB劇集慨同志都系殺人犯同變態佬，咁唯有就一就劇本，反正黎耀祥班公公都唔系男人。咁不如話蔡思貝呢個宮女原來都唔系女人，到第十八集就要揭露真正身份……

又講講《愛·回家》，蔡思貝可以飾演新手瑜伽導師，機緣巧合下加入Sze Sze fitness。佢無腦、無禮貌慨性格，不停闖禍，第一集佢會睇錯上堂時間表冇返工，第二集佢會教錯第二位導師個客，兼得罪埋同事，第三集佢會得罪個大客等等。哎呀，重複到咁真系好擾民，我已經講唔落去，總之到大結局果陣，所有同事會住埋同一間屋，大家都好欣賞蔡思貝，間公司仲改名做Sze貝fitness，真系好有愛呀！