【苦主開記招】畀李偲嫣氹到借90萬按樓兼飛女友

:0:0

有苦主話，李偲嫣日日同佢私訊，SEND自拍照畀佢，搞到佢前後借足成90萬畀女方，仲要按埋層樓, 但係又冇一齊過？！

正義聯盟李偲嫣早前被指涉虧空公款同欠債唔還，今日有自稱苦主嘅男人史Sir出嚟開記招，
話李偲嫣主動識佢，日日同佢傳訊息，同佢講心事，話老公打佢，連自己M到都話佢知，
仲有SEND咀咀自拍照同好多心心畀佢，氹到史Sir連女朋友都分埋手。

前後借成90萬
史Sir話，李偲嫣最初問佢借5萬，「諗住佢一時手頭緊」，史Sir畀佢氹到，於是立即借畀佢。

之後李偲嫣又問佢再借18萬，話要周轉，咁史Sir又畀佢氹到。
再之後，又話要廿萬，因為參選立法會想清債，咁史Sir又又畀佢氹到，所以去按咗層樓借24萬畀佢。

再再之後，又話要5萬選舉按金，咁史Sir又又又畀佢氹到…
再再再之後，李偲嫣話想搬屋…唉，我都唔想再打落去。

咁…兩個人嘅關係去到邊？
性關係？冇。
錫？冇。

拖手？冇。

點解會畀李偲嫣氹到？呢個係重點。
史Sir話李偲嫣好識講嘢，曾經同佢講「有律師追我，可以幫我還哂D錢，但我都唔要，我淨係同你借。」重點係佢令到史Sir覺得自己係唯一。
唔止呀！史Sir話李偲嫣會向佢撒嬌，「我今日好攰呀，我M到。」（記招上有人即刻話，因為佢想畀你知佢仲有M嚟！）

借咗咁多錢，有冇借據？
係冇嘅。史Sir話因為「李偲嫣話入數紙就係證據」。
（不如你話我對眼就係證據啦！）
除咗史Sir，仲有其他苦主，包括女士，佢哋李偲嫣曾自爆畀哥哥強姦，總之半夜講埋一堆心事，搏取信任，之後就問人拎錢交電話費，一交要幾萬蚊。
（幾萬蚊？足夠講到耳膜穿啦！）
Well，唔知史Sir佢哋講嘅嘢幾多係真，李偲嫣方面暫時未有最新回應，
不過史Sir就話要去報警。
有時世事嘅嘢，真係好難明。
所以我特別喜歡呢位仁兄個反應！