【腦細都俾元秋噴】林日曦爆蔣麗芸日日鬧《矛盾》crew仲發投訴信

:0:0

《跟住矛盾去旅行》後日終於播出戲肉，就係林日曦同蔣麗芸一齊去首爾，之前林日曦都講過，全程都冇同蔣麗芸講嘢，而呢個都係佢肯去拍呢個節目嘅原因。啱啱林日曦仲喺facebook打咗好大篇文章，就係講到佢哋同蔣麗芸拍節目嘅點點滴滴。

文章分為【尊重篇】、【落疊篇】、【地獄篇】、【花生篇】同【慘豬篇】，【尊重篇】就係講到最近有人睇完《矛盾》嘅宣傳片，就話林日曦「冇禮貌」、「冇家教」等等，佢就話：「呢啲人，用XX係不足以形容。」但佢都有多謝呢人，因為佢可以知道係有人真人投票畀「尊貴議員」，即是蔣麗芸。林日曦又講到自己對住普通人真係可以有禮貌：「對住普通人，我基基本本，可以維持應有禮貌；但對住長期無自主意識投票出賣香港人利益嘅尊貴議員，學林夕話齋，在一個醜惡到自己見骨見血的世界裡，你教我如何尊重一個我尊重了會令我不再尊重自己的人。」後來仲引用咗林夕嘅文章《是非疲勞》。

【落疊篇】就講到林日曦點解會答應拍呢個節目，仲話過程中佢唔係最地獄嗰一位，而係一班「喺鏡頭後無間斷教仔式問候」嘅工作人員。【地獄篇】就大讚導演功力，林日曦話：「一來大家冇講過嘢，二來我覺得導演同編導等人係畀尊貴議員噴到六神無主，基本上全程冇乜引導去討論過啲比較有益嘅話題，hea下hea下咁，剪得出兩大集嚟計，導演都真係神剪，向佢致敬。」

【慘豬篇】就數邊個最慘豬，林日曦話唔係佢自己，而一班冇出鏡嘅工作人員，特別係其中三個要負責同尊貴議員溝通嘅編、導。佢話：「我到今時今日，都仲好記得佢哋每次喺尊貴議員嗰邊返返嚟嘅嗰三個慘豬樣，仲有有一日我哋經過雪糕店買雪糕食時佢哋三個個幸福樣…… 」

最令人意想不到係【花生篇】：「哦冇，見你咁好心機睇到嚟呢度，禮貌上都送返粒花生畀大家：後來返到香港，聽聞尊貴議員出咗投訴信畀電視台，內容概括一句，係投訴我唔同佢講嘢。向電視台投訴我唔同佢講嘢，係尊貴嘅，係風趣嘅。」林日曦講咗咁多嘢，最後其實係想借佢嘅讀者、觀眾嘅留言，去安慰呢啲咁慘豬嘅工作人員。