【大台蔡思貝模式】

:0:0

假如你對蔡思貝嘅印象，只係停留在達哥、木村同國力書院，咁你就要留意返：
TVB成功孕育到一個蔡思貝模式，無論係講踩單車果套《衝線》，進化到電單車果套《鐵馬戰車》，定講fashion你識條鐵果套《潮流教主》，佢都係做緊同一個角色：
初生之犢，剛踏入社會充滿理想，卻又不滿公司制度同行業文化。簡單來講，即係新人、無腦、無禮貌。繼而瀨嘢。
蔡思貝完美演繹呢種角色（或者係話同一個角色），劇入面佢每個上司都會心諗「你識條鐵咩」，例如當差嘅嘢你識條鐵咩？或者，fashion嘅嘢你識條鐵咩？但到就快大結局果陣，又會認同佢，最後一齊BBQ或者出動，呢個模式就好比新加坡模式咁令人讚嘆。
重點係，雖然蔡思貝對返工識條鐵，但係佢識食，總會吸引到男神。例如「《真情》越南」黃德斌、「《洛神》曹丕」陳豪，以及同楊怡食雲吞麵嘅巨胸謙注意，真識食。
咁偉大嘅蔡思貝模式，應用率係百分之一百。唔止警察同潮流雜誌新丁，仲可以做護士啦醫生啦律師啦，果D《實習乜乜乜》呀、《乜乜出更》呀、《乜乜新人王》呀之類，就算唔係行業劇集，其他劇集都挑戰唔到佢。

例如《公公出宮》，蔡思貝可以飾演金家入面嘅米舖新丁，佢本來係一個宮女，但因為清朝滅亡，佢出宮落難入米舖打工。對於米舖制度守舊好多不滿，但係佢係新人，唔會有乜作為，於是佢無腦、無禮貌嘅性格，不停闖禍。第一集佢會倒瀉袋米，第二集佢會幫米舖訂錯米、第三集佢會得罪米舖行家等等。
同時，又引起掌櫃胡定欣注意，唉呀點解變成女女戀？我冇歧視，只係TVB劇集嘅同志都係殺人犯同變態佬，咁唯有就一就劇本，反正黎耀祥班公公都唔係男人。咁不如話蔡思貝呢個宮女原來都唔係女人，到第十八集就要揭露真正身份，「其實我真名叫達哥……完！」。
又講講《愛・回家》，蔡思貝可以飾演新手瑜伽導師，機緣巧合下加入Sze Sze fitness。佢無腦、無禮貌嘅性格，不停闖禍，第一集佢會睇錯上堂時間表冇返工，第二集佢會教錯第二位導師個客（得罪埋同事），第三集佢會得罪個大客等等。唉呀，重覆到咁真係好擾民，我已經講唔落去，總之到大結局果陣，所有同事會住埋同一間屋，大家都好欣賞蔡思貝，間公司仲改名做Sze貝fitness，真係好有愛呀！
唔講TVB劇，我哋將蔡思貝模式插入日劇好冇？早排好hit嘅《朝5晚9》，改搵貝貝做女主角，喺英語學校教書，第一集上堂印錯NOTES，第二集教錯英文文法，第三集懶醒搞活動教學結果瀨晒嘢……一樣得架。山下智久做嘅靚仔和尚，都係會愛上佢，是但啦。

所以，蔡思貝模式，係現代戲劇基本原素。單憑呢個發現，我應該比村上春樹更早得到諾貝爾文學獎。
TVB嘅編劇真係好偉大，到底有幾多老闆真係咁睇依家嘅80後、90後？我唔知。
到底幾多人一路睇一路鬧？我唔知。

到底幾多人會醒覺大台真係好冇創意？我更唔知。
我淨係知，蔡思貝就有少少似當年「賣飛佛」。所有角色都係做新仔，衝動同不停駁咀（但又溝到女主角）。蔡思貝，就係下一個賣飛佛，甚至更強勁。
所以呢，呢個故事教訓你，只要你係新人、無腦、無禮貌，終有一日你都會有好嘢食同成功喔。（谷阿莫mode：科科）。
文︰阿仁

[圖擷取自網路，如有疑問請私訊]