讀中學，一定要拍一次拖，人生先唔會後悔

:0:0

讀中學，一定要拍一次拖，人生先唔會後悔....
「喂，你仲記唔記得，我送過啲乜俾你？」
「有呀….」
坐系我面前既Candice，大大話話由中學到依家都識左四年，皮膚仲系咁白，不改一貫既包包面。話雖如此，真人如其名，成個人都又甜又可愛到一個點，一副鄰家女孩既樣子。所以自我識佢而黎，佢一直都不乏追求者。
當然，被佢拒絕既人有更多。

「…咪你表白果陣送俾我果朵玫瑰囉～」Candice以一副邪惡笑臉言著。
「…」我一個掙大眼，面都紅哂既emoji咁樣望住佢。
「頂你唔好再講啦好柒呀！」
我即刻趴左系台面尷尬笑著，柒到唔敢望佢。
諗返轉頭，中學追女仔，先系最開心，最令我回味既日子。雖然系柒，但大家都好pure好true，不知那來的勇氣同衝動，就系好想帶幸福俾個女仔。當左佢好似女神咁，或者天下間仲有好多更靚既女仔，但系佢心目中，個女仔先系最完美。
為左佢，你突然奮鬥起來。
為左佢，你花盡心思哄佢開心。
為左佢，你甘願做數之不盡的傻事。

大概有種青春，叫做中學拍一次拖。
男仔日思夜想個女仔，晚晚臨訓前都開一開佢既fb，系要睇陣tag佢既相先安心訓。只要望到佢，心底都有陣甜甜的感覺。返到學校，同成班兄弟好似開聯合國大會咁，幫手諗點表白，送啲咩先得目標芳心：送花？咩年代呀低能。整朱古力？Em…食得落口好似系。送pandora? 咪玩啦，你食Panadol都冇錢送乜野珠仔。送一樣平衡到心意同錢既禮物俾心儀女仔，仲難過叫你考全級第一。之不過，你依然會願意搵方法感動你既中學幸福，whatever it takes。
為左追佢，成個人一百八十度變哂，覆佢一個whatsapp都要左諗右度，心思前所未有地細密左n倍。同佢講既每一句，興奮中又帶點期待，期待得黎又怕打錯。上緊堂手機一震，見到佢回你，成個人又緊張起來，恨不得立刻睇寫乜，好想知佢諗呢。見到佢冇hea你，仲回得更多野，果刻成個人都甜哂。因為你知道，你同佢既關係又有得進一步發展。

好啦，終於到表白當日，真心，考試都冇咁緊張啊，你鼓起人生前所未有既勇氣，終於講到果三個字。果一刻，你個腦近乎空白，只系諗住一樣野：佢願唔願意接受我。死啦，衰左同俾魔鬼打落十八層地獄冇分別，心靈無三五個星期都唔洗旨意好返。但系，得到佢允許果個moment ，就好似去左天堂咁。你過去只會夢境出現既事情，今日終於成真了。果一刻，你真系相信你同佢可以拖到最後，同佢渡過DSE大學返工，一齊經歷人生大小事，做真正既老夫老妻，甜蜜得像童話故事。成件事不止浪漫得很，更添一份純真。畢竟，大家都系中學生，生活上都冇乜顧慮。

但系現實，總要為你既中學愛情留下一絲圓缺美。
「我都唔明，果陣我地都拖緊…點解最後都要…？」我回神過來，抬頭問道。
頓時，Candice由一副邪惡笑emoji瞬間變掩眼馬騮。到佢尷尬笑到收唔到聲。
我心諗：你個仆街，你都有今日啦你，嘻嘻。
「我…我…」Candice眼神已經飛左唔知邊到。
「我乜野姐，快啲答~」我笑言道。
黎啦，答啦，就睇下你點兜！哈哈哈哈。
「…對唔住啊…我都唔知我傷到你…」
曾經你真心以為，你會同你拖住果個經歷人生每一個時刻。曾經你真心覺得，你地會甜蜜到最後。但時間會幫你認清事實。
當初既承諾，早已化為泡影。由熱戀變感情，由感動變習慣。太習慣女孩既存在，你愈來愈唔會花心思哄佢開心。以前你仲會花時間google下有咩好去處，依家連包裝都懶左。工作同功課亦隨著時間飛逝而增加，忙到連陪女朋友既時間都冇。佢嬲你唔陪佢，你嬲佢唔諒解你。慢慢兩個都唔認得對方。你心灰，佢心痛。每次既誤會，你都以為道歉加承諾了事即可，但你已經唔記得，到底你應承左佢會改幾多次。你仲想行落去，但漸漸有種難以啟齒既無力感，成日都同佢講句：「好攰啊…下次先啦…」。

但系今次，偏偏就系你同佢既終點。
「不如…我地分開下？」剎時電話傳來女孩既whatsapp。
睇到短訊果一刻，你仲懵然不知發生咩事，以為好似平時發脾氣咁hea哄佢。當你明白事情唔系想像中咁簡單果陣，你仲好想挽留佢，但一切都已經太遲。曾經，你以為佢永遠都會陪伴你。曾經，你以為佢既存在系理所當然。曾經，你同佢有過最美好時光。最後依一切，都永遠只系曾經。
突然間你領略到，過去唔系佢唔明白你，而系你忙到忘記左佢既重要。佢一直體諒你既忙碌，等待你返黎錫佢，但你冇做到。你好後悔點解自己咁蠢，點解一直冇get到佢既心意。你好內疚你好耐冇對過佢好。想補救果陣已經為時已晚。自此，依一個遺憾就好似烙印咁，燙在心深處，永遠存在。就算你有日見返佢，你一樣都覺得痛。

見Candice咁尷尬，我都系唔笑佢啦。費事佢又進入情何以堪mode。

「你都傻既，多得你果句，我先可以保留住果段回憶。唔系你，我都唔會識欣賞依個遺憾。」我道。
日子耐左，心底既傷口愈來愈唔痛，時間轉化成鎮靜劑，慢慢安撫你既心靈。以前你為左唔想受到二次傷害，總系會迴避曾經同佢親熱既地方、將載有佢既物件收埋系深不見底既地方。然後，你漸漸會習慣返沒有佢既世界，就好似依個人未曾存在。系依段時間，雖然你會遇到好多條件比佢更好既女仔，但你就系對佢地冇好感，搵唔返當初追女仔既衝動。
突然有一日，不知那來既心血來潮，你翻開收藏住「她」既箱子。拎起佢寫俾你既每一封信，送俾你既每一份禮物。今次，你再不感到心痛。取而代之既系一陣陣遺憾美,你慢慢細賞佢當時寫俾你既每一句，每一字。從心底里笑出來既感覺，已經好耐未有感受過。或者你地之間沒有完美句號，但系曾經擁有過，曾經系中學，同佢拍一次拖，已經無憾。

同Candice傾傾下舊事，原來已經十點幾。咁佢又住大西北，就費事要佢夜返。

送佢去到車站，我都好快搵到車返東區。
「你去到邊其實？」Candice附以笑笑囗emoji在whatsapp道著。
「聽最佳位置唔理你呀」我配噴氣表情回道。
「嘩…依個暗示…」
「…你諗乜野呀你」
「痴線勁明顯囉，我地無曖昧喎但系」Candice困惑地道著。

「頂你會唔會諗多左，唔理你」之後我再冇回佢。
但其實，佢又錯唔哂。就算件事過左三四年，仲系有種講唔出口既感覺—見到佢成個人都好放鬆，毫無顧忌。但系，我唔想俾佢知道，我只系想依種感覺存在系我地友誼裡面。曾經擁有過，拖過佢只手，那怕只有一刻，我都已經心足。
無論你喜歡誰請你記住留下給我這位置
時常在內心一隅空出幾吋為我堅持
同渡半生亦有張椅子是否愛還是其次
比不上戀人但廝守一輩子
中學生涯，無憾了。
你中學有無拍拖?

[圖擷取自網路，如有疑問請私訊]