「I come from HK!」真係難聽過粗口!好7呀!! 日本買iPhone7 香港人以為有特權想打尖!

:0:0

當全宇宙都爭住影自己部iPhone 7出post扮勁既同時，我去咗日本做嘢，參加唔到一年一度「用iPhone影iPhone」攝影大賽，不過，身為一個Apple死忠，就算喺日本，都一樣要去Apple Store度睇嚇實機。

故事就係由澀谷間Apple retail store度開始。

咁話說有新機，Apple入面就一定多人，而且好集中試iPhone 7同7 Plus，呢啲趁墟心態，就算日本人都會爭住做（仲要排隊入添），我作為正常港豬，崇洋媚外就更加要跟。不過日本人排隊真係宇宙第一，又靜又跟到隊形，永遠唔會有人無啦啦排歪咗或者扮傾計然後打尖，所以好快我都入到場。
不過場內iPhone 7有限，都係要再跟機，於是我就搵咗最想睇嘅Plus去排嘞，點知就到我嗰陣，我發現前面已經玩咗幾分鐘嗰條友，拎住部機，又唔係試，又唔係影相，又唔係玩緊，就係拎住部機，然後兩頭望，好似想搵人咁，唔知做緊乜。我見佢個樣同打扮都知係香港或中國遊客，所以就嘗試用英文問佢可唔可以俾我摸下，點知佢西口西面叫我等等，望都冇望過我，係唔該、唔好意思、舒咪媽些都冇一句！

如是者，由我開口直到佢維持咗東張西望大約30秒，佢終於搵到佢想搵嘅人，Apple嘅職員，然後，佢就喺我面前做咗一件我覺得非常不可思議嘅事……（以下說話內容全部英文）
佢：唔該，俾呢部iPhone我！黑色，128GB！
職員：嚇？對唔住我賣唔到呢部機俾你，暫時你只可以上網預訂，如果訂購成功，你就可以去出面呢條隊排。（呢條隊同入場果隊又唔同，隊尾見唔到尾燈）
佢：但我來自香港，應該用唔到你地服務，你會唔會有特別方法俾我買到？
職員：噢好、好，香港係好城市，不過我都無辦法，或者你返去香港之後先訂購？
佢：我就係喺香港買唔到呀嘛！我係香港人嚟！其實細機都可以，你俾部黑色細機我啦！
職員：哈哈，但對唔住，我都係賣唔到呢部機俾你。或者咁，如果你真係好想買，我以朋友傾計嘅方式建議你，可以試下排出面呢條隊，因為有可能會有少量walk-in買到嘅情況，但都係唔一定，呢個係我意見，唔係官方意見。
佢：咁要排幾耐？我要趕住同朋友食飯……
喂去到呢個位，你仲聽呀？我心虛到即刻走咗呀！我作為一個香港人，當佢去到「I come from Hong Kong」嗰陣，已經好覺得好撚羞家，大佬呀你唔好濫用「香港」得唔得呢？你覺得香港人喺日本有好高評價定點？即係撻一撻朵人地就會無視所有規則，隊都唔駛你排，拎齊色iPhone 7 Plus俾你揀？

偽男神︱7.nam

[圖擷取自網路，如有疑問請私訊]