港女新娘女皇病發作，姊妹團臨開席憤然離場

:0:0

我第一次出文，今次真係不吐不快！

事緣係我一個識咗十幾年既中學同學結婚，搵我做姊妹，結果竟然反目成仇！

我都估唔到，一向被朋友形容為好心軟嘅我都會嬲到走人，只因新娘真係太過份！

由我答應做姊妹到婚宴前夕，我哋已經知道新娘好唔care我哋幾個姊妹，例如揀姊妹裙唔理我哋意見，開會時間唔肯就人，邊個去唔到又黑臉之類，仲有好多嘢詳細都唔提了。

不過我哋幾個就諗，既然答應咗你，就會努力協助你完成婚禮，即使預咗事後唔使做朋友。

【撞車受傷都要做妹仔】
本來做得姊妹就預咗全日做妹仔，但係婚宴前一星期，我唔好彩撞咗車，傷咗一隻手，用唔到力兼要戴手掛。

新娘去醫院探我，叫我到時去影相得啦，乜都唔使做。當天為咗攝影好睇，我除低咗手掛，結果佢好似唔記得我受傷咁，照點到我冇停。
出去接佢邊個親戚，乜都叫我地姊妹做。

【兄弟團唔係發呆就係玩失蹤】

之前開會時新娘有講過信唔過班兄弟，所以基本上所有工作都想姊妹做曬，包括裝飾花車，之前都只係話自由發揮，
去到前一晚先比一堆嘢去酒店留宿嘅姊妹要佢地做手工去處理花車嘅裝飾，落樓裝飾完第一次先再講有嘢一定要用，
因為係新郎特登揀嘅，我哋都迫於無奈做埋。

點知佢哋好笑到玩完第一個接新娘遊戲就失蹤咗一半！有幾個飲完welcome drink話要嘔，

跟住聲稱嘔咗10分鐘要去睇醫生，然後成朝早唔見咗人！全部都係正常飲品，冇溝嘢！係人都知薑係止嘔，你飲完薑汁嘔乜春呀？

剩低嘅兄弟基本上得一兩個會做嘢，其他人全部企埋一邊煲煙玩手機，我哋姊妹就忙到團團轉，妝都溶！

【新娘唔等人，叫開車掉低姊妹團】
講到呢part真係堅嬲，當日佢只係安排咗1架28座旅遊車做交通工具，包括接載新人攝影師化妝師兄弟姊妹團入馬灣。

過咗lunch，新人就用咗架28座返去男家轉妝轉頭換衫補影相，而剩低係茶樓嘅兄弟姊妹，係需要自行徒步行去男家等，好彩男朋友有車係附近先可以車我地姊妹過去，最後差唔多9個字1個鐘先見到架28座再出現。

係等嘅過程中，剛好我醒起拎漏咗candy corner嘅嘢，就叫咗男朋友車我返去拎（來回只需15分鐘），因為姊妹們都已經係我車，無理由叫佢地下車等姐，新人又唔知幾時先搞掂。

點知我哋回程時收到消息，話唯一一架入去馬灣嘅28座已經開咗車出發，我地姊妹收到新娘電話，好唔客氣咁問：「你哋喺邊」，我話喺車返緊嚟，5分鐘到。佢竟然唔肯等我哋，
仲話：「你哋而家即刻同我跳車，搭的士入嚟！的士錢我俾！」咁就cut咗我線。

當下其實我地一車都已經好委屈，好嬲，已經好想走。但係伴娘已經入咗馬灣，我哋啲嘢又喺入面，於是照搭的士入去。點知原來嗰度唔俾車入，我哋下車仲要行10分鐘入去，腳痛到死...

【新娘發癲掃冧candy corner】

我哋身水身汗咁去到酒店，望見啲decoration未整，班兄弟又唔見曬。我哋搵到伴娘問伴娘咩情況，伴娘話新娘丟低一句：「你知點做㗎啦？」就出咗去影相，於是伴娘一個人喺度set個candy corner。

喺呢個時候，換返便服出嚟嘅新娘，用眼尾「稍」咗我哋一眼，一句聲都唔出，就開始自己搬嘢做decoration。

做做下突然行去candy corner將所有嘢掃曬落地，打爛曬啲玻璃！我哋成班人呆曬唔知俾咩反應好！

【發爛渣鬧走姊妹團】

突然之間，新娘係新娘房暴衝出嚟，同我地講「我而家同你地講，我唔係特登掉低你地，而家我未來奶奶係入面屌緊我，班姊妹係咪有咩問題，我都仲攬你地，佢問點解而家個場都仲未set好，啲客人仲未可以入嚟」
(即係原來佢比佢奶奶屌先諗住嚟同我地講嘢，唔係佢好似完全唔打算同我地講嘢嘅，佢完全唔覺得自己有錯，錯嘅係我地，佢已經好好咁幫我地，係佢奶奶面前攬我地)

係我地同佢講返我地感受情況嘅時間入面，終於發現原來係有兄弟辦事不力，完全無通知過姊妹時間，導致姊妹們比人掉低咗，係新娘已經無嘢可以講嘅情況下，新郎走出嚟開始屌我地喇，「我兄弟佢唔啱，我一陣會話返佢架喇，咁你地而家想點先，係咪玩嘢?」

我哋本來都諗住幫佢完成件事，至少做埋啲裝飾先走。由前一晚開始通頂，早上嘅遊戲、出門，付出嘅努力完全被嫌棄，全日睇你臉色受氣，而家仲要俾你老公鬧埋一份！乜嘢叫做我哋想點，新娘由始至終冇俾過run down我哋，份run down喺佢腦入面run到冇停，改到七彩，我哋可以點？仲要講埋啲難聽說話，好似我哋貪啲利是咁！

我哋受夠了，就去toliet換衫，將啲姊妹裙同埋當日收嘅利是全部擺低就走！至於之後開席點樣婚宴點樣，我哋唔理lu。

新娘就好勤力unfriend曬我哋。都好，以後唔好搵我，反正佢只有利用我時先當我係friend，永遠只有失戀傾心事搵我，唔會聽返我心事，一拍拖又失蹤。

去到最尾，我諗我得返解脫嘅感覺。

[圖擷取自網路，如有疑問請私訊]