《城寨英雄》終極Boss昨揭盅監製劇透唔止楊老闆？三姨婆原來系。。。

:0:0

無綫劇集《城寨英雄》成為全城熱話，收視理想兼贏盡口碑，更令唔少劇中演員成功跑出，唔經唔覺大結局就會係星期日（28號）播出。噚晚第21集就講到花曼（王君馨飾）繼成功殺死福壽金（林偉飾）及馮春美（吳家樂飾）為父報仇後，下一個目標就係柯萬長（張國強飾），不過柯萬長武功較高強，所以暗殺失敗。柯德莉（劉佩玥飾）跪求拳佬（陳展鵬飾）同花曼原諒佢爸爸，並希望佢哋出席和頭酒。花曼打算喺和頭酒當晚將其殺死，點知柯萬長竟然喺酒樓放置炸藥，計劃將福利會全軍覆沒，眾人及時逃生，可惜小智（李日昇）當場被炸死。之後，柯萬長逃到炸藥庫，點知拳佬等人已經追到去炸藥庫為父報仇，柯萬長指通天段唔係佢殺。正當柯萬長想炸倉庫嘅時候，佢聽到佢個女把聲就即刻放棄，仲希望透過楊竹鑾（歐瑞偉飾）嘅砵仔糕車離開城寨。可惜當年嘅幪面人原來就係楊老闆，仲要講返當年嘅來龍去脈同埋仲爆柯德莉唔係佢嘅親生女，之後仲將佢殺死，棄於山邊。

唔知大家估唔估到楊老闆就係終極Boss呢？監製文偉鴻喺Instagram留言「我終於可以正式介紹你出場了，要你隠藏潛伏多時，有勞！很多聰明的觀眾早在懷疑，我跟歐瑞偉這麼老友，而他又是功夫之人，為什麼會做行行企企的角色！潛伏最強、鋼心最毒，楊竹鑾壓軸篇正式展開！」

另外，今日監製文偉鴻就係Instagram指幕後大Boss唔止楊老闆喎？！其實監製係講笑話幕後大Boss其實係三姨婆（梁舜燕Lily姐飾），笑稱三姨婆隱藏身份、捉走招陽及挑撥刁蘭同花曼等等陰謀，其實監製係想表達佢對Lily姐嘅尊敬同埋希望大家可以掌聲鼓勵佢嘅努力。

呢排無綫咁興玩不死人，其實三姨婆會唔會係。。。。。