無記《城寨英雄》口碑好, 其實真係多得班配角! 反而班主角真係廢廢地...

:0:0

查看相片
無綫功夫劇集《城寨英雄》喺上星期一已經出街，收視報捷；第一集平均收視30點，最高收視31點，成為暫時今年首播最高收視嘅劇集。今次有咁好成績除咗因為故事特別、功夫又拳拳到肉之外，都係果句，識睇嘅梗係睇綠葉啦！今次除咗有陳展鵬、胡定欣、袁偉豪、元秋一班主角好戲之外，一班綠葉亦成功上位！
林穎彤
林穎彤喺劇入面飾演一名悲劇少女李懷鑫（鑫鑫），首先要去刁蘭（胡定欣飾）嘅理髮店打工幫老豆還債、期間又經常被惡霸馮夏滿（李嘉飾）調戲、後來仲被爛賭老豆賣咗俾惡霸夏滿。而佢被老豆賣果刻喊住話：「我係你個女嚟㗎！」更加令人心碎。可惜去到第7集（尋晚），鑫鑫會慘被輪姦至死。劇集播出後，有不少網民都大讚Bella好戲，而佢近排仲自爆自己童年同角色好似，成功令到唔少人關注，更成為宅男女神。

查看相片

李嘉飾演馮夏滿
《城寨英雄》標榜用「硬橋硬馬」真功夫，各位演員都要特登學功夫。李嘉今次飾演一個奸到出汁、功夫了得、冇人性、猥瑣嘅城寨惡霸，不過大家唔好以為個個都只係三腳貓功夫，李嘉原來係真嘅「習武之人」。佢六歲就開始習武，不過佢由細到大嘅夢想都係做演員。可惜入行17年都係做閒角，直到今次終於有機會俾大家見識佢嘅「真功夫」，被網民大讚佢打得自然。另外，佢亦成功將猥瑣、變態發揮得淋漓盡致，最後惡人有惡報，佢喺第四集被龍成虎（伍允龍飾）打死。希望以後無綫可以俾多啲機會佢發揮啦！

查看相片
李日昇飾演王小智
劇中勇敢又有骨氣嘅「傻仔」小智，佢最令觀眾印像深刻一定係為咗救鑫鑫而被惡霸毒打，仲講「強者係保護弱者」嘅說話，令網民見到佢都會眼濕濕，每次見到佢俾人蝦都覺得心痛。其實要飾演呢類特殊角色一啲都唔容易，不過6歲就入行到而家有18年嘅佢演戲經驗十足，而且佢為咗呢個角色仲特登去觀察有自閉傾向患者，所以今次可以將呢個角色表現得淋漓盡致。

查看相片

相片
吳家樂飾演馮春美
一向好少拍劇集嘅吳家樂今次就破格做陰陽怪氣嘅黑幫惡霸馮春美，雖然佢塊面啲粉好白，不過就好好打，喺劇集入面其中一個大奸角。有網民就話佢今次演譯呢個娘娘腔幾好，眼神又夠奸，又唔會核突，搵家樂做又有新鮮感，令到佢成功博得網民掌聲！雖然近排俾人話佢呢個角色造型抄襲漫畫，不過有新聞好過冇新聞，咪更加令到觀眾印象深刻囉！

片

片
魏惠文飾演李發
令到觀眾人神共憤、見親都想打佢一鑊嘅鑫鑫衰老豆魏惠文，喺劇中為咗抵銷賭債，佢竟然將個女賣俾惡霸，睇到觀眾咬牙切齒。雖然成日喺啲劇集見到佢，不過就未必講得出佢叫咩名。其實佢係90年演藝學院畢業生，96年加入無綫。不過到而家都只係做閒角多，之前仲要喺石硤尾南山邨茶餐廳做樓面幫補家計，但係佢無放棄到自己嘅夢想，到而家都堅持繼續做戲，今次終於畀佢捱出頭啦！