陪阿媽去西環搵問米婆，個問米婆D 演技真係世界級

:0:0

陪阿媽去西環搵問米婆，個問米婆D 演技真係世界級
話説好多年前老媽子因為一d 意外而無辦法生我呀哥，一直心中有愧，所以捉埋我去西環搵一個問米婆(下稱8姐)，上到去…
8姐：你係咪落過仔？有個bb跟住你
老媽子：係呀，我都唔想，果陣有病，搞到生唔到呀
8姐：你個仔係下面比人打，無書讀，又娶唔到老婆，好慘呀。
我心諗：你又話我阿哥跟住老媽子，又話佢係下面比人打？讀書，地府有學校？讀中英理數法？讀完有咩用？搵咩工？
老媽子：下，咁點呀
8姐：我幫你叫你個仔上黎啦
8姐上身version：阿媽，點解你唔搵我，我比人打，又無野食，好慘。
老媽子：我應該點幫你？

8姐上身version：你要信8姐，叫8姐幫我交留位費，我先有書讀，同埋結婚都要比禮金架。
（呢個時候，8姐電話響)
8姐：喂，我做緊野，一陣打返比你，跟住8姐繼續上身同我老媽子講野。
坐係隔離既我，諗起喜劇之王既金句－臨時演員都要比d專業........
8姐無上身之後：呀仔(即係我)，你係呀哥定細佬黎？
我：細佬(我屌你咩，你請完我阿哥上身，你問我係呀哥定細佬？)
8姐：你要叫你呀哥保佑你，你呀哥亦都叫我保佑你，你放心我會保佑你既，(跟住8姐望住我3秒)
8姐：得啦 ,我已經保佑左你啦啦
我：哦，多謝……(屌你，你用念力屌死我吧啦)
8姐：想唔想聰明d？工作表現好？

我：下，ok la , 夠架啦 ,我份工唔洗點用腦。
8姐：拿，果度有我加持過既神水，日日飲，你會變得聰明架。
老媽子：咁我要20枝
我心諗：呀老媽子，你玩我咩，一陣佢比D廁所水我，你要我日日「隊」？
最後果度d助手呀姐拎左20枝水出黎，我一望，屌你呀，20枝維他蒸餾水？仲要係我面前扭開個蓋當加持過，你比20枝符水我都合理d呀，你就咁扭開個蓋？就算係，你都唔好比我睇到呀，專業d 啦屌。
後話，老媽子同我講依個8姐，20年前就好出名架啦 , d 水你要日日飲呀。
我：難怪8姐要推出d 智慧神水比你地班信徙……你地真係好需要
埋單留位費：300 ，結婚費用：500，燒表加作法：1000左右，顧問費：200 神水:4x20 ，買單：約＄2080

同日比警察搜身，見到有20枝水，問我做咩有咁多枝水，果刻我覺得我有20包白粉 / 20粒手榴彈都無咁難解釋…
我同個警察講:拜完神…
個警察望住我笑,果刻我覺得自己係零……最後佢放我走，背後傳來陣陣既笑聲，
你老母，死黑警……