女朋友話鍾意人打籃球，於是我放棄左踢波

:0:0

我女朋友話鍾意人打籃球，於是我放棄左踢波.............sponsored 香港有好多毒撚，但我一定唔係其中一個，因為我識踢波。愛情

香港有好多毒撚，但我一定唔係其中一個，因為我識踢波。點解識踢波就唔會係毒撚？乜撚野邏輯黎？我可以咁答你，你望下當今足球壇入面，除左迪呀高哥斯達之外，踢得波有邊個個樣係似毒撚架？有啲野真係唔可以講邏輯，係足球場上我就係c朗，見人就過，見波就射，射親就入，c朗喎，最多戴下帽，又點會係毒撚？中學勁多人打籃球，但係識踢波嘅真係好少，所以冇足球隊，但係我、咸濕強、軒爺、龍哥、俊少……成班人柴娃娃咁，成日落街踢波，苦練球技，仲話始終有一日會叫呀sir重組番支足球隊。sponsored

有次踢完波，咸濕強問我︰「到底點解你踢波咁勁，過人個陣好似唔洗諗咁，一黎就去馬。」正當我以為佢想讚我個陣，佢加多句︰「但係溝女又唔見你咁叻嘅？」我屌，唯有比個最唏噓嘅答案佢︰「我將我嘅生命奉獻左比足球。」然後下次通多佢幾次坑渠笑鳩佢。其實呢番話都只不過係自欺欺人，我鍾意左一個叫芷晴嘅同班女同學，佢係我人生中第一個鍾意嘅人，所以都叫係我嘅初戀，但係我離開左球場就已經唔係c朗，個種自信，個種魅力，已經唔存在，我根本唔敢溝佢，最多都係聊下佢傾計，激下佢發嬲咁。

sponsored 我上堂我唔聽書個陣就係望住佢，我冇望住佢個陣其實係心入面J緊佢，亦都因為咁，我嘅讀書成績好差，班主任同我講，我再唔讀書就會留級，唔知係佢烏鴉口定我其實係天材，每次去到留級邊緣個陣，我下學期就會追番上黎，順利升班。有一日番學，我發現芷晴僕低頭，伸手入櫃桶到寫寫寫，唔知寫緊啲咩，我問佢︰「喂，係咪咁勤力呀你？」佢怒啤左我一眼，話︰「關你撚事咩柒頭，番歸啦你。」大家唔需要驚訝，鍾意一個人，佢唔一定都係所有人眼中嘅女神，佢冇所謂嘅白滑長腿，冇瘦底大波，佢只係一個五官端正，普通會講粗口嘅女仔。而因為我姓吳，名叫凡歸，所以佢串我個陣多數都會叫我番歸。

sponsored 我話︰「老師望過黎啦。」其實老師仲恰緊眼訓，邊得閒望過黎，但已經嚇到佢支筆跌左落地下，跟住又怒啤多我一次。我覺得自己今日好成功，所謂打者愛也，愈打得你金嘅人愈愛你，愈嬲你嘅人都愈在乎你，至少今日佢嘅心入面會多左我呢個傻仔嘅影子。去到第二日，突然有個男仔走入我地班房，佢好高大威猛，隻手臂好似我大脾咁粗，我第一眼以為學校係邊到搵左個咁堅料嘅訓導主任番黎，醒目到咁之後一定冇學生敢犯校規啦。點知睇清楚，個男仔係著住同我地一樣嘅校服，竟然係學生黎。佢走左入黎，放低張紙比芷晴，話︰「你唔好咁無聊啦。」之後就走左，芷晴喊左出黎。

sponsored 仆佢個街，我呆撚左，咩事？咩事？我望左望張紙，見上面畫左好多個心心，唔通係紅十字會捐血卡？但再望清楚，上面竟然寫住一行字︰「打波加油！」我先知道，原來頭先條仆街係黎當面拒絕芷晴。我都有睇陳天歸個故，如果我係天歸哥，見有人恰我愛人，呢刻一定係衝上去一拳打撚柒條仆街Martin，最多留個案底啫，但係我唔係陳天歸，大隻佬都唔係Martin咁簡單，我只可以呆呆咁望住呢個大隻佬嘅背影，連追出去叫佢收皮嘅勇氣都冇。之後我問人先知道，頭先個大隻佬叫杜如峰，我當堂嚇左跳，差啲以為佢係杜如風個細佬，其實佢係近排轉校過黎嘅中六師兄，係籃球隊成員兼港青主力，就算冇打開籃球嘅我都知佢好撚勁。我第一次見芷晴喊，有幾個同學遞紙巾，但我只係呆坐左係班房，唔知點安慰佢。佢平時係一個好堅強嘅女仔，出咩問題都係講句粗口或者鬧人兩句就當冇事。sponsored 有次佢比呀sir叫左出黎示眾，話佢無啦啦做咩打扮到成隻雞咁，正常女仔比人咁侮辱法，多數都係喊出黎，但係芷晴冇，佢只係眼光光望住個呀sir，話︰「你成日望我裙底，咪以為我唔知。」之後比人記左個小過，但個呀sir好似之後都唔敢再望芷晴咁，我諗係怕比人話佢望人裙底。

其實芷晴個日中午之後的確係化左個淡妝，因為放學佢要去睇籃球隊比賽，而家諗番應讓都係為左睇杜如峰打波。總之，佢都唔係一個軟弱嘅人，但係戀愛大過天，比人拒絕慘過食屎，我諗今次係咁多同學面前比人咁拒絕法，佢真係好傷，所以先忍唔住喊左出黎。sponsored 番到屋企，我諗左好耐，終於決定打比芷晴，我收埋自己係房，喱係張被入面，我唔想講講下電話，安安下慰人個陣老母無啦啦大叫︰「食橙啦。」咁樣會好破壞氣氛。我鼓起勇氣，打比芷晴。「你所打嘅電話未能接通，請遲啲再打過啦。」跟住係一堆我聽唔明嘅英文，我忍唔住屌左一聲，大佬呀，你知唔知我好難先鼓起勇氣打電話？我嘆左口氣，門外突然老豆突然大叫︰「呀仔，出黎食蘋果丫。」係，我唔記得講，我老豆都有呢個大聲叫人食生果嘅嗜好。話說生果黎講，蘋果同橙一樣，都係切開好食啲，我指嘅唔係切開層皮，係切左皮之後再將個生果切開一舊舊，入口舒服啲，正當我係到研究緊生果味道同切法之間嘅變量關係個緊，我電話響起左，係芷晴！我拿拿臨吞左口入面舊蘋果，差啲哽撚死，之後光速洗手再衝番入房，喱係張床入面，唔好以為我做左咁多野好似用左好多時間，其實只不過係五秒鐘嘅事，反應真係快過睇A_片個陣突然傳黎鎖匙開門聲。sponsored 「喂，芷晴？搵我咩事？」「仆街，唔係你搵我咩？冇事咪亂打電話過黎啦。」我聽到佢似乎想收線，我即刻話︰「咪住。」「點呀？」其實我根本冇諗過打左比佢應該講啲咩，頭先只係一時衝動禁左撥號個制，唯有亂鳩咁up︰「你知唔知蘋果係要切左層皮，先發現到果肉上面邊一忽爛左？」「所以呢？」「所以呢……所以人都係呢個道理，唔剝左佢件衫都唔點佢身材係點。」「……」

「呃，總之，我嘅意思就係，人不可以貌相啦，杜如峰係幾高大靚仔嘅，令我都忍唔住有小小咁多嘅妒忌。不過話唔定佢係花心大羅白呢？話唔定佢係一個會湯左自己女朋友黎食嘅變態佬，所以先咁大隻呢？」我講左一大輪，佢忽然好似想鬧我咁︰「你講夠未？」「……」聽到佢語氣有啲哽咽同傷心，今次輪到我沉默。佢停左一陣，先再出聲︰「我知你想安慰我，多謝你，我已經冇事啦。」我未聽過佢咁溫柔嘅聲音，唔知點應佢，唯有話︰「你冇事就好啦。」「咁……咁收線啦。」「咪住。」我唔知點解突然問左一個問題︰「點解你會鍾意杜如峰？」佢沉默左一陣，先話︰「因為佢打籃球好勁？」跟住笑左一笑，話︰「好啦，聽日要番學，早點訓啦柒頭。嘟嘟嘟………」我拎著部電話，望著wallpaper上面c朗射罰球嘅英姿，雖然佢多數唔入，但係都叫做型過。不過呢一刻，我忽然覺得c朗已經唔再靚仔，佢臉上嘅嚴肅表情，腳部強壯嘅肌肉，似乎都已經唔再吸引。呢一刻，我腦海只係充斥住芷晴嘅一句說話，因為佢打籃球好勁，我決定左，我要學打籃球。要學一樣野一定係跟最勁嘅人學，所以我上網search最強籃球員五個字，見到一個大大標題︰「美媒體評史上最強10人。」得第一名嘅米高佐敦我係識，我以前仲以為旺角離果個佐敦站係因為佢而命名添，另外九個人我都唔識，我曾經聽過人講高比拜仁好撚勁，點知都唔係呢十人名單之內，睇黎佢都幾廢。但係佢地全部望落我都唔啱feel，冇錯，簡偶像其實係同拍拖差唔多，好講feel。我不斷search呀search，終於發現到一個叫Allen Iverson嘅籃球員，我決定左，佢就係我打籃球嘅偶像。點解？好簡單，一見到佢嘅外號，我唔係女人都已經醉左，The Answer，考試有佢真係無敵。而佢仲有一個更霸氣嘅名，叫戰神，係繼馬壯之後第二個最接近神嘅男人。神本身其實都係人，只不過佢做到普通人都做唔到嘅野，所以先有資格叫做神，呢個唔係正正就係男人嘅夢想咩？咩The Dream、海軍上將、乜乜柒柒咁，實力我唔知啦，但外號根本乜得比，夢我就日日都發，海軍上將你軍隊都大把啦，兩個冇咩咁特別，但係戰神從來都只有一個。而且AI身型同我差唔多，都係矮細球員，應該打法上會令我易學啲。當然我之後先知原來佢都有成一米八三……我將手機同電腦嘅c朗wallpaper換左落黎，換做AI。我不斷上youtube睇佢嘅片，就算老豆老母唔係屋企，我都唔會再睇愛情動作片，我寧願睇AI片。後手運球、低身突破，正手Crossover，Jumpshoot……呢幾個月，我不斷吸收籃球嘅知識，買左個籃球，一個人落街練波，苦練球技，由一個新手變做一個叫做識打籃球嘅人。呢幾個月黎，有好多次，咸濕強都約過我踢波，但我每一次都推左，因為我將每一分一秒嘅空閒都放左係籃球上面。有時我真係心動腳痕，拎起屋企對生鏽波boot不斷摸呀摸，老母以為我痴左線，老豆以為我有戀物癖。每次經過樓下足球場個陣，我都望到變望夫石咁濟，但始終忍住冇踢，將時間留比籃球，因為只要諗起芷晴第日見到我打波，係場外為我歡呼吶喊嘅一刻，我覺得一切都係值得。我唔敢同咸濕強講我已經唔踢波，轉左打籃球，我驚佢會覺得我背叛左佢地，放棄左一齊踢波嘅朋友，我只係次次用唔同嘅籍口推倘，隔左一排，咸濕強都唔再浪費時間約我。我閉關練波，每日落街走籃三十次，射二百球兩分，一百球三分，命中率我真係計過，有時真係直達NBA水準，似乎我已經練到好高境界，於是我離開左屋企樓下嘅爛球場，去左葵芳打波。葵芳運動場隔離有六個籃球場，除左細細個小學個陣同fd玩，我未試過去街場同人鬥波，最多都係係屋村個無人球場自己鳩射，而家見到咁多人，我真係成個毒撚咁，左望右望，有啲興奮，簡直係熱血沸騰。我見有人係隔離大叫︰「唔該跟隊！」我先知原來打籃球同踢波一樣，都係要叫跟隊，所以都即刻跟左隊，不過踢波入一球就已經換人，打波就要打十球先到下一隊。打波唔單止講技術，想贏波仲要講智慧，於是我跟左隊之後，先觀察場入面一班柒頭皮嘅技術同能力，以便陣間可以作出針對性嘅部署。唔係「針對」「性嘅」「部署」，而係「針對性」「嘅部署」，睇完呢個笑話，話咁快就到我出場，我只係得一條友，於是求其係場外簡左兩個配角入黎。十比零，打完嘅一刻，我冇理其他人，離開左球場，坐左係附近一張長櫈到，唔知點解，一向樂觀嘅我，眼淚竟然忍唔住流左出黎，輸嘅係我個隊，比人炒十比零嘅，係我個隊。我以為自己練左幾個月，有幾咁勁，頭先一接波，諗都唔諗就黎個Crossover剷入籃底，我平時練到走籃必入，睇NBA比賽啲球星都未必做到，諗住呢球實食冇痴牙啦，但點知走籃有人守同冇人守個陣，原來係有咁大嘅分別。守住我果個呀叔見我剷籃，跟到我好胋，我一跳起出手想放籃中出佢個一下，佢突然成個人跳起左，隻手一野拍落黎，食正哂個波，籃球飛出十幾米遠，之後我成個人比佢撞到跌左落地下，個patpat好撚痛，好似比人爆完菊花再茶白花油咁。呀叔望住我，似乎係到講︰「死靚仔，你未夠班。」我而家再諗番，仲係好驚好淆，佢只係同我差唔多高，但係跳起個一刻，就好似一個巨人咁，成個黑影遮哂啲陽光，我感受到嘅係前所未有嘅壓力，我知道，就算我再剷一百次，都會比佢咁樣撲番出黎，名副其實嘅中出即飛，但飛嘅唔係女，係籃球。我嘗試係外圍投射，我係樓下練波個陣，long two嘅命中率已經可以高到六七成，但我射左五六球，竟然一球都唔入，我好明白，絕對唔係因為我唔好彩，而係我真係廢。呀叔係咁遮我眼，又貼身防守，有時我雖然擺脫到佢，但一遠射佢又撲過黎，好似想食左我咁，我驚一驚，個波自然用錯哂啲力，最後唔入。我嘅兩個隊友眼光光望住我比人屠、比人虐……我諗我知佢地嘅眼神係咩意思，佢地係同緊我講︰「咁撚廢你黎街場鬥波？番歸啦你。」望住手機上面AI嘅wallpaper，我曾經以為自己係戰神，無人能擋，但而家我終於知道，自己其實只不過係一個瘟神，一個冇人想同我一隊嘅瘟神。我抹走啲眼淚，好認真咁諗左諗，又嘆左一口氣，我苦練練左半年，但鬥一場普普通通嘅三打三，可以一球都唔入，證明左啲咩？證明左我根本唔係打籃球嘅材料，根本一世都唔可能好似杜如峰咁勁。係呢半年入面，芷晴仲係好鍾意杜如峰，每次籃球隊練習，佢都會去睇，雖然話睇打波唔出奇，但係佢次次都係到，出席率仲高過一班籃球隊成員。但係身為籃球隊隊長，杜如峰呢條柒頭都係冇咩表示，以芷晴性格，我好怕佢會有進一步嘅激進行動，譬如佔領籃球場，逼杜如峰表態。但好彩佢冇咁做到。我本來諗過留低陪佢睇籃球隊練習，但佢即刻一句轟埋黎︰「做咩啫你，番歸啦。」我唔介意佢叫我番歸，但係望著佢對住杜如峰打籃球嘅英姿流哂口水咁，作為一個男人，我真係頂唔順，與其係到睇住自己嘅未來女友精神上出軌，倒不如練好啲波，等佢對我流口水。可惜呢個如意算盤已經打唔響，如果而家芷晴見到我打波咁廢，除左嘲笑之外，我真係諗唔到佢會有咩反應。我番到屋企，將籃球鞋擺返入鞋櫃，將籃球塞入書檯底。我望住手機AI嘅wallpaper，問自己，以戰神做目標，你配咩？我換走左AI，將c朗換番番黎，想走番入自己覺得最舒服嘅地帶，但之後我先明白，有點野過左去，唔係話換就可以換得番。我打比咸濕強，問佢下星期約人踢波好冇。點知佢同我講︰「踢波？嚇。」「嚇乜野？」咸濕強同我一樣，最鍾意踢波，最鍾意c朗，每次我問佢踢波佢都會好積極約人，但今次唔知做咩咁嘅語氣。佢同我講︰「我好耐冇踢波啦，唔得閒呀，下次先啦。」「你好多野做咩？」「冇呀，而家好難約人呀，算啦，得大家得閒啲先約啦。」我打比軒爺、俊少同龍哥，點知佢地都話冇咩人踢所以唔踢啦，下次先啦咁樣。我個一刻好嬲，幾乎想鬧鳩佢地，中學冇足球隊，當初大家誓神劈願，話要練好球技比呀sir睇，重組番支足球隊出黎威威，佢地本身已經踢波唔叻架啦，而家仲要推黎推去唔肯踢，咁樣算點？我一番去就問咸濕強，佢大家做咩唔踢波，我見到佢嘅眼神真係前所未有咁認真，講左一大輪，我默默咁聽住……最後佢講左一句，令我眼都紅埋︰「最努力嘅c朗都走埋，邊個仲會留低？」當初咸濕強負責約踢波，約左我十幾次，我推足佢地十幾次，本來我地有八條友，細場四打四真係啱啱好，我唔踢之後，佢地頭幾次都仲有去，但總係差咁啲野，八個人嘅身影變到得番七個。隔左一排，又有一個人突然話︰「唔踢啦，你地六個人啱啱好。」之後幾次咸濕強佢地六個人都係照踢。點知踢咁少一個，踢咁又少一個，最後得番咸濕強同軒爺個四丁友。咸濕強同我講︰「如果你係到，佢地一定唔會走。」呢句唔係講笑，亦唔係因為我有咩特異功能所以佢地唔走，只係因為我踢波好有火。踢開波嘅人應該知道，球隊中梗係會有一兩個on9仔，次次入完波都會好high咁鳩叫，或者踢波個刻會講句︰「窩利抽射！」跟住波就踢唔中，人就跌左落地，仲係咁叫人吊高波比佢頂頭鎚扮c朗。我當初就正正係呢個有火嘅on9仔。你可能話，你咁勁，下下屈鳩人地，點可能有癮踢波？Sorry，呢個世界唔係個個都好似你條仆街咁淨係識龜縮係個殼到，佢地會反抗，會進步，今次攔我唔到就等下次，從來都唔會停止，除非有一日，c朗已經唔係到，唔再有狂風暴雨一樣嘅攻勢。個場靜左好多，踢波嘅氣氛冇左，人走茶涼，恐怕就係呢個道理。我好後悔，今次想練好籃球，唔單止失敗左，連踢波嘅fd都走埋。運動愛情兩失意，我本來以年呢年就係咁hea下hea下就過，點知有次體育堂，改變左一切。上堂個陣，我見芷晴係籃球場到望住啲人打波，我走過去問佢︰「我地班啲人有杜如峰咁勁咩？有咩好睇？」我只係諗住串下佢咁，以為佢會發火叫我番歸，咁我到時就可以自動收皮行開。點知佢好認真咁問我一件事︰「呀歸，你會唔會成日諗……自己有一日可以好似一啲好勁嘅籃球員咁，一跳就掂到個籃框，然後將個波放入去？」佢嘅意思應該係爆籃。我諗左一陣，之前苦練籃球，睇左唔少NBA球員爆籃嘅片，有啲誇張到好似O』Neal咁，板都拆爛埋，係就係幾震撼，但我真係唔會成日諗自己爆籃喎，我反而係咁想像自己好似AI咁Crossover過哂啲傻仔，留低堆塵比佢地食。於是答佢︰「爆籃就冇諗過，但係都會希望自己平時打波可以勁到好似NBA球星咁嘅。」佢好奇怪咁問︰「乜原來你都有打波架咩？我以為你淨係識踢波。」我梗係唔可以比佢知道我為左吸引佢注意，偷偷地咁練籃球，最後仲要失敗左，所以我就話︰「踢波打波一樣啫，總之運動場就係男人嘅戰場啦，每個男人都想自己變到最強大，係呢個戰場到生存落去架啦。」「你……你覺得如果一個人可以為左打波而飛左個女朋友嘅話，佢會係一個咩人？」我呆左一呆，當初我希望芷晴做我女朋友，所以苦練籃球，咁如果一個人掉番轉，反而係放棄左個女朋友而去打波呢？咁佢會係一個咩人？我諗左一諗就咁答︰「係其他地方我唔知，但如果係球場上面嘅話，佢一定係一個強大嘅人。」我本來唔知芷晴無啦啦做咩咁問，但之後佢同我講左一件事，我先知道點解芷晴成日纏住杜如峰，成日去睇佢比賽。原來芷晴同杜如峰係兩年前已經一齊過。只不過學校對學生嘅私生活管得好嚴，冇人可以拍拖，如果比人知道左，一定日日夜夜見社工同訓導，煩到你仆街，所以佢地拍拖嘅事守得好密，係學校又冇咩親暱行為，以致竟然完全冇人知道呢件事。芷晴就算去睇佢打學界籃球，都仲有成班同學一齊，冇人留意到有咩特別。但就係上年，杜如峰比人選左入港青，本來呢件事都同芷晴冇咩關係。但係杜如峰呢條友真係有少少精神問題，竟然因為想專心打籃球，第日可以做個職業籃球員，所以單方面同芷晴分手。冇錯，係單方面，芷晴連解釋都冇機會解釋，就比佢撲左，我指，block哂所有contact，fb、whatsapp，乜乜柒柒，一下就要同芷晴黎個與世隔絕。但芷晴同我講，佢根本唔介意男朋友成日要練波，亦唔介意一個星期見得一兩次，因為佢知道杜如峰咁做只不過想完成自己嘅夢想，有一個勇於捉緊夢想嘅男朋友，佢反而開心都黎唔切。聽芷晴up完一大輪，佢好堅強冇喊，但我知佢一定好唔開心，我見到佢咁樣，個心真係好痛。我呢一刻幾乎就想同佢表白，但我明白只不過係自取其辱，係芷晴心目中，我可能連杜如峰嘅一條腳毛都不及。自己重視嘅人竟然比人當係草，個心真係好難受，杜如峰呢個仆街，夢想同女朋友點會唔可以並存？我一定要去屌醒呢個柒頭皮。講係咁講，但佢話哂真係大隻過我兩三個碼，我如果著中碼衫，佢一定係加大，如果我飲中可樂，我諗佢都要加大先夠飲。陣間佢脾氣唔好，一拳打埋黎我可能要入廠，所以我的確有啲淆底，甚至諗過洗唔洗call定白車先，如果到時我傷左都可以快啲去到醫院。不過為左芷晴，唔撚理得咁多架啦，死就死啦。我一早已經向芷晴打探哂杜如峰嘅底細，知佢住係深水埗，放學之後我特登去個到捕佢。但我on99咁等左兩粒幾鐘都唔見佢人影，等到成七點禁濟，喂大佬呀，我唔洗番屋食飯咩，正當我想走人個陣，杜如峰呢個柒頭皮終於出現，我真係成肚怒氣，呢刻淨係想一拳車爆佢。但走到佢面前截停左佢之後，見到佢個對咁大隻嘅手臂，我嘅怒氣唔知點解好自然咁消失左，理智嘅我出番哂黎。我問佢︰「Hello，你係呀峰？」其實我已經點過佢相，不過以免佢有咩孖生細佬、孖生大佬、孖生家姐、孖生細妹，乜乜柒柒咁，唯有問清楚，費事陣間鬧錯人就唔係幾好。「咩事？你識我？」「冇，我同你都係香城中學架，你唔識我，不過我就有啲野想同你傾下咁嘅。」我好有禮貌架，暫時冇比人打。就係咁，我同佢搵左個地方坐低慢慢傾，我為免佢出手打人，所以搵左個比較多人啲嘅地方，就係深水埗籃球場，如果佢咁出手嘅話，我諗出面打緊波嘅波牛應該會路見不平。我將件事講左出黎，話芷晴根本唔介意你打波，亦唔會阻住你練波，話之你職業隊又好，香港隊又好，NBA又好，總之芷晴都會支持到底。又話芷晴日日望住個籃球場，望住你個背影，就快變望夫石啦，你睬下佢啦……up完一大輪，杜如峰問我︰「你好熟芷晴？」我呆左一呆，謙虛咁話︰「唔係嘅，不過……」佢截斷左我句野，又問︰「你好熟籃球？」我又呆左一呆，我係研究左一排籃球，但冇理由係港青面前話自己熟籃球架嘛，於是又答佢︰「唔係嘅，不過……」佢條仆街好似閘東江水咁又閘住左我句野，話︰「你又唔熟芷晴，又唔熟籃球，更加唔熟我，你點知我地拍拖影響唔大？」我諗左一陣，的確，我唔知佢地一齊番會對杜如峰打波有咩影響，但我諗起前排自己為左芷晴而苦練籃球，我明白左一件事，只要你心入面有鼓動力做泉源，無論幾辛苦嘅事，你都可以堅持不懈咁努力落去，我就係咁同佢講左呢番說話。佢冇再截斷我，反而好認真咁思考左一陣，先話︰「有好多野你唔知，係香港想做職業籃球員係好辛苦嘅事。甲組咁多支球隊，得一支係支持全職籃球員，入到去會有正常嘅人工，其他球會全部只兼職，人工少搞到要搵其他野做，訓練就專心唔到。」我問︰「所以你想入個隊收全職籃球員嘅球會？」佢點左點頭︰「但一隊波得十幾個位，有咁多人，我要爭到入去，其實好難，如果我唔而家集中精力，第日我驚會後悔。」其實佢講嘅野我都好明白，我細個個陣何曾唔係抱住想做全職運動員呢個夢想？但大個左先發覺呢個社會係好似少林足球入面咁荒謬，個個有夢想嘅人都要屈服係現實之下，有時唔係佢地唔努力，只係現實就係好殘忍。係香港，大多數人細個只可以讀書，課外活動就係補習或者樂器，運動比人當係啲冇出息嘅人先會去玩嘅野。好彩我老豆老母冇乜錢，冇得逼我去呢啲on9興趣班，我可以落街同班屋村仔踢下波，有番個童年。係香港，甲一足球隊可以連主場都冇一個，政府就賴冇球迷支持，但係就推埋哂啲濕鳩計劃，拎六千萬出黎比錢班都唔識足球嘅人搞足球，咁多年以為自己做左野，都唔肯面對真正嘅問題。全職足球員？發夢啦，全職獵人就有啦，仲要比富奸拖稿。諗諗下，唔知點解覺得杜如峰都錯唔得哂。「我依刻目標好簡單，就係努力練籃球，你同佢講唔好搞咁多野，為我好嘅話放手啦。」佢講左呢句我先記得自己出黎嘅目的唔係比佢說服，而係說服佢同番芷晴一齊。如果呢條友真係咁絕情嘅話應該點做？我係見杜如峰之前已經諗過呢個問題，感情事其實好難逼，但係我諗左個方法，係睇近排三分球神射手同細個睇嘅網球王子到學番黎，用黎激杜如峰唔知work唔work。我同佢講︰「既然你做咩都係為左籃球，今日呢件事不如就用籃球去解決。」佢呆左，問︰「你想同我one on one？」「痴線！」我好激動咁叫左出黎，同佢單挑即係送死啫，我又唔係真係戰神AI。我同佢講，我嘅意思係我去射三球三分波，如果我入左一球嘅話，佢就要同芷晴一齊番，我自己練三分個陣，命中率可以去到成四五成，三球入一球真係唔難。佢一聽到打籃球就笑左，興致勃勃到好似想即刻除衫打波咁，真係個球痴，不過都好，今次出啱招。正當我以為佢答應個陣，佢竟然話︰「不如掉番轉，如果我三球入左一球，你同芷晴唔好煩住我？」仆佢個街，討價還價？我即刻話︰「傻架咩，你港青，我廢青，點有得比呀？」杜如峰就話︰「咁又係。」「……」我唔知比咩反應佢。「不如咁啦，三球入一球太簡單，如果你三球入哂嘅話，我就聽你話，試下同番佢一齊，如果唔係就算啦。」佢已經拎起左個書包，似乎我一唔答應佢就即走。「就咁話。」正所謂唔知點樣博，單車都變摩托，最多咪唔得，輸左冇咩大不了？我拎住街場呀叔個波，杜如峰就幫我用霸氣清走哂個場啲人。我企係葫蘆頂，集中精神，虛投左幾下，等啲肌肉記憶可以番番黎。我平日練波狀態好個陣，連入八九球都試過，如果而家把握得好，三球入哂不是夢。我將個波放係右手手指上面，左手托住做輔助，輕輕一跳，右手完全向前去哂，冇半分向後收嘅力道，五指之中中指最用力，最後五隻手指直指地面，呢個係我上網學番黎嘅標準射姿，果然一投入魂，穿針入網。我深呼吸左一下，真係好緊張，因為芷晴嘅幸福係我手入面。杜如峰臉色變左一變，話︰「你原來打波咁勁，扮撚哂野？」「入一球就叫打波勁？我都想呀，講咁多，你係咪想反悔先？」杜如峰比我窒到冇聲出，之後問番佢先知，原來我嘅射姿真係好標準，搞到佢以為我好勁。我有理冇理，自己執番個波，感覺一黎，一起手就係第二球，點知呢個時候突然吹起左陣風，我嚇左一嚇，好彩個波滴左兩下籃框，都係滴番入個網入面。射入左呢球，我隻手忍唔住流手汗，真係好運，但而家情況真係有啲不妙，因為頭先個陣風吹極都唔停，仲愈黎愈大，地下啲樹葉都比佢地吹起哂。我皺起左眉頭，唔知點好，如果就咁射九成會比個風吹到唔入，最後一球決定芷晴命運，我壓力好大。就係我拍左兩下波，準備起Q嘅時候，杜如峰突然阻止左我，提出左另一個建議，佢話呢一球不如留番兩個月後嘅班際比賽再決勝負，如果我係對佢個班個陣我入到一分，咁佢就算輸。一分……雖然可以話佢好睇少我，但係我答應左，因為而家雖然得番一球未射，但係我嘅命中率係大風之下一定降到好低，輸嘅機會太高。反而班際賽入一球真係唔難，我上年見過好多唔識打波嘅人傻下傻下咁都可以拎到分，何況係苦練左咁耐嘅我，我好有信心。同杜如峰講完數，我同芷晴拍實心口咁保證，比兩個月時間我，兩個月後杜如峰一定會同番你一齊。佢見我咁肯定，問我咩原因，我梗係唔肯講啦，因為孔子教落，善欲人見，不是真善，惡恐人知，便是大惡。呢兩個月我心情好輕鬆，話咁快到左比賽個日。我一啲都唔淆，好有信心。我呢兩個月之間間唔中有落樓下個爛球場射下波，命中率唯持高水平。況且而家要入一球啫，班際籃球比賽有成20分鐘，五打五又係比較多空位，只要我走到空位冇人mark，一射就可以收佢皮，廿分鐘我嫌太多添。係開始比賽之前，我仲諗住一入左一球即刻退場然後同芷晴講哂成件事，比個驚喜佢，但可惜，最後驚喜就比唔到佢，驚嚇同傷心就比足哂。一開波個陣，兩班人各自圍圓傾戰術，佢地都係我好兄弟，答應左比哂啲波我射，我入一球就夠，點知杜如峰係我地仲傾緊個時已經走到我地附近。咸濕強望一望佢，話︰「行開啲啦，想偷聽我地戰術？」當然佢驚到一講完即刻龜縮番係人堆入面。但我地實在太天真，佢要贏波，根本唔需要偷聽乜野戰術。因為佢嘅打法好變態，而我就成為左佢變態之下嘅犧牲品。當我冇拎波個陣，佢貼到我實一實，就算我係自己個埸到，佢竟然都全程貼緊我，搞到我以為自己無啦啦多左個保鑣。我試過出口術鬧佢，咩跟尾狗、變態跟蹤狂魔、吊靴鬼……我up得出嘅都up哂，仲唔小心比球證聽到，吹左我個技術犯規。不過杜如峰都唔肯放過我，如果第日我條女好似佢咁痴身，我一定飛撚左佢，但杜如峰唔係女，冇得話飛就飛。佢咁樣全場盯實我原來就係想我連掂波嘅機會都冇。但每當佢地班拎到波個陣，杜如峰都係單人匹馬剷入籃底，佢成架坦克車咁車埋黎，我幾乎想大叫學生無罪，但點樣都冇人擋得住佢。佢每次一拎完兩分之後笑都唔笑，即刻就衝去我身邊又盯住我，一分都唔比我拎。佢強到好似籃球之神米高佐敦咁，主宰成場比賽。成個上半場就係咁樣過左，我一次起手機會都冇，但就比杜如峰一條友入左廿分。我地傾左一陣，好快諗到方法，就係做僻，佢地會幫我擋住杜如峰，等我可以乘機搵空位接波。但杜如峰真係好勁，腳步打橫咁移，成隻蟹咁，但無可否認，佢呢招蟹步好快，而且配上米九嘅強壯身軀，幾個僻都連續比佢撞低，而佢嘅步法竟然冇絲毫嘅紊亂。時間得番30秒，就係我絕望嘅一刻，咸濕強大叫左一聲︰「呀歸！上呀！」佢一轉身，成個人衝向杜如峰到，伸哂雙手要擒住佢。但下一秒，我就見到咸濕強成個人飛左上半空之中再跌翻落黎，臉露痛苦嘅表情，咸濕強呢個僻本來係犯規動作，球證猶豫左一下，竟然冇吹。一來我地班輸緊太多分，時間得番十幾秒再吹犯規都冇咩意義，二來杜如峰一啲事都冇，反而係咸濕強自己撞到人之後彈番出黎跌底，再吹佢犯規實在太過殘忍。咸濕強係呢一瞬間捨棄左自己嘅人生安全，阻延左架坦克車半秒，我終於接住左隊友嘅傳球，呢下真係有今生冇來世，我知道時機一瞬即逝，真係半刻都冇猶豫，輕輕一跳就起Q。我呢一下我出手出得好靚，係出手嘅呢刻，我知道一定會入波，成場波一球都冇射過，啲壓抑住嘅籃球火擺哂係呢一球入面，感覺就好似你停十日唔打J，之後一次過出哂一樣，一個字，爽。但係好可惜，我真係太睇少港青嘅實力，杜如峰雖然比人阻左半秒，但之後成個人跳起，跳得好撚高，我差啲以為佢對鞋裝左彈弓，一野將我個波係空中格走左，等到執番個波，比賽已經完左。輸左場波唔係最重要，反正大家本身冇諗過贏到對面隊，但係我呢一鋪連芷晴嘅幸福都輸埋……仆街，我之前仲實牙實齒同佢保證杜如峰會番去佢身邊，而家點收科？上到最尾個堂，我諗住放學約同芷晴解釋一切，但都未出聲，佢已經主動約我話放學係屋村公園仔等，我覺得事情有點唔對路，佢以前都未試過主動約我。去到公園仔，傾左一陣，其實唔係傾，主要係芷晴鬧我同係到喊，佢比左杜如峰send過黎嘅whatsapp我睇︰「吳凡歸一球都入唔到，我贏左，希望你可以守約，以後唔好搵我。」佢問我，點解咁無聊要同杜如峰訂埋呢嘅私約，入左波就一齊，入唔到就分開，咁當左佢係咩？玩具？我個刻望住佢好傷心咁流淚，我唔知點答佢。佢之後講左一樣野係令我最傷心，佢話我根本唔係安住咩好心去幫佢，話我明知自己廢，仲要同杜如峰鬥波，根本係想特登輸左場賭博，令佢地散，之後我就可以乘虛而入。我由細到大比人鬧都當人發up瘋，唔識喊，但我聽到佢質疑我真係眼都紅埋，番到屋企我訓係張床到望住個天花板係到諗，乜我冇盡力咩？我有，只係杜如峰真係太勁。乜我想佢地散咩？如果係嘅話我連射三球三分個陣已經可以專登射失，洗搞咁多野？但唔知點解，芷晴冇再搵杜如峰，我都冇再打籃球，冇再踢波，每日過住番學放學，打機訓覺嘅生活，對一個做開運動嘅人黎講，呢種生活同行屍走肉係冇分別。有一晚我飲左兩淡酒，諗番起一路以黎嘅事，忍唔住思亂如潮，打左比芷晴。佢第一句就問我有咩事，把聲又唔嬲又唔笑，平淡到就好似應付緊一個完全唔識嘅人咁。我寧願佢串我、鬧我、屌我，咩都好，都好過當我係一個唔關事嘅路人，我好難受，但係都將自己想講嘅野講左出黎。我同佢表達左一直以黎嘅愛意，我同佢講，當初同杜如峰賭個陣我真係已經出盡全力，我雖然鍾意你，但只係想你可以得到自己嘅幸福。我愈講愈傷心，把聲哽咽起黎，忍唔住將大半年前苦練球技嘅事都講左出黎。我同佢講，個日我打電話安慰你，問過你一句點解會鍾意個大隻佬，你話因為佢打籃球好勁。聽到你呢句說話，我之後就成個傻仔咁，一日到黑咩都唔做，淨係落街練籃球同喱係房入面睇NBA，將你嘅一句說話變做自己每一日起身嘅動力。每日一放學我就係球場到望住個天由日頭變做夜晚，由夜晚變做深晚，直到球場嘅燈都熄埋。每日都身水身汗，但我只要諗到自己第日打波好勁，想像你會係場外面支持我嘅畫面，我就覺得一切都係值得。我甚至連自己本身最鍾意嘅足球都放棄左，連一班波友都冇埋，但我冇後悔，只係可惜我練幾多都唔會及得上佢，所以一球嘅賭約失敗左，我點解釋都冇用，唯一想講嘅只係對唔住。講完我就收左線，喱埋係個被竇到喊、流眼淚……你可能話我軟弱，但係男人流血不流淚，只因淚未流到傷心處。第二日番學，芷晴竟然同我講話佢想打籃球，佢對我嘅眼神唔同左，似乎冇左以前嘅憎惡，我諗可能係尋晚嘅一番說話打動左佢。我地去左我樓下個屋村爛球場，佢拎起個波射左幾球都air，然後問我點解男仔可以咁鍾意打波，打到咩都唔顧咩都唔理。我諗左一諗，唔知點解，將同杜如峰講嘅一番說話同左佢講，只要你心入面有鼓動力做泉源，無論幾辛苦嘅事，你都可以堅持不懈咁努力落去。杜如峰努力嘅泉源係佢職業籃球員嘅夢想，而我學籃球就係因為芷晴，男人心裏面有鼓動力，先會識得不斷努力，希望成為一個強大嘅人。芷晴沉默左一陣，我都唔知佢聽唔聽得明。隔左一排，我以為事情一切都要告一段落，籃球又好，足球又好，都將會係我生命中消失，但係一個球場嘅夜晚，改變左一切。我有晚放學心血來潮，去左葵芳睇人打波，呢個係我輸到一敗塗地，知道自己係廢物嘅地方，但唔知點解總係想番黎回味一下，追塑一下以往嘅回憶。我坐左係到，突然有個好大隻嘅呀叔叫我出黎打波，原來佢地得五個人，唔夠人鬥波，見到我係隔離毒下毒下咁，就叫我出黎頂數。我話我打波好廢，點知呀叔鬧我，話作為一個男人點可以話自己廢？我以為男人唔可以窮啫，點知連廢都唔比，於是最後比佢推左出黎打。鬧我個呀叔好Q勁，身型成個杜如峰咁，技術好似都差唔多，但係因為我好頽，冇咩心情打，連累到佢地輸到五比零。個呀叔鬧左我一下︰「屌你，後生仔追下波走下位啦，呢碌柒咁。」當然佢自己冇咩點走位追波，可能因為佢唔係後生仔。但聽到呢句，我似乎記番起當初係葵芳呢到比一個呀叔撲落黎個下，唔知點解，心入面冒起左一團火，好想認真番一次。對面mark得我唔緊，我不斷走空位，我隊個呀叔好撚勁，又幫我僻又傳好多波比我，我一接就射，開頭兩球都唔入，但之後連入六七球，一口氣贏番場波。打完個一刻，我好奇怪，自己明明射波幾準，唔知點解係有人mark實個陣就一球都入唔到。我問呀叔，但呀叔好奇怪咁望住我，好似我問左啲咩白痴野咁。我唯有厚麵皮認真問多次，同佢講我係比賽比人mark住就好容易收皮，空哂個陣先入到，係咩原因？呀叔見我咁認真，都答番我，原來好簡單，我嘅肌肉記憶慣左係輕鬆嘅時候射波，一緊張就會大力左或者細力左，即係我臨場嘅經驗太少，係有人貼身防守之下射波放鬆唔到自己，同埋上籃一見人跳起就只係識避手，唔識硬碰。之後一段日子，我跟呀叔打波，因為已經就快去到考中五嘅期終試，我多左好多時間出黎落街場同人鬥波，熟悉有人防守個陣應該點打。心無旁務，個個係到埋頭苦溫，我就用哂啲時間黎打波。我進步得好快，甚至有時連呀叔親自mark我都比我in your face。我問過自己，當初打波係為左芷晴，咁而家呢？我練落去到底係為左乜野？我自己都唔知，但當每次踏入球場，就好想拎住個波證明自己嘅能力，唔係為左其他人，只係為左自己。後來呀叔同我講，我係佢人生中見過第二個會咁努力打波，咁有火嘅人，我問佢第一個係邊個，佢話係杜如峰。我呆左，香港籃壇真係好細，呢個呀叔原來之前打過甲一，識杜如峰的確唔出奇。霎時之間佢咁樣講，搞到我好想知道自己而家同杜如峰到底實力差幾遠，我打左籃球唔夠一年，就算再努力都唔會及得上佢，呢樣野我好有自知之明。但另一方面我都對自己好有信心，有信心唔會再好似班際咁樣輸得咁慘，可惜我已經冇再同佢鬥嘅理由。但點知去到新學年九月，發生左一件事……有晚芷晴打左比我，喊哂口咁同我講佢有左，唔知而家點算，唔敢同屋企講，唯有打比我。我呆左，咩有左？有左的咩？佢有左BB。原來個半月前，杜如峰有一晚突然打比佢，話想見佢，芷晴於是上左佢屋企。杜如峰飲到好醉，問佢咩事，先知佢去左甲一球會選拔，但最後落選左，個教練話佢有前途，但得18歲太後生，始終實力未到，幾年後可以再黎選過。我話，咁咪幾年後再去過，20歲21歲再打囉，有咩問題？芷晴都係咁講，但原來杜如峰已經冇咁嘅機會。佢屋企人逼佢去外國讀書，因為佢掛住一路打波，DSE真係差到連3322都冇，用精英運動員入大學嘅計劃泡湯，一定要準備出國升學。佢屋企人話，係香港打波冇前途，收入又少，而家社會上周街都係大學生，如果佢唔去外國學拎番張沙紙，真係等乞食啦。杜如峰梗係好堅持啦，仲話香港而家都有一間球會有全職籃球員，一個月收入三四萬，仲多過好多大學生。佢老豆話佢不自量力，香港咁多人，一間球會得個十幾個人，佢點爭？爭唔到唔通去乞食？就係咁，杜如峰走左去個間球會選拔，希望即刻可以做到全職籃球員，等佢老豆唔洗逼佢出國讀書。但好可惜，就算以佢嘅能力，都入選唔到，最後要放棄夢想，準備出國讀書。夢想霎時間破滅，我唔知對一般人黎講會有咩感受，我細細個雖然都諗過全職踢波，但係香港生活左咁耐，人愈大愈黎愈明白呢個夢係幾咁遙不可及，漸漸咁已經麻木左，覺得係香港冇得講夢想只不過係一件平常事，連傷心都冇點話傷心過。但杜如峰佢憑住一路以黎嘅努力，犧牲左無數時光，比只係識發夢嘅人更加實際，一步一步咁漸漸踏近夢想，點知係呢一刻，先有人同佢講，夢想已經唔存在啦。佢好傷心，一個大男人攬住芷晴係到喊，兩個人胡里胡塗咁就係個晚撲左，芷晴仲要有埋BB，但係杜如峰同佢講冇可能一齊，因為佢訂左機票，年尾就要飛去美國升學，所以又再次block哂contact，唔肯見芷晴。我聽到自己鍾意嘅人比人撲左，仲搞大埋個肚，忍唔住好心酸，佢係電話睇唔到，但我對眼已經紅哂，我亦唔敢出聲講野，怕佢聽到我哽咽嘅聲音。隔左一排，我就陪左芷晴去左墮胎，呢個係唯一對佢好嘅做法，佢仲細，要讀書，唔通叫佢大隻個肚番學？生左出黎之後又邊個去養？佢屋企唔有錢，亦係傳統家庭，如果比佢老豆老母知道左呢件事，一定鬧撚死。我地偷偷地去深圳落仔，我扮係BB嘅爸爸簽紙，落完之後個醫生同我講，落仔對女人好傷，叫我以後撲野記得帶套，唔好為左一時舒服而辛苦人地。落完仔一排，我怕芷晴仲傷心緊同諗唔開，所以成日除左打波之外就係陪住佢，有時買早餐同佢一齊食，有時夜晚去睇場戲，有時佢黎球場睇我打波，有時深夜叫我陪佢食糖水，好似影形不離嘅情侶咁。我以為我地咁親密，成日一齊，應該可以成為情侶，但佢有時睇睇下戲，見到女主角好慘，就會無啦啦眼濕濕咁，我好清楚佢心入面有一條好深嘅刺，有時佢黎睇我打波，係場外面又會無啦啦流眼淚，佢個刻雖然係望住我，但我諗係佢心入面出現嘅係另一個男人嘅身影，我知佢好掛住杜如峰，好想見佢。我有次嘗試細細力捉住佢隻手，佢之後好不經意咁甩開我隻手，指住前面咁話不如去買燒賣食，但我好明白，佢個刻唔係真係想食燒賣，只不過係搵個藉口去鬆開我隻手。我諗呢件事已經令到佢有心結，冇辦法展開一段新感情，唔單止佢唔開心，我都唔好受。解鈴還須繫鈴人，如果佢可以見到杜如峰，兩個人三口六面講清楚，我諗佢先會死心，所以我去左搵杜如峰。我同佢講芷晴兩個月前墮左胎，到而家雖然好似冇事，但事實上仲好唔開心，好有心結，我希望佢可以見芷晴一面。佢沉默左一陣，同我講，呢件事不如就好似當日我所講，用籃球去解決。就係咁，我地係佢離開香港之前，訂左最後一個私約，佢比一個月我練，如果我可以係一個月之後嘅one on one入面入到佢一球，佢就答應臨飛之前見一見芷晴。我知道今次杜如峰一定會比班際比賽個時更加認真咁同我打，我自知實力唔及佢，於是苦練球技，不斷跟曾經嘅甲一呀叔學野，學一打一嘅技巧，但去到第五日，出左一件我意料唔到嘅事。番學個陣，新黎嘅體育科張sir突然叫左我去教員室，我以為自己唔知做錯啲咩，新官上任三把火，唔通佢都搵我祭旗立威？我係咁say sorry，只係希望佢唔好留我堂，因為我放學要練籃球。點知隔左一陣，咸濕強、軒爺、龍哥一班人竟然都係教員室出現，全部都係比張sir叫過黎。張sir同我地講，佢希望學校重開足球隊，佢問過人有咩人識踢，又係體育堂見過我地現過兩腳波，似乎唔差，所以希望我地會係將來足球隊嘅主力。呢一刻，全部人都好驚訝，但大家已經好耐冇踢波，唔知軒爺佢地團火仲係唔係到？咸濕強眼濕濕咁話佢等左學校重開球隊好耐，一定要踢。之後軒爺諗左一諗，舉手話參加，龍哥、俊少、飛機建，每個都舉起左佢地隻手。得番我一個放低雙手，仲猶豫緊。張sir話如果加入嘅話，聽日就要遞名上去參加學界比賽，之後球隊會係一三五放學練波，應付學界賽事。但係我同杜如峰嘅決戰就係一個月之後，我本來已經唔夠佢強，如果而家仲分心去踢波，我連半分嘅機會都會冇埋。我唔敢望咸濕強，唔敢望軒爺，沉默咁離開左教員室。咸濕強佢地冇出聲，只係望住我走，佢地都知我近排成日打籃球，已經完全放棄左踢波。係呢一刻，我淨係知道，我再一次背叛左我嘅隊友。咸濕強佢地苦練球技，係為左應付學界賽，我唔敢去睇佢地嘅訓練，我驚我會忍唔住喊出黎，因為一齊踢校隊就係我地咁耐以黎共同目標。我唯有用籃球麻醉自己，只係不斷咁苦練球技，準備同杜如峰嘅one on one比賽。一個月之間，我地都為左各自嘅目標而奮鬥不懈。去到決戰嘅一日，我去到一個室內場，身高一米九嘅杜如峰著住23號紅色波衫、白色波鞋，身型高大，手臂強壯，就好似公牛嘅米高佐敦。我著住白色波衫，雖然矮佢成個頭，但係我冇驚佢，好似呀叔話齋，打波最緊要唔可以驚，唔可以怯，怯，你就輸左成世。我地鬥七分，每球都係one chance模式，只可以進攻一次，冇得搶籃板。如果我入到一球，我就算係贏左個賭約。第一球我一拎波就毫不猶豫咁剷入去，雖然佢高大，但我可以運用我嘅速度去壓制佢，可惜佢都唔慢，係我上籃嘅一刻，一手格左我落黎。之後佢嘅進攻方法好簡單，用背脊食住我，推到籃底勾手，所以我基本上冇防守嘅能力，一球一球咁輸。「點解你會鍾意杜如峰？」「因為佢打籃球好勁？」……我回想起同芷晴講過嘅野，轉眼間我已經輸到六比零。我每失一球之後嘅進攻權全部都入唔到波，我試過遠射，但佢反應好快，竟然係我出手個陣將個球擦開，我試過左右邊上籃，都比佢打走個波，假射亦都fake佢唔到。「你……你覺得如果一個人可以為左打波而飛左個女朋友嘅話，佢會係一個咩人？」「係其他地方我唔知，但如果係球場上面嘅話，佢一定係一個強大嘅人。」……我曾經講肻過，杜如峰係一個強大嘅人，我拎住個波，望住佢極為認真嘅神情，呢一刻，彷彿我面對緊嘅唔再係杜如峰，係籃球之神米高佐敦。最後一個機會，我嘅幸福掌握係自己嘅手入面。我突然記起一個動作畫面，係心入面諗左一諗，模擬每一個動作同細節，下定決心之下，終於郁左。我左手拍波，佯裝向左切入，極速黎一個Crossover將波運番去右邊，杜如峰第一下有少少比我fake左，但好快轉番過黎對實我。我右手將波由跨下Cross番去左手，左手拍左波兩下。再黎一次更大動作嘅向左切入！佢今次真係以為我要切入，腳步一上，半個身已經對住左我嘅左邊。我係呢個時候迅速再黎多一個Crossover將個波運去右邊，我知道時機一瞬即逝，於是即刻右手抄起個波，左手托住，就黎個jumpshoot，但同時間佢已經回身跳起，向籃球伸出佢嘅右手……「呀歸，你會唔會成日諗……自己有一日可以好似一啲好勁嘅籃球員咁，一跳就掂到個籃框，然後將個波放入去？」「爆籃就冇諗過，但係都會希望自己平時打波可以勁到好似NBA球星咁嘅。」……呢一瞬間，我彷彿變成左戰神AI，出盡全力用左兩個Crossover之下，佢終於係慢左一步，阻唔到我射波，皮球打左兩下籃框，最後跌左入網。杜如峰遵守左佢嘅諾言，係臨飛個一日，去左見芷晴，我企係遠處，望住佢地見面。我唔知佢地講左乜野，只係見到兩個人講左一陣，然後芷晴眼淚就流左落黎，成個人投入左杜如峰嘅懷抱之中。杜如峰都伸開左雙手攬住左佢，任由芷晴係佢心口上面喊左一陣。之後先輕輕咁將佢推開，講左兩句，就撘的士走左。我唔知佢地之間講左乜野，只係知道芷晴已經開朗左好多，亦唔會再係戲院入面偷偷地咁流眼淚。我唔知佢放低哂杜如峰未，亦都唔需要知道，只係默默咁守護係佢身邊，照顧佢，帶快樂比佢就已經好足夠。隔左兩個月，我收到消息，咸濕強佢地要踢學界賽啦，我當初拒絕左加入足球隊，已經冇得再同佢地並肩作戰。但係我都好想咸濕強同軒爺佢地可以係足球場上大放異采。我驚佢地仲怪我，所以唔敢去睇比賽，但係芷晴唔知點解拉左我去，話想睇嚇人踢波。我唔知佢幾時有睇人踢波嘅嗜好，但佢叫到我唯有陪佢。我一去到個陣就見到咸濕強，我見到佢手上拎住一啲野，係一件全新嘅七號球衣，上面寫住我嘅英文名，之後芷晴係個袋入面又拎左一對波boot同襪出黎，好明顯係佢係我屋企到偷番黎嘅。原來咸濕強同一班隊友都冇放棄過我，一早叫呀sir加埋我個名上去，等我有火嘅一日再番番黎同佢地踢比賽。我望住佢地兩個，諗番起一路以來嘅事，除左百感交集，唔知可以再用咩去形容我嘅心情。芷晴突然捉實我隻手，同我講︰「吳凡歸，今日，我想睇人踢波。」我著好波衫，綁好波鞋，踏入草地場上，微風吹起左我嘅頭髮，呢一刻，我唔再係毒撚，我就係c朗拿度。屌佢老母啦

[圖擷取自網路，如有疑問請私訊]