(100%本人真事) 轉行做左"倫敦金" 之後既生活,原來係咁多姿多彩到...我都唔信

:0:0

拎住呢38萬支票即刻過尖咀拎返套西裝：「黎生，等您好耐喇！咦？好啱身喎！」一起雞巴佬幫我著起套黃色三件頭，黃色夠鮮Cutting夠貼，著上身係幾型喎！黃色係搶眼咗啲，我諗要恤返個靚髮先Carry到。拎住套西裝去相熟Salon，一坐低髮型師Noel就問：「點呀Leon今日都係修修佢？」今時唔同往日，本大爺今次唔係修修佢咁簡單，同我剪到好型棍！

「嚇…型棍咁空泛？可唔可以形容得實際啲？Er…有冇話邊個明星咁呢？」實際啲…型棍…明星…呃！一諗起型棍髮型嘅潮童明星，腦海就即刻響起「無言的親親親侵襲我心，仍寧願親口講你累得很」冇錯！講到型棍一定係比比鳥，冇得輸！即刻同髮型師講：「我要陳柏宇頭！」佢皺咗一下眉頭：「陳拍…乳……邊個嚟㗎？」嚇《你暪我暪》都唔知？呃…有有有唔緊要！市面上仲有一隻比比鳥…好似又係姓陳……陳…陳柏……唔係唔係…係陳子…陳咩呢……唔記得個名㖭……Er…打籃球！「Fishman Lok？」唔係！唔係余文樂！係陳咩咩…陳……陳鍵鋒？唔係！陳山聰？唔係！陳港生？唔係！Er…賣衛生巾嗰條友呀……「哦屌周柏豪呀嘛？！」係係係！係周柏豪喇！！！我要剪個周柏豪頭吖唔該！

平時唔多姿整嘅我發夢都冇諗過自己會剪個潮童頭，雖然一直都想剪但又驚Carry唔到俾人笑，今日剪咗之後又覺得幾好，簡直係全身暑假投奔初夏幻彩沙灘彷似我的家，望住鏡入面嘅自己有啲陌生，簡直脫胎換骨，原來黎明可以型到咁！即刻入廁所換埋套黃色三件頭出嚟試新Look，我唔係講笑唔係呃你唔係整蠱唔係搵笨唔係誇大！鐵一般事成個吳彥祖咁款，嗰種自信嗰種謙謙君子嘅魅力隱約滲出半唐番感覺，好似維港啲聖誕燈飾咁耀眼、同漆黑中嘅螢火蟲一樣咁出眾！連自己都唔敢相信，That"s true！

作為一個出色嘅金融才俊，咁先至似樣嘛！連髮型師都睇到呆曬，佢應該從來冇諗過黎明可以型到呢個點！挺起胸膛，滿懷自信咁去畀錢，一百八十蚊，畀夠兩草齊頭二百唔使找，當請你飲茶！改頭換面，當然要換返幅靚仔Profile Pic，純文字畀唔到你睇我有幾型，不過你可以幻想嚇吳彥祖、草薙京加變相怪傑，企喺條街仲Sharp過安全島啲黃白色指示燈，上至馬路上嘅司機下至行人路上嘅途人都因為我嘅耀眼而差啲一個唔留神撞埋欄，你就知比比鳥頭加黃色三件頭嘅化學威力有幾強大。Update咗張Profile Pic十分鐘已經有31個Like，比我平時啲Post嘅讚好足足多出三倍，仲引嚟四方八面嘅留言，除咗朝見口嘅同事，仲有唔少稀客。中學同學Barry：「Wow look so smart！！」

老竇公司個採購經理強叔：「出左去果然唔同D，叻仔！」景頁哥Team同事豪仔：「型！」艾大同事Ronny：「好大疊錢@@」老竇公司個Sell屎阿輝：「好仔不吃爺田地，太子仔好嘢！！」艾大同學George：「今時唔同往日La wo Leon！型左咁多！」景頁時哥Team同事謙少：「有料！」一齊追AKB48嘅朋友Kenny：「あなたはとてもスマートに見える！」sponsored 艾大同學Dave：「黃色西裝好難Carry，有料！」就連來自阿斯嘉國嘅雷神Thor都話：「好型呀！今晚不如一齊LOL？」呢$8000抵俾！

買到嘅除咗一個專業形象，最重要係一份珍貴嘅自信，所謂先敬羅衣後敬人，而家齊曬件行出去每步都大步啲呼吸都大啖啲，你問一套西裝真係可以改變到我咁多？你到底明唔明其實唔關套西裝個Outlook有幾靚個Outfit有幾啱身，而係我嘅財力Support到我去買一套$8000西裝！你一個月搵唔搵到38萬？買唔買得起呢套Cutting一流用料上乘嘅森巴舞西裝？你一日買唔起或唔捨得買起都唔會明白我而家嘅諗法。就好似Weekend都要搭巴士地鐵嘅你，根本唔會明白揸私家車點對點嘅快捷同舒適，只會葡萄話唔環保、搵停車場泊車仲耐過港鐵故障Blahblahblah，夏蟲不可語冰，嘥氣！

恤型個頭已經七點，電話響起：「明哥，時哥帶隊食好西喎！你嚟唔嚟呀？」好可惜聽朝要早起身，十點半約咗梁師奶上公司簽單，因為要就佢開舖，亦因為聽日中午後啲會議室Full曬，焗住晨咁早返工。食飯啫！食完咪早啲返去囉？唉唔好喇，唔出現唔多覺好地地，食完飯話有事走先，菲密時一定話我唔畀面！都係算喇，做嘢緊要，搵到錢先最重要。出咗糧想任性嚇唔想又沿住條紅線轉綠線再駁藍線去啡色線返屋企，今晚想遞起隻手就有人嚟接我返屋企：「司機唔該沙田雅典居！」啲土豪成日話「有錢就是任性」，以前以為任性會好奢侈，但原來呢個任性都唔係好貴，由尖沙咀返沙田，計埋間歇性塞車同隧道費其實都係$140，對月入接近四十萬嘅我嚟講簡直皮毛，不過講真，的士真係唔太好坐，個個司機都大腳去大腳收成程車Chok嚇Chok嚇，特別係嗰啲新款四座位Comfort，比上一代多咗個Turbo，搞到啲司機個個當曬自己係格蘭披治車手亂咁起圍，見前面有少少位都要踩著個Turbo衝一段先至開心，嗰種好似揸F1方程式逢車過車出灣大油小路抽頭直路地板油嘅駕駛態度唔係個個乘客識欣賞，例如一等良民嘅我就習慣線性駕駛，所謂路上零意外香港人人愛嘛！冇錯我係少咗份年輕人應該要有嘅速度與激情，最大原因係因為俾老竇小得多……

由P牌開始佢就將我當成假日司機，Weekend只要屋企邊個成員要出街例如阿嫲去睇中醫、老母去打牌又或者姨媽同老母出市區Shopping，都係由我充當柴可夫承包接送，初初載住佢哋出街，老竇好似教車師傅咁全程鬧爆：「小路出大路望望鏡先啦，係咪想撞泥頭車全家死曬呀？」、「落斜推返個S波啦，你長期踩住個迫，好快就過熱失靈啦！」、「紅燈喇仲畀油，衝咗紅燈你由頭考過㗎喇！」、「轉線打燈啦！後面啲人係你肚入面條蟲知你諗緊咩？」、「頭先望唔望到地下有灘水？你一嘢輾埋去而家成個車底濕曬喇！」、「開快少少啦！上高速都行60，係咪想畀啲大貨櫃撞落海呀？」、「喂全車人鞠曬躬喇！可唔可以唔好一嘢Dup死架車？」、「轉右啦仲望？轉呀！唔轉又紅燈有排等㗎喇！」、「望鏡呀！隔籬條線你行曬㗎？」、「過啦仲等！唔過冇得過喇！」、「望住前面啦！有咩咁好睇要成日望鏡？」、「望鏡呀！你次次轉線都唔望鏡，你死好喇唔好累死埋全家呀！」、「專心啲啦又望倒後鏡，後面有金執咩？」、「望嚇後鏡啦，側鏡有死位㗎！」

我就係咁樣由廿二歲開始被培訓成一個擁有良好駕駛態度同習慣嘅道路使用者，對其他司機嘅駕駛習慣自然特別敏感：「司機大佬，可唔可以開慢少少？」個的士司機喺倒後鏡瞄一瞄我：「老細，我唔係淨做你呢轉㗎，包容嚇啦！」頂你個肺，抵你哋俾Uber頂死！

[圖擷取自網路，如有疑問請私訊]