女人10大「嬲豬」舉動！男人唔學好註定溝唔到女！

:0:0

好多男人都覺得女人其中一樣難頂習性就系口是心非！明明就嬲緊，問佢又要話︰「我冇嘢喎！」
整你個掣丫！睇你塊面黑過古天樂都知你咩事啦，系唔知邊單嘢辣著你咋嘛，唔氹返你轉頭咪又系老子受氣，乖乖地講個原因出嚟啦！
雖然你心入面暗罵對方八婆臭四，但話曬都系自己女人，都系要強顏歡笑問佢︰「BB，你系咪唔開心呀？」結果條女都仲要同一個語氣話︰「都話冇嘢咯！」再問再答，都系同一個回答，呢一刻，你突然感到迷茫，心入面浮起一種錯到貼地嘅想法︰唔通系我多心？佢真系冇嬲？
於是乎，你做咗一個好錯嘅決定，你決定放棄追問，真心當佢冇嬲豬，之後系點？
非單身狗，你懂的，咪就系俾條女爆你唔關心佢咯……

雖然知條女句「我冇嘢喎！」實有啲嘢，但一個大話講100次，總會神推鬼拱地錯以為真，就算你依舊清醒，但女朋友堅稱「我冇嘢喎！」，你都冇證據證明佢嬲而展開談判，呢個時候，你應該點做去打動企硬嘅女朋友，令佢軟化呢？

其實女仔口是心非，好多時都系希望唔使自己講出口，對方都會明白自己諗緊咩。可能你會話，冇tips點知你嬲乜？系架，女人嬲嘅嘢男人未必知，但如果你從細眉細眼嘅事物，留意到女朋友嬲豬，女人一樣受落，因為女人呢個moment在乎嘅，未必系你能唔能夠成功氹返佢(其實女人自己都知，好多嘢都系自己攞嚟嬲)，而系你緊唔緊佢，留唔留意佢。不妨試下透過小動作，搵出你女朋友嬲緊嘅徵象，話返佢知，你點解覺得佢嬲，證明你注意佢，關心佢，就好大機會可以打開佢心房，等佢話你知乜事。

咁通常女人嬲嘅時候，除咗講「我冇嘢喎！」仲會有咩特徵呢？以下呢幾個point，男士們好快快手mark低佢啦︰

1. 對方訊息變得好被動
平時成日主動搵你，但嬲嘅時候就會成日唔搵你，你搵佢先應下你。
2. 回復好簡短
平時回復訊息都水蛇春咁長，仲要加曬emoji，但嬲嘅時候就一句起兩句止，離不開「哦」、「ok」、「系」呢啲極短句子甚至單字
3. 應得好慢甚至已讀不回
平時訊息都會秒回，但嬲嘅時候就十世都唔應機，甚至明知佢睇咗個訊息都全無反應。

4. 傾電話時對方一直唔多出聲
平時好多嘢講好多嘢呻，但嬲嘅時候十問九唔應，又唔多出聲，長期dead air。
5. 同佢講嘢對方好似句句都有骨咁
「系咩？咁咪幾好咯～」、「開心啦你～」隔住個mon都聞到陣酸味～

6. 唔肯同你有親密接觸同眼神交流

當對方嬲緊嘅時候，想掂下佢都好似嫌你污糟咁，避開都算，仲要流露厭惡神色，眼尾都唔想望你。

7. 問佢嘢都系「是但啦」、「冇所謂啦」等等答案
擺到明唔想同你多講一句，凈系企圖敷衍應對就算！
8. 小事化大
小小事都要搞大件事，比如笑得大聲啲就話你好嘈；講多兩句又叫你收聲唔好咁煩～

9. 唔在乎你嘅感受
明知你唔鍾意嘅事又偏要做，好似存心整到你唔開心咁。
10. 用好中性嘅稱呼叫你
平時BB前BB後，而家就咁叫你個名，又或者直接喂你就算。