如何 $7000 養活港女而不失霸氣

:0:0

信不信由你，只要閣下生於小康之家，$7000 都可以同港女女朋友「BB」過得開開心心。

住

首先，一定要做個孝順仔。所謂小康之家，一定要住私人樓，最少都居屋。住間屋有個房仔係必要的，一來慳返炮房錢，二嚟，最起碼俾BB有個小小的私人空間，喺度過夜，起左身唔出廳都總叫有個地方Hea。BB問你點解唔搬出去？你答想照顧啊爸啊媽，佢即刻吹你唔漲。

食

做一個細心嘅男朋友，幾時都要入得廚房。平時只要減少出街食飯，又慳一大筆。你可以大條道理話俾BB聽乜嘢係識食，香港根本好多餐聽都係垃圾，食嘅嘢全部唔駛點整，專呃遊客錢，BB一定話你係叻叻豬。加上行街嘅時候多啲去超級市場，睇吓食材，佢一想買A, 你話A街市買新鮮啲，想買B，上網訂平啲，想買C呢，你答759都有，要幫助良心老闆，又過一關。

Shopping

作為一個精打細算嘅香港人點可以無淘寶 account ? 總之唔好怕煩。平時開始潛而默化佢，而家祖國強大，全世界嘅名牌70%都係 Made in China，連 Prada 都係啦，所以，要買Made in China 最醒目就係同返大陸人買。香港咁貴租，係啲強國人咁聰明要喺大陸落嚟，幫地產商交租，俾十倍錢買返件大陸貨返大陸，仲要排隊輪米咁輪，買完鬼咁歡喜，因為佢自己已經用行動證明咗，大陸真的強大起來。同BB講，我地係聰明嘅香港人，唔好同啲鄉下佬一樣中意去名店。

行

無數經典嘅戀愛故事，總少不了一場男女主角，係巴士、電車邂逅嘅場面，同BB講，你想見多佢幾面。一個唔覺意，是但一個住喺天水圍，來回三個鐘車程，喺車瞓埋喺屋企要瞓嘅時間，屋企又可以打多兩鋪機。久唔久帶BB去石塘咀答電車落筲箕灣食車仔麵，又多日行程，又唔怕BB發茅亂洗錢，一舉兩得。

禮物

女仔當然要 tum 架啦，禮物一定要送。但唔一定要送手飾，手袋，因為物輕情意重。得閒留意下 7-11/ Circle K 有乜印花儲，換齊一套 Hello Kitty 瑣匙扣，BB 一定開心到上天。最重要係，你可以係Facebook吹雞要印花，錢都慳埋。

生日

平時慳埋慳埋，大時大節就真係唔慳得喇，帶BB出去食餐好架啦。但慶祝又唔一定要食晚餐，因為Lunch 一定平過Dinner 好多，又唔駛懶浪漫咁開支波爾多紅酒。詐詐帝帝叫佢off 一日去食個lunch, 然後帶佢去石澳下午茶。點解去石澳？因為得一間爛鬼茶餐聽咁嘅地方有茶餐食，有靚景又平，掂晒。夜晚同BB講話有驚喜比佢，食飯前返屋企。返到屋企呢，拎個細Size 嘅 Tony Wong 枚瑰花蛋糕出嚟，包BB一定心花怒放，最重要係，兩個人食蛋糕梗平過出去食Buffet啦！大時大節梗喺屋企煮西餐，煎塊心形牛扒，幫襯老蕭間超級市場賣支紅酒，兩塊扒，一餐唔駛兩嚿水。

港女BB其實好易 tum架咋

[圖擷取自網路，如有疑問請私訊]