【下集】山寨貢茶一夜間變「喜茶」　網民爆seed：又想呃人 | 真心膠 | 膠Hub

早前有連登巴打發現太子界限街有間台式飲品店「貢茶」怪怪地，啲包裝用殘體字之餘，嘢飲嘅味道仲怪怪地。點知事發之後突然一晚大變身，到底發生咩事？
閱讀全文

唔知大家仲記唔記得呢間本身係貢茶嘅茶飲店，貢茶官方證實咗佢唔係真嘅加盟店之後，事隔一晚，招牌竟然變成元品茶，最搞笑嘅係個logo同大陸依家最hit嘅喜茶差唔多。根據「喜茶」網站，logo係一個飲緊茶嘅男仔卡通，而「元品茶」就係女仔版嘅喜茶logo。

唔係講笑，區區一個晚上，個招牌就俾人換咗。

呢個先係真正嘅喜茶。

網民紛紛批評，話點解香港人依家咁折墮，連大陸老翻嘅習慣都學埋。


肥仔黎都覺得啱，其實個老細可以一晚搞咁多嘢，點解唔將能力用係正確嘅地方，用自己實力去創業，而係咁樣博大霧。

呢度睇返上集：台式飲品開到周街都有，就快好似7仔咁，總有一間喺你附近。香港人對珍珠奶茶嘅喜愛程度真係有增無減，有啲人為咗搵錢，真係咩都做得出。話說有網民喺連登開Post， 話自己喺太子附近買咗杯「貢茶」，點知好似係假嘢，仲要印有簡體字！連「貢茶」都有山寨版，真係唔知有咩係真……

講到台式飲品，一定係珍珠奶茶！而之前未有咁多台式飲品嘅店鋪時，香港人最常飲嘅都係ShareTea、貢茶、天仁茗茶等。但依家台式飲品嘅選擇愈來愈多，而我地最熟悉嘅貢茶竟然出現「山寨版」！唔知你又有冇飲過呢？
話說有網民喺連登討論區發帖，就話喺太子嘅長沙灣道有間新開嘅貢茶，點知買嚟試一試，就覺得好似係假嘢……事關連店鋪嘅裝修同飲品包裝，茶嘅味道都唔似一般貢茶，好奇心嘅佢就上網搵下係真唔係，先發現呢間貢茶原來係「山寨貨」~

而呢間店嘅招牌又真係寫住「貢茶」， 餐牌同價錢都同正版嘅貢茶一樣，而啲職員都著左印有「貢茶」二字嘅圍裙，唔講真係唔知係山寨版。
最搞笑嘅係飲品嘅杯身LOGO同正版貢茶一樣，但假貢茶嘅杯蓋上嘅口號同標籤就用咗簡體字，你話唔係假嘢都冇人信啦……

有網民發現，喺淘寶可以隨便買到貢茶嘅膠杯、杯蓋，所以話淘寶真係山寨貨嘅天堂~
為咗證實係真係假，網民就聯絡貢茶台灣總公司，而對方就回應話呢間係假冒店，會交由相關單位進行處理。

其實喺大陸已經有好多「山寨版」嘅台式飲品，只係估唔到連香港都有……所以大家以後買嘢時，真係要小心中伏啊！


膠通消息來源：連登


[圖擷取自網路，如有疑問請私訊]

本篇	不想錯過? 請追蹤FB專頁!

喜歡這篇嗎？快分享吧！

前一頁 後一頁