陳詠謙絕對係家政老師人選！16個藝人轉行做老師可以教呢啲科

對於某啲學生哥嚟講，返學已經夠悶，日日對住同一班嚴肅嘅老師就更悶！日前有網民以「如果啲藝人走去做老師，佢哋會似教邊科？」為題喺連登出post，唔少網友都留言選出心人選，如果有呢班藝人教你以下嘅科目，唔知會唔會激發你想讀書嘅衝動呢？
撰文：Evita | 圖片：東星、節目截圖
Cap嚟見我
16個藝人轉行做老師可以教呢啲科中文科—周柏豪好多人都以為一身潮Look兼打開籃球嘅周柏豪係體育科老師人選，但係佢真正嘅技能係寫作啊！有「樂壇大文豪」之稱嘅佢，喺2012年為一隻打爛咗嘅水杯寫咗篇短文，文中有齊描寫同抒情手法，仲道出一個人生道理，如果有周柏豪教大家中文，相信同學仔必奪5星星。

「原來人生覺得最爛的事情，也未必是最糟」周老師教導大家，遇到挫折切勿放棄！
英文科—吳彥祖喺美國長大嘅吳彥祖，靚仔之餘又識講流利英文，相信女學生上佢堂就成個人精神晒。

除咗英文，吳彥祖仲識普通話、上海話、廣東話、西班牙語，想學外語嘅學生們可以喺課餘時間請教下吳sir！
數學科—王梓軒做人就最梗要唔好畀個框框框住自己，想法要有創新先可以突破舊有想法，有「神算軒」之稱嘅王梓軒曾經喺節目上講過前所未有嘅數學理論。

2015年王梓軒喺無綫節目《Big Boys Club》訪問李逸朗（Don），當時Don分享自己無錢時曾經喺北京做抹大廈外牆以幫補生計，一日搵百幾蚊。點知王梓軒突然講：「百幾蚊一日，一個月都有三萬幾。」就被心水清嘅網民即刻封佢為「神算軒」同「數學大師」，相信由王sir教數學絕對教到學生唔好讀死書！
通識科—黃子華有睇過黃子華棟篤笑都會知道，子華神經常用幽默方式去探討時事，易入腦之餘又一定唔會覺得悶。
地理科—周潤發發哥經常行山，相信好熟悉香港地理，如果由佢帶學生實地考察，家長都一定放心。
化學科—方力申方力申曾經喺電視節目《美女廚房》中憑肉眼就分得出啲奶係真定假，真係化驗程序都慳返，由佢做化學老師，應該可以教到學生目測任何嘢都分辨到當中成份。
中史科—古天樂「下一世，別理誰叫高祖；別要賭，天命最高。」曾經喺秦朝生活過嘅古天樂可謂歷史界KOL，學生可以掉低教科書直接問呢本「人肉歷史書」，更有可能得知教科書以外鮮為人知嘅秘聞……
經濟科—劉青雲劉青雲喺92年劇集《大時代》入面創造大奇蹟日，有預知股市升跌能力嘅佢，話唔定會教學生投資添。

家政—陳詠謙由陳詠謙填詞，陳柏宇主唱嘅《別來無恙》，入面一句「我現時自己肯造飯」成為全首歌最入腦歌詞，後來更被改編成成首歌都只有呢一句，睇嚟陳詠謙做家政老師絕對走唔甩。
音樂科—黃宗澤連樂壇天王陳奕迅都抵受唔住黃宗澤嘅「音魔功」，證明澤仔已經登上樂壇高峰。而且同學仔唔使驚有師生隔閡，因為澤仔會想同你哋hoho地相處。

游水—馬浚偉喺暴雨警告訊號底下都可以安然無恙游水嘅馬浚偉，絕對可以教到學生求生知識。

視藝科—李克勤當年曼聯死忠粉絲李克勤，拎住親手製作嘅紀念品送畀領隊費格遜，點知最後發現紀念品被棄置喺更衣室。不過老實講，其實份禮又真係唔算樣衰，睇得出克勤係用心良苦去製作，如果佢做到視藝老師就可以教學生整紀念品喇！
戲劇系—陳芷菁由著名主持及司儀陳芷菁大師教授戲劇，大家除咗可以了解莎士比亞之外，更可以大大聲對外講：「我讀Drama㗎！」攞返個彩都好啊嘛！

機械工程—羅家英失敗乃成功之母，作為一個工程師或發明家，就必須有勇於挑戰同創新嘅思想。如果由羅家英教大家機械工程，必定能夠發明劃時代偉大發明，下一個諾貝爾化學獎得獎者分分鐘係你！

代課老師—鄭伊健向來老師請假學生都會變甩繩馬騮，如果搵鄭伊健做代課老師，學生一定唔敢恰佢，因為鄭Sir分分鐘會早過你出手。
校長—黃秋生黃秋生做校長嘅資歷都數一數二，不過多年嚟佢嘅學生都係豬、牛、龜等，要佢一下子面對人或者需要多啲時間去適應。
黃秋生間唔中都可以替陳芷菁教戲劇，又或者代替陳詠謙上家政班教大家整人肉叉燒包。

如果以上嘅藝人都搖身一變變成教師，你哋又有無興趣入學呢？
Cap by 新假期


[圖擷取自網路，如有疑問請私訊]

本篇	不想錯過? 請追蹤FB專頁!

喜歡這篇嗎？快分享吧！

前一頁 後一頁