巨聲．靚聲—Jaguar F-Type SVR

:0:0

Text: John Kai Chin Chan早前得知Jaguar英國總廠推出馬力達300匹嘅2公升四汽缸Turbo版F-Type，睇過幾篇英國行家嘅試車報道……評價都幾好。相隔無耐，知道可以喺香港試揸F-Type最高級別SVR，的確有期待。 F-Type SVR有硬頂（Coupe）及開篷（Roadster）兩個車型，前者258萬，後者268萬。F-Type喺英國本土賣11萬鎊，呢個水平連一向「撐國貨」嘅英國汽車編採人員都嫌貴，而且巿場上太多好對手，要出位，唔易。

冇緊要嘅，最緊要你鍾意，有feel。好多老婆或女友，唔會理解老公點解使二、三百萬買部保時捷911，因為佢哋唔鍾意車嘛。 F-Type SVR，前置5公升V8超級增壓引擎，575匹，0至100km/h加速3.7秒，出奇地非後輪驅動，而係配四驅，兩個座位，1720kg。

坦白講，揸咗F-Type SVR一陣，我覺得佢偏重，如果以一部中大型GT嚟講，咁係合理，但F-Type SVR嘅外形偏偏又幾討好，望落瀟灑之中又有少少玩世不恭同輕挑，重量理應唔會多過1550kg。

或者咁講啦，F-Type SVR配得四驅系統，就係想呢部車有更高「安全系數」：易揸、易揸得快，仲要喺極高速下都好穩定，老老實實想將強勁馬力「灌」落四條車呔，唔係想你做FR Drift King。咁好明顯同部份人對英國大馬力跑車嘅印象有極大分別，佢哋嗰套係：FR佈局，好大power嘅尾轆車，大油出彎條尾係會走吓走吓，甚至係大甩尾。

F-Type SVR喺山路嘅循跡力，的確好好，始終頭265尾305車呔嘅配搭，先天已好夠grip，而且路面乾爽又夠熱。呢套四驅喺大部份時間，都係將大部份動力傳畀後輪，前輪因此冇被過份管束，以配備四驅系統嘅跑車而言，F-Type SVR嘅車頭算係幾肯入彎。即使車係重啲，但跑彎仲保留到積架傳統中型房車、Coupe或2+2嗰種平衡流暢嘅行車動態。值得一提，後懸好貼服，尤其係起伏稍多嘅舊路，快揸都好安心。

你問我F-Type SVR最吸引之處我會揀引擎重點唔係因為馬力接近600匹，亦唔係因為佢大容積，扭力好吸引。係因為超級增壓器（Supercharger），佢有別於當下德國跑車配Turbo引擎，往往靠排氣系統「調味」，將把聲搞得立體，搞得企理。F-Type SVR嘅引擎，喺新娘潭路一帶嘅山路，非常之有震撼力同感染力，引擎「深呼吸」大力索空氣嘅節奏，司機完全感受得到，就好似騎住一隻跑得好快嘅動物搏晒命衝呀！衝呀！

排氣喉方面，雖然調聲手法係誇張咗啲、刻意咗啲，更可能over咗少少，但站喺玩樂之中又可以日日揸嘅開篷跑車嚟講，仍算係合理，排氣喉設有兩段運作模式，有得切換。

動力方面，呢副5公升V8 Supercharged機器，唔會好似當下相近容積Turbo機器咁，紮實緊緻得好似用鐵錘兜心窩死你，佢嘅轉數都上得快，而且輕鬆，即使「力大」，都係嚟得廣闊雄厚、舒暢，而唔係急迫得令你透不過氣，好似鵝鴨被灌食咁樣。你不妨以相當膚淺啲態度去分析，呢副引擎幾啱香港地，自己耳仔固然之爽，路人或四周聽到你部車「呼呼聲、哄哄聲」，每當收油，排氣喉都有「嘞嘞聲」，好刺激，視線都畀你鎖住，高收視呀！

8速自動波箱，好順，傳遞動力嘅質感都幾紮實穩當。情況上我當然希望佢喺手動轉波模式嘅加、減波有更快表現，但天外有天，唔可以對傳統自動波箱有太高要求。

F-Type SVR喺引擎及加速性能數字上夠交差有餘，機械配搭喺同級車或積架自身而言，其實都已相當不俗，得分極高。要挑剔嘅話，我略嫌車廂襯飾仲未夠辛辣，廠方日後再發展呢類車，不妨考慮添加少量碳纖裝飾。

好在，F-Type SVR係車靚嘅、性感嘅，而且尾翼呀、尾燈呀、車頭氣壩或鬼面罩嘅製作都仔細認真。正物色呢類新車嘅巴打，去Showroom望吓囉，買唔買係一回事，至少要記得英國車壇曾經有過一款咁嘅辣車。
Jaguar F-Type SVR規格車型：雙門兩座代理：Jaguar Hong Kong www.jaguar.com.hk體積：（長）4475mm x （闊）1308mm x （高）1885mm軸距：2622mm引擎：5公升 V型8汽缸32活瓣超級增壓，前置引擎壓縮比：9.5：1馬力：575匹/6500rpm扭力：71.4kgm/3500rpm波箱：8前速自動，四輪驅動懸掛：（前）雙搖臂；（後）雙搖臂制動：（前）透氣碟；（後）透氣碟0至100km/h加速：3.7秒極速：314km/h行李艙容積：207公升油缸容積：70公升車重：1720kg（淨重）輪胎尺碼：Pirelli P Zero 265/35 R20 99Y（前）305/30 R20 99Y（後）

[圖擷取自網路，如有疑問請私訊]