父子的浪漫沖繩改裝Pick Up Truck

:0:0

同齡朋友們開始生仔，有時睇住佢哋所謂嘅「親子樂」就係一齊拎住部電話睇Youtube，都真係有幾分唏噓。世界越黎越多嘢玩，兩父子相處時間已經少，要一齊坐低落手落腳完成一年作品就更有難度，更加唔好講要喺日本砌起一架改裝Pick Up Truck。正因為難得，所以以下呢部身處沖繩嘅Datsun 620先咁值得介紹。

呢部620原本係美國青年Kei嘅爸爸擁有，喺某一個生日嘅時候就送咗畀Kei。後來成家搬去日本，部620亦都跟埋去。本來Kei只係將部620當成代步工具，可幸嘅係佢爸爸原本就係個汽車改裝愛好者，耳濡目染之下Kei就開始改裝自己部車。受惠於620嘅簡單結構，Kei能夠因應自己嘅喜好大副改造車身，所以雖然睇落唔多覺，其實成架車每個部份或多或少都經Kei同爸爸嘅手修改過。

為向Skyline致敬(Datsun係日產旗下分系)，Kei將本身係直間嘅前散熱進氣欄拆咗，重新製成目前嘅兩片網狀進口氣；為咗提高操控，全車亦換上空氣彈簧避震，而又為咗放套避震，所以Kei要改動部份車架，而又因為要改個車架，於是個入油位就由車側搬咗上車尾貨艙之中，並以一個特別塗裝嘅工具箱中。

輛拱上嘅螺絲原本係來自Kei爸爸嘅Datsun 240Z跑車，但佢認為更加適合620，於是就送咗畀Kei。而黃色嘅六孔軚鈴就係一Set 15吋嘅Enkei Decem Sports。引擎方面目前仲係原裝嘅L16，不過Kei就話佢都就黎打柴，所以已經準備好副來自日產S13嘅CA18DET引擎替換。

車身內嘅儀表都係來自AutoMeter，Sparco L360軚盤就安裝於一個可以上下扭動嘅組件之上，而上面紅色嗰粒掣就犀利啦，係個響咹黎。車內冇太多誇張嘅裝飾，即係有碌頗有小巴風情嘅長身「泡泡膠」波棍，同一個心型地鐵扶手。最大工程係為咗放套音響，要再次由車尾貨艙偷位。

事實上整間車最麻煩嘅唔係改裝，而係令其能夠成功拎牌於日本路上行駛。尤其係Kei曾經改裝車架同避震，於是日本方面就要求佢哋拎架車去測試，通過之後再拎文件黎申請。呢樣就考起Kei父子，好在一次因緣際會之下，一個陌生人見到Kei呢架車泊喺路邊，好奇及欣賞之下就去搭訕，點知呢個男人就有儀器可以為部620做測試。於是年半後部車終於可以上路。