有無發覺香港D女仔成日都講我要求只係「愛我，正正常常, 無不良嗜好既男人就得」

:0:0

呢排成日見到呢度唔少中女話好難搵到男朋友. 又話"只係"想搵個正正常常, 樣貌收入中等, 無不良嗜好既男人, 但都係搵唔到, 唔明點解. 其實, 答案都係不離果三樣.
1. 你既要求離地, 無視"市面上"仍然單身但又想結婚既男人, 點解仲係單身.
2. 你無正視你自身既條件唔match你既要求.
3. 你無行動.
事實上, 一個"正正常常, 樣貌收入中等, 無不良嗜好既男人", 在一個以三字頭女性的擇偶市場上, 並非"屈就", 乃是"筍盤".

先講要求離地. 以三字頭的適婚女仕來睇, 去到月入十萬, 有車有樓果啲所謂"筍盤", 除非你自問係超靚女超有身材果種, 否則佢鍾意你你都唔會考慮 (正如一個月入二萬既男人, 唔會走去追baby一樣). 另一邊, 唔好話少過香港收入中位數, 就算係中位數果批, 一個月入一萬四千七既男人, 係唔會有能力結婚買樓 (除非靠父蔭). 既然係"中位數", 即係話, 咁樣已經至少篩走大約一半適婚男人.
條件太好既唔會啋你 (係都揀二字頭), 條件太差既你唔會啋佢 (無經濟能力結婚), 拍緊拖既都唔會啋你, 果度已經講緊一大半人. 再扣埋有不良嗜好, 唔想結婚, 結過婚, 只係想搵SP, 賣保險, 騙財騙色既騙子, 外表太差, 住得太遠, 工作太忙, 性格不好, 生活習慣相差太遠, 要同奶奶住等等等等......之後, 你認為, "市面上"仲會有幾多個"正正常常, 樣貌收入中等, 無不良嗜好既男人"可以俾你揀? (已經未計最基本果樣, 你同佢係要"識"既)

中女, 特別係自問都算係"正正常常, 而且幾靚"果班, 成日覺得只不過係一個"正正常常"既男人都已經算係屈就, 但你諗真啲就會明, 呢班男人對你嚟講, 並非屈就, 乃是筍盤.
因為覺得屈就, 就會衍生出第二個問題: 覺得自己既問題唔係問題.
我見過有中女咁講, 我都只不過係肥啫, 無其他問題, 唔明點解搵唔到. 無錯, 呢個世界, 唔係個個討厭肥, 但鍾意偏瘦係主流, 呢個係現實. 正如有人話, 我都只係一定要搵番教徒啫, 無其他要求. 但相比起非教徒, 呢個世界仲有幾多個單身教徒可以俾你揀? 你硬係要令自己脫離主流擇偶條件既一群, 咁最後變得難搵, 係好合情合理既事.

又或者, 正常地, 一個女仔去到三字頭, 身邊差唔多年齡既男仔, 好既大部份都已經俾人mark曬. 剩番落嚟既, 大把二字尾既女仔爭住要. 如果你仲要係覺得搵個四字頭既男人係"屈就", 咁你覺得難搵, 又有何出奇?
當你去到三字頭, 但你仲係用緊二字頭既標準去揀男朋友, 除非你個外表仲可以扮二字中, 二字尾, 否則, 難搵係好正常既結果. 如果你仲想要埋果啲"正正常常, 樣貌收入中等, 無不良嗜好既"但只係大你幾年既男人, well, 咁你唯有繼續呃自己, 只係緣份未到.
另一方面, 去到三字頭既男人仲單身, 點解? 好多女人會幻想, 哦, 佢地大多數可能係遇人不淑, 拍咗幾次都唔啱, 浪費咗多年青春, 所以到三字頭都未搵到啱既人啫! 簡單嚟講, 就係將自己既遭遇, 代入對方身上.

無錯, 其中有少部份可能係咁. 但其他呢? 去到三字頭仲單身, 最大既原因係, 無經濟能力 (女人講樣, 男人就講錢, 唔好話無錢, 無經濟能力結婚既男人, 相等於或低於入息中位數既男人, 市面上比比皆是), 其次, 係性格唔好, 唔識同女人相處 (所以拍極都散). 然後, 無心結婚, 未玩夠, 個底太花 (例如玩過SP), 不良嗜好 (例如爛賭), 仲未計, 離過婚, 喪偶, 有小朋友, 裙腳仔, 算死草, 扮單身搵小三等等等等.
二字頭既男女, 大家心態上仲係比較單純, 而且性格未固定, 大家容易夾到. 去到三字頭, 大家入得社會大學太耐, 個防衛網已經變成萬里長城, 而且性格定曬型, 更加難搵夾到既人. 好既多數俾人揀曬, 想搵到好既就要有好既眼光.

所以, 三字頭既女人, 一定要改變自己既心態. 唔好再成日以為, 一個正正常常既男人係一種屈就. 如果你明白, 咁既年齡層, 一個正正常常既男人其實係一個筍盤, 你先會容易接受, 其實喺你心目中, 果啲"無法接受"既男人, 其實先可能係你既Mr. Right.
然後, 你要明白, 你想搵到真正的緣份, 就要做好自己. 機會只係留俾有準備既人. "緣份未到"只係自欺欺人既安慰. 你真係有心想搵個白頭皆老既男人, 你就要令自己符合呢個人既期望. 去到三字頭, 仲想搵一個三字頭既男人, 唔係唔得, 但機會會少得多. 如果仲要正正常常, 無不良嗜好, "中等"收入, 仲希望可以無M字額, 唔可以矮過自己, 唔可以有肚腩, 要有幽默感balabala.....咁你只會令自己揀無可揀.

男女擇偶, 男人一直好明白, 要追到女仔, 就要符合對方的期望. 男人唔會話, 我唔會理自己有無錢, 有無幽默感, 識唔識投其所好, 會唔會哄女仔, 總之, 我要搵個樣靚身材正, 又要對我千依百順, 以我為中心既女朋友. 但唔少女人都會係咁: 我唔會理自己係咪好肥, 識唔識打扮, 會唔會溫柔體貼, 識唔識講下男人既話題, 肯唔肯哄男人, 總之, 我要搵個都教授. 我肯花青春同你拍拖就已經係我最大既付出, 嫁得唔好不如唔好嫁, 搵唔到只係緣份未到. 如果到呢一刻, 單身的你仍然抱著這樣的心態, 那我只能祝你, 緣份好快就到.

最後, 就係行動. 好多女仔成日話難搵男朋友, 但工餘時間唯一會做既, 就係宅喺屋企. 又或者, 驚俾人呃, 於是乎三十歲都未拍過拖. 你唔走出comfort zone去識人, 來來去去都係身邊呢班朋友, 緣份有何方法接近你? 年紀越大, 身邊好既越少, 你一次拖都未拍過, 點識分對方係好人壞人, 真心還是騙色?
興趣班難搵? 你返甚麼興趣班? 你去啲煮野食班, 班學員大多係女仔, 當然難搵. 你返瑜珈班, 去到做瑜珈, 做到就閃人, 點會搵到? 打波行山攝影呢啲就比較理想, 嚟既人唔一定有女朋友, 又可以培養共同興趣, 唔會course完咗就斷咗聯絡, 打完波可以約出嚟飲野, 行山容易friend搭friend識人, 影完相可以約出嚟睇相, 呢啲班, 機會先會多.
上網識人易俾人呃? 現實生活識人就唔易嗎? 問題係在於你有無經驗. 好似踩單車, 無人可以仲未跌過就識踩單車, 你驚跌就唔去踩, 你一世都學唔識.
真係想搵個好男人, 就要坐言起行.

[圖擷取自網路，如有疑問請私訊]