【真人真事】屯門兆禧苑睇樓靈異經歷：我同經紀都見到茶几自己郁，之後你眼望我眼...

:0:0

舊年我同女朋友去屯門睇樓，我地啲窮L人家，開頭睇咗幾間市中心既盤，唔係價錢唔岩，就係大細唔岩，個經紀可能睇得出我地筆直有限，之後就帶我地去睇啲遠離市中心、屯門碼頭果邊既盤，當中有一個居屋屋苑叫兆禧苑，我仲記得當時先睇一間位於3樓既放盤，部lift由地下去3樓好似搭咗好耐咁，雖然我無計時，不過我估應該超過兩分鐘。
我女朋友就問：架lift好慢喎，會唔會有事架?

個經紀即刻話：呢度啲lift係咁架，3樓好似去咗30樓咁，都廿幾三十年樓，慢啲都好正常
我好細聲同女朋友講：唔L係掛，返工趕時間真係唔得佢死
我一講完，部lift chok咗一嚇，啲燈又閃咗一閃，之後lift門打開，走廊出面陰森森，我同女朋友都唔敢行出去，經紀見到咁嘅情況唯有出先，之後回頭話：「無事既，只係盞走廊燈燒咗姐。」聽到佢咁講，我地唯有跟佢行。

3樓果間係有人住，不過去到屋主唔知去咗邊，無人應門，唯有睇咗另一間先，另一間喺上兩層，今次我地決定唔搭lift，行咗兩層搵到我地要睇果間屋，經紀一早已經同我地講咗呢個係交吉盤。我仲記得當時道鐵閘係由右向左拉，道門都係右邊開，我女朋友企咗喺個經紀左手邊，而我就企咗喺個經紀右手邊，佢拉開鐵閘後，想用鎖匙打開大門，咦，竟然開唔到喎，佢再試多次都係開唔到，之後佢敲咗一下門，面向我講咗聲「唔好意思」，門就打開咗（而家諗返句唔好意思應該唔係同我講）
佢打開大門一剎那，我從道門剛剛打開時既罅隙，見到一張茶几向左移動（由於女朋友企喺經紀左邊，所以咩都睇唔到），我同經紀你眼望我眼，我懷疑佢都見到，我初時以為係張茶几放咗喺道門後面，所以頂住咗道門，令到經紀開唔到，不過我入到屋就知道我嘅推論係錯嘅...

入到屋，燈開唔到，當時已經黃昏接近天黑，我一望張茶几，就覺得好唔妥，張茶几原來同道門係有一段距離，茶几左邊仲有一張梳化，咁頭先張茶几點解會向左移呢？諗諗下，張茶几咁重，就算真係開門推郁佢，都無理由會郁得咁快，同埋就算要郁都唔係向左移，而係向後或斜移。都未黎得切搞清楚，我就聽到女朋友叫我。
女朋友：你睇下？點解個熱水爐會喺廁所出面？

係，我從未見過一個熱水爐會裝喺廁所出面，即係裝咗喺個廳度。個經紀即刻話：應該係屋主自己改嘅，我心諗鬼唔知咩，點解要咁改至得架？但係佢都答我唔到...
全屋只得其中一間房嘅燈著到，我同經紀入咗房睇，女朋友喺廳繼續睇，間房嘅燈係淡黃色，房內仲擺咗好多物品，有張書檯，檯上面有好多用品，仲有一架單車，架單車好新，間房好整齊，整齊得同全屋其他地方格格不入，其他地方好明顯係無人住，而呢間房俾我既感覺係...仲有人住！

我忍唔住問：仲有人住喺度？
經紀：點會呢？呢個盤已經交吉
我再問：不過呢間房好似...
經紀：um...其實都睇得七七八八，今日仲有最後一個盤，不如我地快啲去睇埋佢啦，都天黑啦
講完個經紀就抆咗我地走，搭lift落返去嘅時候，佢同我地講：放心，今日帶你地睇嘅盤全部都唔係凶宅，連疑似凶宅都無，仲話如果係凶宅按揭都批唔到。