(含教學) 拆解《幕後玩家》劉佩玥四大鉤引男人絕招

:0:0

好多女人聽到「小三」呢兩個字，都會咬牙切齒，尋晚播出嘅嗰集《幕後玩家》，就完美刻劃咗小三嘅可恨之處。話說黃宗澤飾演嘅Sheldon，終於畀老婆龔嘉欣發現咗原來佢一直有小三劉佩玥，嘉欣仲崩潰咁喊住問：「究竟我做錯啲咩？」呢一幕真係睇到網民心都痛埋，忍唔住係咁鬧小三劉佩玥賤格！究竟呢位由劉佩玥飾演嘅小三Emma憑咩手段步步進逼大婆，企圖坐正大婆位置？myTV SUPER Facebook就上載咗段片，拆解最強小三Emma究竟使出邊「四大絕招」嚟拆散人哋家庭！
讚小三手段高明
首先第一招係「盜取大婆財物」，劇中Emma經常藉故接近龔嘉欣飾演嘅Carmen，有一次佢偷走咗Carmen支唇膏，最過分係搽完Carmen支唇膏後，再錫埋人哋老公Sheldon，仲問Sheldon支唇膏香唔香，真係有網民眼火爆話想大巴摑Emma，又鬧黃宗澤咀小三嘅時候，有冇一刻諗起老婆Carmen？
咁都未夠，當Carmen開始當Emma係朋友之後，Emma就使出第二招「扮大肚博同情」，Emma約Carmen出嚟食飯，扮曬作嘔作悶，咁Carmen當然問佢咩事啦，見佢作嘔作到面容扭曲，自然問佢係咪有咗，佢就陰陰嘴答係，仲叫Carmen幫佢保守秘密，真係高招，難怪網民鬧佢嘅同時，都忍唔住讚佢：「小三手段真高明！」

同大婆攤牌
當兩大絕招都使出之後，Emma就開始部署第三招「懶體貼搶老公」，係人都知女人可以同人分享美食，甚至靚衫都可以Share著，但講到老公，就一定冇可能同第二個女人分享。但道德淪亡嘅Emma竟然提出同Carmen分老公，Emma又專登講啲好Hurt嘅說話刺激Carmen，Emma話Sheldon請佢，係想日日都見到佢，仲話Sheldon成日叫自己陪佢，不過佢自己就有叫Sheldon返屋企陪老婆！
聽到呢度，Carmen已經開始崩潰，Emma可以話係奸計得逞。到咗呢個位，網民直頭話想攞把「斬狐刀」出嚟滅妖，亦有網民話：「可能佢演技好啦，我依家真係好憎劉佩玥！」不過大多數網民都係鬧小三，反而Sheldon就少啲人鬧，有網民仲好同情佢咁話：「唉，Sheldon只係犯咗天下男人會犯嘅錯！」乜真係咩？
紛紛咀咒小三
至於最後一招就係「妄想登堂入室」，亦係網民睇到最牙癢癢嘅一招，已經破壞緊人哋家庭嘅Emma，竟然可以喺Sheldon面前扮曬嘢，話自己唔係想破壞佢家庭，只係想陪喺佢身邊，仲大拋金句話：「點解我可以接受佢（Carmen）嘅存在，佢唔可以接受我？」就係呢句令網民嬲到震，網民唔止戥Carmen唔抵，仲紛紛留言咀咒Emma玩得火就要預咗會畀火燒死！睇到呢度，不禁想嘆番句「女人何苦為難女人呢？」唉！!!!!!