情人節果日，你同我去食雲吞麵，仲話「有乜所謂喎！」

:0:0

每當情人節快到，阿強總系會感到有啲遺憾…喺阿強同女朋友Mary過嘅第一年情人節，無喺高級餐廳訂好檯、無禮物，連一紮花，阿強都買唔起…雖然物質系次要，但阿強仲系覺得委屈咗Mary。果日情人節，喺中華廣場，男嘅搭住女朋友嘅膊頭或者攬住條腰，女嘅捧住鮮花揚起嘴角，幸福洋溢住成個商場。但阿強同Mary已經有共識，對佢哋來講，個晚唔系華麗嘅一晚。行到中廣嘅每間餐廳前，佢哋都會睇一睇餐牌，Mary一睇到到三位數字，就會搖一搖頭，話唔鍾意食。最後佢哋行到中廣旁嘅一間雲吞麵店前，Mary停低，拉一拉阿強只手話：「今晚就喺呢間食啦！」 阿強瞄一眼店內，一片冷清，只有兩個阿叔一邊睇報紙一邊「爬」面。阿強遲疑咁問：「好似唔系幾好…」但Mary已拉住阿強嘅衣袖行咗入去，話：「有乜所謂喎！」果一段系阿強銀行帳號只凈低幾百蚊嘅日子，面對殘酷嘅現實，阿強感到無力，只好跟住Mary行入去，喺阿強面無表情，拉出凳仔坐低果一刻，Mary已經笑住咁點咗兩碗雲吞麵。阿強忍唔住同Mary講：「好對不起…情人節要你咁樣過…」「有乜所謂喎！」Mary爬咗第一啖面繼續笑住話：「咁呀…咁我要叫多支可樂！」聽到Mary咁嘅要求，好多人大概會以為Mary仲活喺天真嘅世界，好似小朋友咁容易滿足，但其實Mary嘅追求者無數，同阿強同期嘅對手就系一個可以隨時娶Mary，可以喺巴黎影結婚相，可以環遊歐洲渡蜜月嘅中產男人。而呢個對手亦無怠慢過，除咗約Mary去高級餐廳共進晚餐，甜品之後仲以一束鬱金香襯托Mary一整晚嘅優雅。除咗呢啲完美嘅約會，對手仲可以令到Mary喺生活上無憂無慮。相反，阿強嘅境況就差強人意，仲喺起點由零捱起，充滿未知數嘅生活。但Mary就好似一隻蝴蝶放棄穿梭雲彩間，寧願折翼陪燈蛾撲火，繼續番Part-Time搵錢。

阿強問過Mary：「點解當時選擇咗我？」Mary話：「傻瓜，同你一齊我可以做返自己…」 阿強唔系好明：「但我做得總喺唔夠人哋多…」Mary就笑住補充：「超級傻瓜，人哋做咩嘢都及唔上你，即使你咩都唔做，我都系鍾意，鍾意你戇居居咁喺人哋面前扮曬正經，對住我又可以低低能能咁氹我…」講返當晚，埋單之後，Mary見阿強依然低住頭，就話：「我哋仲有好多個情人節架嘛！」(阿強呢條戇居仔，真系要Mary畫公仔畫出腸，Mary嘅意思當然系，未來嘅日子都會同阿強一齊過啦！)果一年，果一晚，阿強可以俾到Mary嘅，就系一碗雲吞麵加一支可樂，以及喺雲吞麵店門口，俾Mary一個緊緊嘅擁抱…如果，你哋喺2月14日情人節睇到有情侶喺雲吞麵店爬面，請唔好覺得個男仔好寒酸。雖然碗入邊果粒雲吞，比唔上一粒鑽石，但你睇唔見嘅系，佢哋喺檯底下嘅十指，有多緊扣！ 張智霖－十指緊扣／2000 金句王微信號：jinjuking來源：mp.weixin.qq.com

[圖擷取自網路，如有疑問請私訊]