由一套前避震開始 WATKINS M001

大部份男仔細個都有試過因為好奇而拆開啲玩具、電子產品,而最後大多數都係砌唔返埋(然後被人打)。來自波蘭嘅Jack Watkins雖然唔係細路,仲有個機械工程博士學位,兼且帶領緊一隊三十人工程師,又係當地大學講師,但佢同樣有住一顆堅定嘅好奇心——多年前佢見過由Stellan Egeland製作嘅BMW Harrier,好奇想知道佢嘅前避震究竟係點整出黎,於是就以電腦繪圖試圖重製,後來畫下畫下成架車都出埋黎,就係以下呢架Watkins M001。


Jack搵黎當地電單車改裝師Mateusz Kozlowski幫手,除咗引擎同部份零件來自2002年BWM R 1150 RT,其他幾乎都係由Jack設計、搵人製作,再於Mateusz嘅指導下組裝,成件事就係一件放大複雜版嘅Lego一樣。後輪係來自BMW GS系列,前輪就來自Yamaha XJ6,再接駁Jack嘅前避震。車身本質上係兩塊鐳射切割嘅鋼板,「座位」嚴格上只係三塊軟墊,目的係為咗保持車身緊致,但騰出空間安裝油箱。甚至連排氣都係特別製作,有兩層物料及84粒螺絲。



值得一提嘅係因為Jack嘅專業背景,所以佢用咗大量電腦技術、分析去製作,由設計同物料到裝嵌都經過嚴密計算,先整得出呢部充滿個人風格嘅作品。Jack仲好細心地紀錄哂整個組裝過程,並寫成一本「使用指南」,等大家可以自行維修。不過唔好話我唔提你,拆之前諗一諗你細個拆散咗啲玩具嘅下場先呀。Watkins


[圖擷取自網路,如有疑問請私訊]

本篇
不想錯過? 請追蹤FB專頁!    
前一頁 後一頁