【九州個州】熊本自駕遊 記得食西…瓜甜品

Photos: gazoo.com/道の駅　すいかの里植木 fb無可否認，愈來愈多人鍾意去日本九州自駕遊。其實，鍾意去九州自駕遊，除咗因為佢多歷史景點同名勝，仲可能因為部份山區有唔少大直路。喂！放心，我唔係叫你去「爆」山路，費事你跌咗落萬丈深淵，你女人或你老媽子嚟怨我，只係話呢啲路，風景靚，天色又好，泊埋一邊，拎部Fuji 645傻瓜菲林機出嚟影返幾張，爽！


唔少人都鍾意熊本熊，亦好想去吓熊本，咁要去吓喇。熊本附近地區有唔少優質農產品，啲水果好掂㗎，食多啲生果有益呀，唔好再汽水當水飲喇，會死㗎，成班老友會好唔捨得你。

最近喺熊本巿北區，開咗一間以西瓜為主題嘅直銷店，開早上九點至傍晚六點半，呢間店一啲都唔寒酸，淨係店外已有99個停車位，洗手間更加係24小時免費使用，方便啲瘋狂自駕友嘛。







店內有多款西瓜，傳統圓咕碌形狀嘅固然有，啲心形西瓜都幾cute喎。有日本傳媒試食過佢哋出品嘅西瓜啫喱，個包裝好鬼靚嘅呢，一盒長條型，內有5個，1500日圓，都ok吖，送畀人唔錯，好過又係求其喺機場買文明堂蜂蜜蛋榚吖。 我會試吓佢個西瓜包，應該呃到Like。 有興趣睇吓呢個網址：https://suikanosato-ueki.com/


[圖擷取自網路，如有疑問請私訊]

本篇	不想錯過? 請追蹤FB專頁!

喜歡這篇嗎？快分享吧！

前一頁 後一頁