【1公升Turbo大熱】Suzuki第4代Jimny方角車身有性格

:0:0

鈴木（Suzuki）第4代Jimny嘅「試車諜照」同「設計圖片」相繼流出。第一眼望，即刻爆出3個字：「掂！掂！掂！」

1972 Jimny(LJ 20)

1977 Jimny 8(SJ20)
掂在咩呢？喂！你睇新Jimny嘅車身，大部份都由平面同方角組成，勁似70年代元祖Jimny，睇耐少少，更有W460型平治（Mercedes-Benz）G-Wagen同越野路華（Land Rover）Defender味道，鍾意硬派越野車嘅巴打，仲唔起痰？每每講求流線型車身嘅今日，鈴木「反其道而行」，搵返Suzuki同Jimny應該要有嘅嘢，無隨波逐流，真係好夠guts同自信，實在要企起身拍多幾下手掌。

中控台方面，兩個疑似深色外方內圓嘅速度錶同轉數錶，勁有「413」feel。出風口亦有復古味道，中控台中央有疑似觸控屏幕，下方三個圓形旋扭，內藏顯示屏，未知功能與今代Vitara相似。對落有四粒方形大鍵，唔知係唔係控制四驅模式（加力波）。圖片中嘅版本配自動波箱，波棍幾長，波棍頭頂部嘅release掣幾特別，有啲似蛇頭。

引擎方面，日本及英國行家都指新Jimny推出初期會有兩款引擎，頂級版為1公升三缸Boosterjet Turbo引擎，另有1.2公升直四自然吸氣引擎，嗱！擺到明針對兩類客，前者都係跑街多㗎喇，Turbo偈又有得改吓嘢，你明㗎啦。自然吸氣引擎方面，擺明務實，成日要「擒山」或攀山涉水嘅巴打，都係打「穩陣波」揀N.A.偈好啲。不過，睇返今代（1998年至現在）Jimny，喺唔同銷售地區都有多種引擎配搭，唔使因為呢兩個配搭唔啱口胃就「落閘」嘅！

[圖擷取自網路，如有疑問請私訊]