本田「超力」小狼by K-Speed

本田自1952年開始推出嘅「Super Cub」電單車至今已經賣出超過一億架，係人類歷史上銷量最高嘅交通工具。而上年年尾本田就公佈咗復古、簡潔、精緻嘅2018年新款，如果真係要用動物黎做比喻，就好似一隻會乖乖地陪你通勤買餸嘅八哥。但世上總有人鍾情老虎狗——就例如泰國電單車改裝公司K-Speed咁。


新款Super Cub早前泰國開賣，本田為咗宣傳就喺開售前一個月將一部新款Super Cub交畀K-Speed，要佢哋於30日內造啲特別嘢出黎。咁K-Speed喺呢30日做咗啲咩？首先佢哋保留咗Super Cub最有標誌性嘅前「啡鈴」，但就換上復古味更加濃嘅手把，配上自製嘅轉向燈掣、簡單嘅速度錶、同一個單車用嘅「鈴鈴」。另外佢哋亦為前叉加上金屬外殼，除咗可以令車頭部份睇落更厚實，亦順手將原本位於手把嘅轉向燈移咗落去，車頭睇落就更簡潔。另外車胎亦用上Vee Rubber復古鋸齒胎。


車尾方面改動更大。K-Speed將整個車尾連行李架拆除，加上一個小小嘅自製金屬泥擋，並將車尾燈移到其上。搖臂同後避震則整套更換，加上K-Speed旗下Diablo品牌嘅排氣喉、重新縫製嘅皮座等等。最後再將整架車噴成啞黑、白色。就成為大家眼前呢個外兇悍，但其實都係平易近人嘅「Super Power Cub」啦。


目前Honda同K-Speed都冇公佈係咪會將「Super Power Cub」正式投產，但我相信好多人都已經拎定個銀包出黎等緊畀錢啦。Bikeexif


[圖擷取自網路，如有疑問請私訊]

本篇	不想錯過? 請追蹤FB專頁!

喜歡這篇嗎？快分享吧！

前一頁 後一頁