【頂級奢華】最豪Alphard/Vellfire現身

:0:0

豐田直屬車身改裝部門－Modellista，因應第三代小改款Alphard及Vellfire的推出，終於在日前發表了第三代小改款Royal Lounge的圖片及資料，新車繼續以豪裝設計整個車廂內部，以最貴的Royal Lounge Executive Lounge S HV為例，車價便高達1,578萬日圓（折合未連稅約109萬港元），較「正常版」Executive Lounge S HV（750萬日圓）貴了827萬日圓，等於同一個價錢可以買到兩部普通版Alphard/Vellfire！

貴得有道理，當然是設備和用料。不過在講解新車設備前，先跟大家講講這款車的少少資料，其實早在10系前（即初代Alphard），Modellista已有生產同類型的Royal Lounge版本，同樣以四座位設計（中後排只得兩個位），而且這個傳統一直由20系伸展至小改款前的30系。不過在今次「尾期」款上，廠方就將原有兩個版本：Royal Lounge及Royal Lounge SP二合為一，令這部已經很豪華的「4人車」變得更豪華。

要稱得上最豪，除了將中後排車廂變成兩個獨立座位外，座椅本身亦經過重新設計，椅背上半截部份更特別加闊和加大，相信橫綱級力士坐上去都冇問題。另外，座椅本身亦有黑色和杏色兩種顏色選擇。

除此之外，座椅本身內置冷暖氣功能，同時更內置專門出產按摩椅的富士醫療（Fujiiryoki）提供的按摩系統，為乘客在旅途中提供肩位、腰部和大腿等地方的按摩服務。再者，因為整個後排只得兩個座位，配合本身的Ottoman腳承，可以將座椅完全放平（180度），舒適程度跟頭等機艙不遑多讓。

不但座椅多功能，本身設備亦夠多樣化，首先分隔前後座之間的「圍板」裝有一個24吋的LED顯示屏，配合JBL Premium Sound System音效系統，聽歌睇戲令人仿如置身現場一樣。在電視下面更內設有一個小型雪櫃，方便放置沿途所需的酒水。另外，座椅閱讀燈、車尾衣架亦是標準設備。不過，最誇張是地毯圖案，竟然參考自日本「枯山水」的園林設計，所以算起來這千萬日圓車價是冇收多你！